މެޑްރިޑް (ޖެނުއަރީ 13) - ރެއާލް މެޑްރިޑުން ފުރުސަތު ނުލިބުނު ކަމުގައި ވިޔަސް އަންނަ ސީޒަނުގައި އަލުން ޗެލްސީ އަށް ދާން ސްޕެއިންގެ ކީޕަރު، ކެޕާ އަރިއްޒަބަލާގާ ބޭނުންނުވާ ކަމަށް ރިޕޯޓްތައް ބުނެފި އެވެ.
އެއް އަހަރުގެ ލޯނެއްގައި ރެއާލުން ކެޕާ، 29، ގެންނަން ނިންމީ ރެއާލްގެ އެއް ވަނަ ކީޕަރު ތިބައު ކޯޓުއާ އަށް އަނިޔާވުމާ ގުޅިގެންނެވެ. ރެއާލާ އެކު ކެޕާ ސޮއިކުރި އެއްބަސްވުން އޮތީ މި އަހަރުގެ ޖޫން މަހުގެ ނިޔަލަށެވެ. އެ ކޮންޓްރެކްޓްގައި ރެއާލުން ބޭނުންނަމަ ދާއިމީކޮށް ކެޕާ އެ ޓީމުގައި ބަހައްޓަން ދައްކަންޖެހޭނެ ފީއެއް ހިމަނައިފައިނުވެ އެވެ.
އެހެންކަމުން، ކެޕާ އަށް މި ސީޒަނަށް ފަހު އިތުރު ފުރުސަތެއް ރެއާލުން ދޭނަމަ ޗެލްސީއާ އެކު އާ ޑީލެއް މަޝްވަރާ ކުރަން ޖެހޭނެ އެވެ.
ރިޕޯޓްތައް ބުނާގޮތުން، ރެއާލުން ވިސްނަނީ ކޯޓުއާގެ ދެ ވަނަ ކީޕަރެއްގެ ގޮތުގައި، ރެއާލްގައި މި ވަގުުތު ހުރި ޔޫކްރެއިންގެ ކީޕަރު އަންޑްރީ ލުނިން ބަހައްޓާށެވެ. ރެއާލްގެ ކޯޗު ކާލޯ އަންޗެލޮޓީ މި ވަގުތު ޗެމްޕިއަންސް ލީގާއި ސްޕެނިޝް ލީގުގެ މެޗުތަކުން ފުރުސަތު ދެނީ، ލުނިން އަށެވެ. ކެޕާ އަށް ކިރިޔާ ވެސް ފުރުސަތެއް އޮތީ، ސްޕެނިޝް ކަޕް މެޗުތަކުންނެވެ.
ރެއާލުން ބޭނުންނުވެއްޖެނަމަ ކެޕާ އަށް ޖެހޭނީ އަލުން ޗެލްސީ އަށް ދާށެވެ.
އެކަމަކު، ސްޕެއިންގެ މީޑިއާ ރިޕޯޓްތައް ބުނާގޮތުން، ކެޕާގެ ވިސްނުމަކީ ޗެލްސީ އަށް ނުގޮސް އެހެން ޓީމެއް ހޯދުމަށެވެ. އަދި އެންމެ ބޮޑަށް އިހުތިޔާރުކުރާނީ ސްޕެނިޝް ލީގުގެ ޓީމަކަށް ބަދަލުވުމަށެވެ.
އެތުލެޓިކް ބިލްބާއޯ ދުކޮށް، 2018 ވަނަ އަހަރު ކެޕާ، ޗެލްސީ އަށް ބަދަލުވީ އެ ވަގުތު ދުނިޔޭގެ އެންމެ އަގުބޮޑު ކީޕަރުގެ ގޮތުގަ އެވެ. އެއީ، 90 މިލިއަން ޑޮލަރުގެ ފީ އަކަށެވެ.
