މާލޭގެ މޭޔަރު ހޮވަން މި ޖެނުއަރީ 13، ގައި ބޭއްވި އިންތިހާބު ބޮޑު ތަފާތަކުން ކާމިޔާބު ކުރެއްވި އިދިކޮޅު އެމްޑީޕީގެ ކެންޑިޑޭޓު އާދަމް އާޒިމް މަގާމުގެ ހުވާ ކުރެއްވުމުގެ ރަސްމިއްޔާތު އަންނަ ހޯމަ ދުވަހު ދަރުބާރުގޭގައި ބާއްވަން ނިންމައިފި އެވެ.
ހުވާ ކުރައްވަން ދަރުބާރުގޭގައި ބާއްވާ ޖަލްސާގައި އާޒިމްގެ އިތުރުން މާލެ ސިޓީގެ ކައުންސިލަރު ކަމަށް އަލަށް ހޮވުނު ތިން ކައުންސިލަރުން ވެސް ހުވާ ކުރައްވާނެ އެވެ.
އިތުރު ހަތަރު ކެންޑިޑޭޓަކާ ވާދަ ކުރައްވައި އާޒިމް އިންތިހާބު އާޒިމް ކާމިޔާބު ކުރެއްވީ 7،621 ވޯޓުންނެވެ.
އެ އިންތިހާބުގައި ސަރުކާރު ހިންގާ ޕާޓީ ޕީއެންސީގެ ފަރާތުން ވާދަ ކުރެއްވި ކެންޑިޑޭޓު، ކުރީގެ ބަންޑާރަ ނައިބު އައިޝަތު އާޒިމާ ޝަކޫރަށް ލިބިވަޑައިގަތީ 5،035 ވޯޓެވެ.
މާލޭގެ މޭޔަރުގެ މަގާމު އެމްޑީޕީގެ ކެންޑިޑޭޓަކަށް މި ލިބުނީ ރިޔާސީ އިންތިހާބުގައި އެ ޕާޓީއަށް މާލެއިން ބޮޑު ނާކާމިޔާބީއެއް ލިބިފައި އޮއްވަ އެވެ.
ރައީސް އިބްރާހިމް މުހައްމަދު ސޯލިހުގެ ވެރިކަމުގައި އެންމެ ގިނަ ޕްރޮޖެކްޓްތައް ހިންގި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ ސީއީއޯ މަގާމު އަދާކުރެއްވި އާޒިމް އެމްޑީޕީ އަށް ގުޅިވަޑައިގަތީ ދާދި ފަހުންނެވެ.
ޕާޓީއާ ގުޅިވަޑައި ނުގަތަސް އެމްޑީޕީއާއެކު އާޒިމް މަސައްކަތް ކުރައްވަން ފެއްޓެވީ، ކުރީގެ ރައީސް އަބްދުﷲ ޔާމީންގެ ވެރިކަމުގައި އޭނާގެ ބޭބެ، ކުރީގެ ޑިފެންސް މިނިސްޓަރު މުހައްމަދު ނާޒިމް ބަންދުކޮށް ޖަލަށްލި ހިސާބުންނެވެ.
އާޒިމް ކެރިއަރު ފެށީ ކޫޕާސް އެންޑް ލައިބްރޭންޑުން އިންޓާނަލް އޮޑިޓަރެއްގެ ގޮތުގައެވެ. އަމިއްލަ ވިޔަފާރީގެ އިތުރުން ސަރުކާރުގެ އެކި މަގާމުތަށް އާޒިމް އަދާކުރެއްވި އެވެ. އެގޮތުން މެނޭޖަރ-އެކައުންޓްސް، ޑެޕިއުޓީ ފައިނޭންސް މެނޭޖާ (ހެޑް އޮފް ފައިނޭންސް) އަދި އައިލެންޑް ބެވަރޭޖްސް މޯލްޑިވްސް ޕްރައިވެޓް ލިމިޓެޑްގެ ޑެޕިއުޓީ ސީއީއޯގެ މަގާމު އަދާކުރެއްވި އެވެ.
އެމްޓީސީސީގެ ސީއީއޯގެ މަގާމަށް އައްޔަން ކުރެއްވުމުގެ ކުރިން އާޒިމް ވަނީ ޑިސެމްބަރު، 2018 އިން ޖެނުއަރީ، 2020 އަށް މޯލްޑިވްސް ވޯޓާ އެންޑް ސެވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިން ޑިރެކްޓަރުގެ މަގާމާއި، ނޮވެމްބަރު، 2013 އިން ފެބްރުއަރީ، 2015 އަށް ސްޓޭޓް ޓްރޭޑިން އޮގަނައިޒޭޝަން (އެސްޓީއޯ) ގެ މެނޭޖިން ޑިރެކްޓަރުގެ މަގާމު އަދާކުރައްވާފަ އެވެ.
