ރާއްޖެއަށް ސިފައިން ފޮނުވާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރު ބަދަލު ކުރަން އިންޑިއާގެ ކުރީގެ މަޖިލިސް މެންބަރު ސުބްރަމާނިއަން ސްވާމީ ގޮވާލުމުން އިދިކޮޅު މައި ޕާޓީ އެމްޑީޕީން އެކަން ކުށްވެރިކޮށްފި އެވެ.
ދިވެހި ސަރުކާރު ބަދަލު ކުރަން ސުބްރަމާނިއަން ގޮވާލީ ދިވެހިރާއްޖޭގައި ތިބި އިންޑިއާ ސިފައިން އަންނަ މާޗް 15، ގެ ކުރިން ބޭލުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިންޑިއާ ސަރުކާރަށް ހުށަހެޅުއްވުމުންނެވެ.
އިންޑިއާގެ އިދިކޮޅު ޕާޓީއަށް ނިސްބަތްވާ އެ މެންބަރު އެސްކްގައި ކުރެއްވި ޕޯސްޓެއްގައި ވަނީ, ރާއްޖޭގެ ހުށަހެޅުމަށް އެ ގައުމުގެ ޕްރައިމް މިނިސްޓަރު އިޖާބަ ދެއްވާނީތޯ ނުވަތަ ރާއްޖެއަށް އަސްކަރިއްޔާ އާއި އެއާފޯސް އަދި ނޭވީ ފޮނުވާނީތޯ ސުވާލު އުފައްދަވާފަ އެވެ.
އެކަމާ ގުޅިގެން އެމްޑީޕީން ނެރުނު ބަޔާނުގައި ސަބްރަމާނިއަން ދެއްކެވި އެ ވާހަކައަކީ ދިވެހި ރައްޔިތުންނާއި އިންޑިޔާގެ ރައްޔިތުންގެ މެދުގައި ނަފްރަތު އުފައްދަން ދެއްކި ޒިންމާދާރުކަން ކުޑަ ވާހަކައެއް ކަމަށް ބުނެ, އެކަން ކުށްވެރިކޮށްފައިވެ އެވެ.
ޒަމާނުއްސުރެ ރާއްޖެ އާއި އިންޑިއާއާ ދެ ގައުމުގެ ދެމެދުގައި އޮތް ގުޅުން ބިނާވެފައި ވަނީ އިހްތިރާމާއި ރައްޔިތުންގެ މެދުގައި އޮންނަ ގުޅުމުގެ މައްޗަށް ކަން ފާހަގަކޮށް އެމްޑީޕީން ބުނީ އެ ބާވަތުގެ ވާހަކަތަކަށް އިތުރަށް ވިސްނަން ޖެހޭ ކަމަށް ގަބޫލު ނުކުރާ ކަމަށެވެ.
އަދި އިންޑިއާގެ ދާހިލީ ސިޔާސީ ކަންކަމުގައި ރާއްޖެ ބޭނުން ނުކުރުމަށް ވެސް އެމްޑީޕީން ވަނީ އޭނާއަށް ގޮވާލާފަ އެވެ.
އެމްޑީޕީން ބުނީ ރާއްޖެއާއި އިންޑިއާގެ ގުޅުމުގެ ތެރެއަށް ސުބްރަމާނިއަން ފަދަ "މަޑު ފެންގަނޑުގައި އުޅޭ މަސްތައް" ވަދެގެން އުޅެނީ ރައީސް މުއިއްޒުގެ ސިޔާސަތުތަކުގެ ސަބަބުން ކަމަށެވެ.
