ދިވެހި އަސްކަރިއްޔާގެ އެންލިސްޓެޑް ސިފައިންގެ އެންމެ އިސް މަގާމު ކަމުގައިވާ "ސާޖަންޓް މޭޖާ އޮފް އެމްއެންޑީއެފް" ގެ މަގާމު އަދާކުރައްވާފައިވާ ކޮމާންޑް ސާޖަންޓް މޭޖާ އަހުމަދު އަބްދުﷲ، ސިފައިންގެ ހިދުމަތުން ޝަރަފުވެރިކަމާއެކު ރިޓަޔާ ކުރައްވައިފި އެވެ،
އޭނާ ވަނީ 31 އަހަރަށް ވުރެ ގިނަ ދުވަހު ސިފައިންގެއަށް ހިދުމަތް ކުރައްވާފަ އެވެ. އޭނާ އެންމެ ފަހުން ހުންނެވީ އިސްލާމިކް މިލިޓަރީ ކައުންޓާ ޓެރަރިޒަމް ކޯލިޝަން ސެންޓަރުގައި ދިވެހި އަސްކަރިއްޔާ ތަމްސީލު ކުރައްވާ މެމްބަރެއްގެ ގޮތުގަ އެވެ.
އިލެކްޓްރިކަލް އެންޑް މެކޭނިކަލް އިންޖިނިއާސްއިން ސިފައިންގެ ހިދުމަތް ފެއްޓެވި ކޮމާންޑް ސާޖަންޓް މޭޖާ އަހުމަދު އަބްދުﷲ ދިވެހި އަސްކަރީ ހިދުމަތުގައި ވަރަށް ގިނަ ތަމްރީނުތަކެއް ފުރިހަމަ ކުރައްވާފައިވާ ކަން އެމްއެންޑީއެފް އިން ފާހަގަ ކުރެ އެވެ.
އޭގެ ތެރޭގައި، އިންޑިއާއިން ފުރިހަމަ ކުރެއްވި އިލެކްޓްރިކަލް އިންޖިނިއަރިން ކޯސް، ދިވެހިރާއްޖެ އިން ފުރިހަމަ ކުރެއްވި ސްޕެޝަލް ޓާސްކް ފޯސް ޓްރޭނިން، ޑްރިލް އިންސްޓްރެކްޓަރ ކޯސް، ފިޒިކަލް އިންސްޓްރެކްޓާ ކޯސް، ބެލެންސް މެޓެލް އަދި އެންސީއޯ އެޑްވާންސް ކޯސް ފާހަގަކުރެވެ އެވެ.
ސްޓްރެޓެޖިކް މެނޭޖްމަންޓްގެ ދާއިރާއިން ޕޯސްޓް ގްރެޖުއޭޓް ޑިޕްލޮމާ ހާސިލްކުރައްވާފައިވާ ކޮމާންޑް ސާޖަންޓް މޭޖާ އަހުމަދު އަބްދުﷲ، ރާއްޖެއިން ބޭރުގައި ބޭއްވި ތަފާތު ގިނަ ސިމްޕޯޒިއަމްތަކާއި ކޮންފަރެންސްތަކުގައި ދިވެހި އަސްކަރިއްޔާ ތަމްސީލުކޮށް ދީފައިވާކަން އެމްއެންޑީއެފްއިން ފާހަގަކުރެ އެވެ.
"ކޮމާންޑް ސާޖަންޓް މޭޖާ އަހުމަދު ޢަބްދުﷲ އަކީ ސިފައިންގެ ތަފާތު ދާއިރާތަކުގައި ޚިދުމަތްކުރައްވައި، ވަރަށް މުހިންމު އެޕޮއިންޓްމަންޓެއް ފުރުއްވާފައިވާ ނަމޫނާ ސީނިއަރ އެންލިސްޓެޑް ލީޑަރެއް،" ގައުމީ ދިފާއީ ބާރު އިން ބުނެފައިވެ އެވެ.
