ކަރަންޓު ބޭނުން ކުރާ މިންވަރު އެންމެ ބޮޑަށް އިތުރުވެގެންދާ ހޫނު މޫސުމުގެ ދުވަސްވަރާ ދިމާކޮށް، މެދުނުކެނޑި ކަރަންޓު ލިބޭނެ މަގު ފަހިކޮށްދިނުމުގެ މަގުސަދުގައި ދެ ޖަނަރޭޓަރު ސެޓު ސްޓެލްކޯއިން މިއަދު ގެނެސްފި އެވެ.
ސްޓެލްކޯއިން އެކްސް ގައި ކުރި ޕޯސްޓެއްގައި ބުނީ މި އަހަރުގެ ޕީކް ސީޒަނަށް (ހޫނު މޫސުމަށް) ތައްޔާރުވުމަށްޓަކައި، ގެނައުމަށް ހަމަޖެހިފައިވާ ޖެނަރޭޓަރު ސެޓްތަކުގެ ތެރެއިން 1.6 މެގަވޮޓްގެ ދެ ހައިސްޕީޑް ކޮންޓެއިނާ ޖަނަރޭޓަރު ސެޓް ރާއްޖެ ގެނެވި، ބެހެއްޓުމުގެ މަސައްކަތް ފަށާފައިވާ ކަމަށެވެ. މީގެ އިތުރު ދެ ސެޓު ގެންނަން ހަމަޖެހިފައި ވާއިރު، މި ހަތަރު ސެޓާއެކީ ޖުމްލަ 6.4 މެގަވޮޓުގެ ކަރަންޓު އިތުރަށް އުފެއްދޭނެ ކަމަށް ސްޓެލްކޯއިން ބުންޏެވެ.
މިކަމާ ގުޅޭގޮތުން ކުންފުނީގެ މެނޭޖިން ޑިރެކްޓަރު ހުސެއިން ފަހުމީ އެކްސްގައި ވިދާޅުވީ ސްޓެލްކޯ އަބަދުވެސް ދެމި އޮންނާނީ ރައްޔިތުންނަށް ފުރިހަމަ ހިދުމަތެއް ފޯރުކޮށް ދިނުމުގައި ކަމަށެވެ. އަދި ކުރިއަށް އެ ކުންފުނިން ހިންގަން ރާވާފައިވާ މާލެ ސަރަހައްދުގެ ބިޔަ ޕަވާ ޕްރޮޖެކްޓު، ސިކްސްތު ޕަވާ ޑިވެލޮޕަމަންޓުގެ އަމަލީ މަސައްކަތް ދާދި އަވަހަށް ފެށިގެން ދާނެ ކަން ވެސް ހާމަކުރެއްވި އެވެ.
"އިރާދަކުރެއްވިއްޔާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ޒައާމަތުގައި ރާއްޖޭގައި ހިންގޭ އެންމެ ބޮޑު ޕަވަރ ޕްރޮޖެކްޓް، ސިކްސްތު ޕަވާ ޑިވެލޮޕްމަންޓް ޕްރޮޖެކްޓްގެ ޢަމަލީ މަސައްކަތް ވަރަށް އަވަހަށް ފަށައިގަނެވި، އިންގިލާބީ ހެޔޮ ބަދަލެއް ރާއްޖޭގެ ކަރަންޓުގެ ސިނާއަތައް އަޅުގަނޑުމެން މި ވެރިކަމުގައި ގެންނާނަން" ފަހުމީ ވިދާޅުވި އެވެ.
ކުރިއަށް އޮތީ ރޯދަ މަސް ކަމަށްވާއިރު، ރޯދަ މަހަކީ ކަރަންޓު ބޭނުން ކުރާ މިންވަރު ނިސްބަތުން އިތުރުވާ ދުވަސްވަރަކެވެ. މިފަހަރުގެ ހޫނު މޫސުމުގެ ދުވަސްވަރު ވެސް އިއްތިފާގު ވަނީ ރޯދަ މަހާ އެވެ. ސްޓެލްކޯއިން ބުނި ގޮތުގައި މިހާރު މާލޭ ސަރަހައްދުގައި ޕީކު ޑިމާންޑަކީ 117 މެގަވޮޓެވެ.
ސްޓެލްކޯގެ މިހާރުގެ މެކްސިމަމް ކެޕޭސިޓީއަކީ 122 މެގަވޮޓެވެ. ކޮންޓެއިނަރު ޖަނަރޭޓަރު ސެޓުތަކާ އެކީ ކެޕޭސިޓީ 128 މެގަވޮޓަށް އުފުލާލެވޭނެ އެވެ. ކުރިން "އަދަދު"އަށް ދެއްވި އިންޓަވިއުއެއްގައި ފަހުމީ ވަނީ މިހާރު ހުރި ކެޕޭސިޓީގައި، ޖަނަރޭޓަރަކަށް މައްސަލައެއް ދިމާވެއްޖެ ހާލަތެއްގައި ކަރަންޓު ކަނޑާނުލައި ނުވާނެ ކަމަށް ވިދާޅުވެފަ އެވެ.
ނަމަވެސް މި ޖަނަރޭޓަރުތައް ގެނެވުމުން 24 ގަޑިއިރު ކަރަންޓުގެ ހިދުމަތް މެދުނުކެނޑި ދެވޭނެ ކަމަށް ސްޓެލްކޯއިން ބުނެފައިވެ އެވެ.
