އެކްސްގައި ކާކުކަން ނޭނގޭ ގޮތަށް ސަރުކާރަށް ފާޑުކިޔައި އެކި ތުހުމަތުތައް ކުރަމުންދާ "ހަސަން ކުރުސީ"ގެ އެކައުންޓު ހިންގަނީ ކުރީގެ ރައީސް މުހައްމަދު ނަޝީދުގެ ދަރިކަނބަލުން މީރާ ލައިލާ ނަޝީދު ކަމަށް ދެކެވޭ ވާހަކަތައް އެމަނިކުފާނު ދޮގުކުރައްވައިފި އެވެ.
ރައީސް ނަޝީދު ދެންމެ ކުރެއްވި ޓްވީޓެއްގައި ވިދާޅުވީ ކުރުސީގެ އެކައުންޓަކީ އެމަނިކުފާނުގެ ދަރިކަނބަލުން މީރާ ހިންގާ އެކައުންޓެއްކަމަށް ދެކެވޭ ވާހަކައަކީ ދޮގެއް ކަމަށެވެ. އަދި އެމަނިކުފާނަކީ އެންޓި-އިންޑިއާ ކެމްޕޭންތަކާ ދެކޮޅު މީހެއް ކަމަށް ވެސް ވިދާޅުވި އެވެ.
އިންޑިއާގެ ޖަޒީރާ އަތޮޅެއްގެ ގޮތުގައި އޮންނަ ލަކްޝަދީޕް އަށް މޯދީ ކުރެއްވި ޒިޔާރަތުގެ ވީޑިއޯއަކާއެކު އިންޑިއާ މީހަކު ޖެނުއަރީ 4، ގައި އެކްސްގައި ކުރި ޕޯސްޓަކަށް، ރާއްޖޭގެ ތިން ޑެޕިއުޓީ މިނިސްޓަރުން ކޮށްފައިވާ ރިޕްލައިތަކަކާ ގުޅިގެން ރާއްޖެއާ ދެކޮޅަށް އިންޑިއާގެ ސޯޝަލް މީޑިއާ އެކްޓިވިސްޓުންނާއި ބޮލީވުޑްތަރިން ހިމެނޭ ގޮތަށް ވަނީ ކެމްޕޭނެއް ފަށާފަ އެވެ.
މި ކެމްޕޭނާ ގުޅިގެން ކުރުސީގެ އެކްގައި އެކައުންޓުން ރާއްޖެ ދިފާއުކޮށް އިންޑިއާއަށް ފާޑުކިއުންތައް އަމާޒުކުރުމާއި ގުޅިގެން، ކުރިން ދިވެހި ސަރުކާރުން ވެސް ކާކުކަން ކަށަވަރުކުރުމަށް މަސައްކަތް ކުރި ކުރުސީ ހިންގަނީ ކާކުކަން ބަލާނެކަމަށް އިންޑިއާގެ ބައެއް އެކްޓިވިސްޓުން ބުނެފައި ވެއެވެ.
ކުރުސީގެ އެކައުންޓު ހިންގަނީ އިނގިރޭސިވިލާތުގައި ހުރި މީހަކު ކަމަށް ވެސް ބައެއް މީހުން ބުނެފައި ވެއެވެ. އެހިސާބުން އެއީ މީރާ ހިންގާ އެކައުންޓެއް ކަމަށް އެއް ބަޔަކު ތުހުމަތުކުރި އެވެ.
ރާއްޖެއާ ދެކޮޅަށް އިންޑިއާގައި ކެމްޕޭނާއެކު ރާއްޖޭގެ ޓޫރިޒަމް އިންޑަސްޓްރީން ވަނީ ކަންބޮޑުވުން ވެސް ފާޅުކޮށްފަ އެވެ.
މައްސަލަ ހޫނުވެފައި ވަނިކޮށް އިންޑިއާގައި ހުންނަވާ ރާއްޖޭގެ އެމްބަސެޑަރު ވަނީ އިންޑިއާގެ އެކްސްޓާނަލް އޮފީހަށް ހާޒިރުކޮށްފަ އެވެ. އަދި ރާއްޖޭގައި ހުންނަވާ އިންޑިއާގެ އެމްބަސެޑަރު ވެސް ވަނީ ރާއްޖޭގެ ފޮރިން މިނިސްޓަރީއަށް ހާޒިރުކޮށްފަ އެވެ. ނަމަވެސް އެ ދެ ބައްދަލުވުމުގެ ތަފުސީލެއް މިހައިތަނަށް އެއްވެސް ފަރާތަކުން ރަސްމީކޮށް ހާމަކޮށްފައެއް ނުވެ އެވެ.
