މާލޭ މޭޔަރުގެ މަގާމަށް މީހަކު ހޮވުމަށް މިއަދު ބޭއްވި އިންތިހާބުގައި ވޯޓު ދިނީ، ވޯޓުލުމުގެ ހައްގު ލިބޭ މީހުންގެ އެންމެ 32 ޕަސެންޓު މީހުން ކަމަށް ނަތީޖާ ޝީޓުތަކުން ދައްކައިފި އެވެ.
މިއަދު ހެނދުނު 8:00 އިން ފެށިގެން 17:00 އަށް ވޯޓުލުން ނިމުމާ ހަމައަށް ވޯޓު ދިނީ 17،442 މީހުންނެވެ. އެއީ ވޯޓުލުމުގެ ހައްގު ލިބޭ މީހުންގެ 31.8 އިންސައްތަ އެވެ. މި އިންތިހާބުގައި ވޯޓުލުމުގެ ހައްގު 54،680 މީހުންނަށް ލިބުނެވެ.
މިއީ 2021 ގައި ބޭއްވި ލޯކަލް ކައުންސިލު އިންތިހާބުގައި، ފުރަތަމަ ފަހަރަށް މާލޭގެ މޭޔަރަކު ހޮވަން ވޯޓު ދިން އަދަދާ އަޅާ ބަލާއިރު ވެސް މަދު އަދަދެކެވެ. އެ އިންތިހާބުގައި 41 ޕަސެންޓު މީހުން ވޯޓު ދިނެވެ. އެއީ 21،161 މީހުންނެވެ. އެ ފަހަރު މާލެއިން ވޯޓު ދިނުމުގެ ހައްގު ލިބުނީ 51،702 މީހުންނަށެވެ.
މާލޭ މޭޔަރު އިންތިހާބުގައި ވާދަކުރެއްވި ފަސް ކެންޑިޑޭޓުން
- ޝުއައިބު އަލީ (އަމިއްލަ ގޮތުން)
- ހުސެއިން ވަހީދު (އަމިއްލަ ގޮތުން ނަމަވެސް ކުރީގެ ރައީސް ޔާމީންގެ ތާއިދާއެކު)
- އާއިޝަތު އާޒިމާ ޝަކޫރު (ޕީއެންސީ)
- އާދަމް އާޒިމް (އެމްޑީޕީ)
- މުހައްމަދު ސައިފް ފާތިހު (ދަ ޑިމޮކްރެޓްސް)
މާލެ ސިޓީ ކައުންސިލުގެ މޭޔަރު ހޮވަން ބޭއްވި ބައި-އިލެކްޝަނުގެ ވަގުތީ ނަތީޖާއިން ދައްކާ ގޮތުގައި އެންމެ ގާތުން ވާދަކުރެއްވި ކެނޑިޑޭޓާ ތަފާތު ބޮޑު ނަތީޖާއަކުން ކުރި ހޯއްދަވައި، އިންތިހާބު ކާމިޔާބުކުރެއްވީ އެމްޑީޕީ ކެންޑިޑޭޓު އާދަމް އާޒިމެވެ.
ވަގުތީ ނަތީޖާއިން ދައްކާ ގޮތުން އާޒިމަށް 44.8 ޕަސެންޓު ވޯޓު ލިބިވަޑައިގެންފައި ވާއިރު ދެވަނައަށް އެންމެ ގިނަ ވޯޓު ހޯއްދެވި ކުރީގެ ބަންޑާރަ ނައިބު އަދި ރައީސް އޮފީހުގެ މިނިސްޓަރު، އާޒިމާ ޝަކޫރަށް ލިބިވަޑައިގެންނެވީ 29.6 ޕަސެންޓެވެ.
މާލޭ މޭޔަރުގެ ގޮނޑި ހުސްވީ، އެ މަގާމުގައި ކުރިން ހުންނެވި މާލެ ސިޓީގެ ފުރަތަމަ އިންތިހާބީ މޭޔަރު ޑރ. މުހައްމަދު މުއިއްޒު ރައީސުލްޖުމްހޫރިއްޔާ ކަމަށް އިންތިހާބުވެވަޑައިގަތުމާ ގުޅިގެންނެވެ.
