މަސްވެރިންނަށް ނުދެވި ހުރި ފައިސާގެ ރަނގަޅު މިންވަރެއް މިމަހު 10 ގެ ކުރިން ދިނުމަށް މަސައްކަތް ކުރަމުންދާ ކަމަށް ފިޝަރީޒް މިނިސްޓަރު، އަހުމަދު ޝިޔާމް ވިދާޅުވެއްޖެ އެވެ.
މިއަދު ކުރިއަށް ގެންދިޔަ ވަޒީރުންގެ ބައްދަލުވުން ނިންމަވާލެއްވުމަށް ފަހު ރައީސް އޮފީސް ބޭރުގައި ހުންނަވައި "އަދަދު" އަށް ޝިޔާމް ވިދާޅުވީ މި ވަގުތަކީ ދައުލަތަށް މާލީ ދަތިކަން ވަރަށް ބޮޑު ދުވަސްވަރެއް ކަމަށާއި ނޮވެމްބަރު 15 ވަނަ ދުވަހުން ފެށިގެން މަސްވެރިންނަށް ފައިސާ ނުދެވޭ ކަމަށެވެ.
"އިރާދަކުރެއްވިއްޔާ [މި މަހު] 10 ގެ ކުރިން މަސްވެރިންނަށް ނުދެވި ހުރި ފައިސާގެ ހަމަ ރަނގަޅު އަދަދެއް ދެވޭތޯ އެބަ މަސައްކަތް ކުރޭ މިފްކޯއިން،"
މަސްވެރިންގެ އަތުން މަސް ގަންނަ އަގާ އެކީގައި ސަބްސިޑީގެ ގޮތުގައި ދައުލަތުން ވަރަށް ބޮޑު އެއްޗެއް ދޭންޖެހޭކަން ފާހަގަ ކުރައްވައި ޝިޔާމް ވިދާޅުވީ ކޮންމެ މަހަކު ވެސް މަސްވެރިންނަށް ފައިސާ ދެނީ ފިނޭންސް މިނިސްޓަރީގެ އެހީތެރިކަމާ އެކީގައި ކަމަށެވެ.
މަސްވެރިންނަށް ނުދެވި ހުރި ފައިސާގެ މިންވަރެއް މި މަހުގެ ތެރޭގައި ދިނުމަށް ސަރުކާރުގެ މަސް ކުންފުނި، މިފްކޯއާ އެކުގައި ފިނޭންސް މިނިސްޓަރީން ވެސް މަސައްކަތް ކުރައްވާ ކަމަށް ޝިޔާމް ވިދާޅުވި އެވެ.
މިފްކޯއަށް ކިރުވާ މަހަށް ފައިސާ ނުލިބޭތާ ދެމަހަށް ވުރެ ގިނަ ދުވަސް ވެފައިވާ ކަމަށް ބުނެ ގިނަ އަދަދެއްގެ މަސްވެރިން ވަނީ ކަންބޮޑުވުން ފާޅުކޮށްފަ އެވެ. އޭގެތެރޭގައި ހއ. އިހަވަންދޫ މަސްވެރިންގެ ޖަމިއްޔާ އާއި ތ. ގުރައިދޫ މަސްވެރިންގެ ޖަމިއްޔާގެ އިތުރުން ތ. ހިރިލަންދޫ މަސްވެރިންގެ ޖަމިއްޔާއިން ވެސް ވަނީ ކަންބޮޑުވުން ފާޅުކޮށްފަ އެވެ.
މި ސަރުކާރުން ވެރިކަމާ ހަވާލުވި އިރު މަސްވެރިންނަށް ނުދީ އޮތް 200 މިލިއަން ރުފިޔާގެ ތެރެއިން 190 މިލިއަން ރުފިޔާ ދީފައިވާ ކަމަށް، މިނިސްޓަރު ޝިޔާމް މިދިޔަ މަސްވެރިންގެ ދުވަހު (10 ޑިސެމްބަރު) ގައި ވިދާޅުވިއިރު، 140 މިލިއަން ރުފިޔާ ނުދެވި އޮތް ކަމަށް ރައީސް ޑރ. މުހައްމަދު މުއިއްޒު ހަމަ އެ ދުވަހު ވިދާޅުވި އެވެ.
