ހުރިހާ އިރެއްގައި އިންޑިއާއަށް އެއްބާރުލުން ނުލިބޭނެ ކަމަށް ގަބޫލުކުރާ ކަމަށާއި އިސްކަން ދެނީ ވާހަކަ ދައްކައިގެން، ގައުމުތަކާ ބަދަހިކޮށްފައިވާ ގުޅުންތަކުގެ ތެރެއިން އިންޑިއާގެ މަސްލަހަތު ހިމާޔަތްކުރަން ކަމަށް އެ ގައުމުގެ އެކްސްޓާނަލް އެފެއާޒް މިނިސްޓަރު އެސް ޖައިޝަންކަރު ވިދާޅުވެއްޖެ އެވެ.
އިންޑިއާގެ މަހާރާޝްތުރާ ސްޓޭޓުގެ ނާގްޕޫރުގައި ބޭއްވި ހާއްސަ ޓައުންހޯލް ބައްދަލުވުމެއްގައި ޖައިޝަންކަރު މިހެން ވިދާޅުވީ، ރާއްޖެ-އިންޑިއާގެ ގުޅުމަށް ލޮޅުން އައިސްފައިވާކަން ފާހަގަކުރަމުން، ސަރުކާރުތައް ބަދަލުވިޔަސް އިންޑިއާގެ މަސްލަހަތު ކުރިއަރުވަން ކުރެވޭ މަސައްކަތަކީ ކޮބައިތޯ އިންޑިއާގެ ޒުވާނަކު އެހި ސުވާލަކަށް ޖަވާބު ދެއްވަމުންނެވެ.
ޖަވާބުގައި ޖައިޝަންކަރު ފުރަތަމަ ވެސް ފާހަގަކުރެއްވީ އިންޑިއާ "ނެއިބާހުޑް ފަސްޓް" ސިޔާސަތެވެ. އޭނާ ވިދާޅުވީ އެ ސިޔާސަތަކީ އިންޑިއާގެ މަސްލަހަތު ހިމާޔަތްކުރުމުގެ މުހިންމު ބައެއް ކަމަށެވެ. މިހެން ނަމަވެސް ސިޔާސީ އޮއިވަރަށް އަންނަ ބަދަލާ އެކީ އިންޑިއާ އޮންނަ ގުޅުމަށް ބަދަލު އަންނާނެކަން ގަބޫލުކުރައްވާ ކަމަށް، ރާއްޖޭގެ ނަން ނުުގަނެ ދެއްވި ޖަވާބުގައި އޭނާ ފާހަގަކުރެއްވި އެވެ.
"އަހަރަމެން ކުރަން މިއުޅޭ ކަންތަކުގެ ބައެއް އެއީ ނެއިބަހުޑް ފަސްޓް ސިޔާސަތު. މިހެން ނަމަވެސް ސިޔާސީ ކަންކަމަކީ ސިޔާސީ ކަންކަން. އެހެންވެ އަހަރެންނަކަށް ޔަގީންކަމެއް ނުދެވޭނެ ކޮންމެ ގައުމެއްގައި ކޮންމެ ދުވަހެއްގައި ހުރިހާ އެންމެން އިންޑިއާއާ އެއްބަސްވެ އިންޑިއާއަށް އެހީތެރިވެދޭނެ ކަމަށް،" އިނގިރޭސިން ވާހަކަ ދައްކަވަމުން ޖައިޝަންކަރު ވިދާޅުވި އެވެ.
އިންޑިއާއިން މައްސަލަތައް ހައްލުކުރަން ގެންގުޅޭ ވިސްނުން ހާމަކުރައްވަމުން ޖައިޝަންކަރު ވިދާޅުވީ، އެ ގައުމުން ކުރަމުން އަންނަ ކަމަކީ އަދި ވޭތުވި ދިހަ އަހަރުގެ ތެރޭގައި އެންމެ ކާމިޔާބު ކަމާއެކީ ކުރި ކަމަކީ ގައުމުތަކާ އެކީ އޮންނަ ގުޅުންތައް ވަރުގަދަ ކުރުން ކަމަށެވެ. ބޭނުމަކީ، އޭނާ ވިދާޅުވި ގޮތުގައި، ސިޔާސީ އޮއިވަރަށް ބަދަލު އަޔަސް ގައުމުތަކުގެ ރައްޔިތުން އިންޑިއާ މެދު ރަނގަޅަށް ދެކުމެވެ.
މި ގުޅުންތައް ބިނާކުރަން ކުރެވޭ މަސައްކަތްތައް ބަޔާންކުރައްވަމުން އިންޑިއާގެ އެހީގައި ހިންގަމުންދާ އުމްރާނީ ތަރައްގީ އާއި ހަކަތަ ފޯރުކޮށްދިނުމާއި އިގުތިސޯދީ ގޮތުން، ވިޔަފާރި އާއި އިންވެސްޓުމަންޓުތަކުގެ އިތުރުން ގައުމުތަކަށް ޗުއްޓީއަށް ދިޔުން ޖައިޝަންކަރު ފާހަގަކުރެއްވި އެވެ. އަދި މި ހުރިހާ ކަމަކާ އެކީ ގުޅުން ގޯސްވާ ހާލަތުގައި ޑިޕްލޮމަސީގައި އިސްކަން ދެނީ ވާހަކަ ދައްކައިގެން ކަންކަން ހައްލުކުރަން ކަމަށް އޭނާ ވިދާޅުވި އެވެ.
"މި ހުރިހާ ކަމަކީ މި ގުޅުންތައް ތަރައްގީކުރެވޭނެ ގޮތްތައް. ބައެއް ފަހަރު އަހަރަމެން ބޭނުންވާ ގޮތަށް ކަންކަން ނުދިޔައިމަ ނުވަތަ ނުރަނގަޅު ދިމާލަކަށް ދާނަމަ، އަހަރެން މި އުޅޭ [ޑިޕްލޮމަސީ] ދާއިރާގައި މަސައްކަތް ކުރަނީ ވާހަކަ ދައްކައިގެން ކުރީގެ ގުޅުންތައް އިއާދަ ކުރެވޭތޯ،" ޖައިޝަންކަރު ވިދާޅުވި އެވެ.
ޗުއްޓީއާ ގުޅުވާ ދެއްކެވި ވާހަކައިގައި ވެސް ސީދާ ރާއްޖެއޭ ޖައިޝަންކަރު ވިދާޅުވި ނުވި ނަމަވެސް، ބެލެވޭ ގޮތުގައި އޭނާގެ މި ވާހަކަތައް އިޝާރާތްކުރެއްވީ އިންޑިއާގައި ރާއްޖެ ބޮއިކޮޓު ކުރަން ހިންގަމުންދާ ކެމްޕެއިނަށެވެ. މި މައްސަލައިގައި ދެ ގައުމުގެ ސަރުކާރުން ވެސް މިހާތަނަށް ރަސްމީކޮށް އެއްވެސް ބަހެއް ބުނެފައި ނުވެ އެވެ.
