ރާއްޖޭގެ އިރުމަތީގައި އުފެދިފައިވާ ކޮޅިގަނޑެއް ރާއްޖެ ހުރަސްކޮށް އަރަބި ކަނޑަށް ޖެހެމުންދާތީ މި ތިން ދުވަހު މޫސުން ގޯސްވާނެކަމަށް ލަފާކޮށްފައި ވަނިކޮށް މޫސުން ގޯސްވެ، މާލެ އަތޮޅުން ފެށިގެން ދ. އަތޮޅާ ހަމައަށް ޔެލޯ އެލާޓް ނެރެފި އެވެ.
މޫސުމާ ބެހޭ އިދާރާއިން ނެރުނު އެލާޓްގައިވާ ގޮތުން މި ސަރަހައްދަށް ގަދަވަޔާއި ގުގުރާ ވިދުމާ އެކު ބޯކޮށް ވާރޭ ވެހޭނެކަމަށް ލަފާކޮށްފި އެެވެ. އެލާޓްގައިވާ ގޮތުން ވިލާގަނޑުގައި ގަޑިއަކު 40 މޭލަށް ވައިގަދަވާނެ އެވެ.
މޫސުން ލަފާކުރެވޭ ގޮތް ހާމަކޮށް، މެޓް އޮފީހުން ރޭ ސޯޝަލް މީޑިއާގައި ޖެހި ޕޯސްޓެއްގައި ބުނީ ކުރިއަށް އޮތް ތިން ދުވަހު މޫސުން ގޯސްވާނެ ކަމަށް ބެލެވެނީ ރާއްޖޭގެ އިރުމަތީގައި އުފެދިފައިވާ ކޮޅިގަނޑެއް ރާއްޖެ ހުރަސްކޮށް އަރަބި ކަނޑަށް ޖެހެމުންދާތީ ކަމަށެވެ.
މޫސުން ގޯސްވާނެ ކަމަށް ބެލެވޭތީ އެ ކަމަށް ސަމާލުވުމަށް މެޓް އޮފީހުން އިލްތިމާސްކުރެ އެވެ.
"ކުރިއަށް އޮތް ތިން ދުވަހު ރާއްޖޭގެ އެކި ހިސާބަށް ވިއްސާރަކޮށް، ވައިގަދަވެ، ކަނޑުތައް ގަދަވާނެ ކަމަށް ލަފާކުރެވޭ، ވީމާ މޫސުމަށް ސަމާލުވުން އެދެން،" މެޓް އޮޮފީހުގެ ޓުވީޓުގައި ލިޔެފައިވެ އެވެ.
ކަނޑު ގަދަވެ، މޫސުން ގޯސް ދުވަސްތަކުގައި ދަތުރުކޮށްގެން ވަރަށް ހިތާމަވެރި ހާދިސާތައް ކުރިމަތިވެފައިވެ އެވެ. އެފަދަ ބައެއް ހާދިސާތަކުގައި މީހުންގެ ފުރާނަ ގެއްލި، ހަށިގަނޑަށް ބޮޑެތި ޒަހަމްތައް ވެސް ލިބިފައި އެބަ ހުއްޓެވެ.
