ޕްރޮގްރެސިވް ކޮންގްރެސް ކޯލިޝަނުގައި ހިމެނޭ ޕީއެންސީ އާއި ޕީޕީއެމްގެ ފަރާތުން މަޖިލީހަށް ވާދަ ކުރާނެ ކެންޑިޑޭޓަކު ހޮވަން ބާއްވާ ޕްރައިމަރީ ބާއްވާ ތާރީހު ދެވަނަ ފަހަރަށް ފަސްކޮށްފި އެވެ.
އެ ކޯލިޝަނުގެ ޕްރައިމަރީ ބާއްވަން ފުރަތަމަ ކަނޑައެޅި ތާރީހަކީ މިދިޔަ ޑިސެމްބަރު މަހުގެ 23ގަ އެވެ. އެ ފަހަރު ޕްރައިމަރީ ފަސްކުރީ މި މަހު 20 އަށެވެ.
ޕްރައިމަރީ ފަސްކުރާ ސަބަބެއް ކަމަށް އެ ކޯލިޝަނުން އޭރު ބުނީ ކުރިން ތާވަލުކުރި ތާރީހަކީ ސްކޫލު ބަންދު ދުވަސްވަރަކަށް ވެފައި, ގިނަ ރައްޔިތުން އެކި ބޭނުންތަކަށް އަދި އުމްރާ ކުރުމަށް ގައުމުން ބޭރަށް ދަތުރު ކުރުމަށް ހަމަޖެހިފައިވާ ދުވަސްވަރަކަށް ވާތީ އެވެ.
މިފަހަރު ޕްރައިމަރީ ލަސްކުރީ ކީއްވެކަން އެ ކޯލިޝަނުން އަދި ނުބުނެ އެވެ. ނަމަވެސް ޕްރައިމަރީގައި ވާދަ ކުރާ ކެންޑިޑޭޓުންގެ ޝަކުވާތައް ގިނަކަން ފާހަގަކުރެވެ އެވެ. އޭގެ ތެރޭގައި ވޯޓާސް ލިސްޓާ ގުޅޭ ޝަކުވާތައް ވެސް ހިމެނެ އެވެ.
ޕީއެންސީން މިރޭ ވަނީ ޕްރައިމަރީގައި ވޯޓު ލެވޭ ލިސްޓު އާންމުކޮށްފަ އެވެ. މި ލިސްޓު އެ ޕާޓީގެ ވެބްސައިޓުތަކުން ފެންނާނެ އެވެ.
އެ ކޯލިޝަނުން މިއަދު ކުރި އިއުލާނެއްގައި ބުނީ ލިސްޓުގައި އެއްވެސް މައްސަލައެއް އުޅޭނަމަ އެކަން ލިޔުމުން ޕާޓީއަށް އަންގަން ޖެހޭނެ ކަމަށެވެ. އެ ޝަކުވާތަށް ބަލައިގަންނާނީ 18 ޖެނުއަރީ ވާ ބުރާސްފަތި ދުވަހުގެ އިރުއޮއްސި 6 ގެ ކުރިންނެވެ.
ޕްރޮގްރެސިވް ކޯލިޝަނުން ވަނީ ބައެެއް ދާއިރާތަކުން އިތުރު މީހަކު ކުރިމަތިނުލާތީ ޕްރައިމަރީއަކާ ނުލައި މަޖިލިސް އިންތިހާބުގެ ޓިކެޓު ބައެއް މީހުންނަށް ދީފަ އެވެ. މި އަހަރުގެ ރައްޔިތުންގެ މަޖިލިސް އިންތިހާބު ބޭއްވުމަށް އިލެކްޝަން ކޮމިޝަނުން ކަނޑައަޅާފައިވާ ތާރީހަކީ އަންނަ މާޗު މަހުގެ 17 އެވެ.
