ވެރި ރަށް މާލެއަށް ރެއިން ފެށިގެން ވެހެމުން އަންނަ ވާރޭގައި މުޅި ރަށް ފެންބޮޑުކޮށްލައި، މީހުންނަށް ހިނގާބިނގާވެ އުޅުމަށް ދަތިވެއްޖެ އެވެ.
މުޅި ރާއްޖެއަށް ވެސް މި ދުވަސްވަރު މޫސުން ގޯސްއިރު، މެދުރާއްޖެތެރެއަށް މެޓު އޮފީހުން ވަނީ ޔެލޯ އެލާޓެއް ނެރެފަ އެވެ.
ރެެއިން ފެށިގެން ހުއްޓާނުލާ ވެހެމުން އަންނަ ވާރޭގައި މާލޭގެ ހުރިހާ ބޮޑެތި މަގުތަކެއް އޮތީ ފެނު އަޑީގަ އެވެ. އެގޮތުން މަޖީދީމަގާއި އަމީނީ މަގާއި ޗާންދަނީ މަގާއި ބޮޑުތަކުރުފާނުގެ މަގުގެ ބޮޑު ސަރަހައްދެއް އޮތީ ފެނު އަޑީގަ އެވެ.
ގާތްގަނޑަކަށް 212,138 މީހުން މާލޭގައި ދިރިއުޅެމުންދާއިރު، ފެންބޮޑުވުމުގެ ސަބަބުން ވެހިކަލް ދުއްވުމާއި ހިނގާބިނގާވެ އުޅުމަށް ވަނީ ދަތިވެފަ އެވެ. ބައެއް ސަރަހައްދުތަކުގައި ޕާކުކޮށްފައި ހުރި ސައިކަލުތަކުގެ އިންޖީނާ ހަމައަށް އޮތީ ފެން ބޮޑުވެފަ އެވެ.
އަލަށް ހެދި އަމީނީ މަގުގެ ސަރަހައްދެއްގައި ފެން ބޮޑުވެފައި: ފެންބޮޑުވެފައިވާތީ ވެހިކަލްތައް ދުއްވުމަށް ވަނީ ދަތިވެފައި -- ފޮޓޯ: އަބްދުﷲ އިޔާން / އަދަދު
ފެންބޮޑުވުމުގެ ސަބަބުން ބައެއް ސަރަހައްދުތަކުގައި ހުރި ސައިކަލުތައް ހުރީ މަގުމައްޗަށް ވެއްޓިފަ އެވެ. ބައެއް ސައިކަލުތައް ހުރީ އިންޖީނަށް ފެން އެޅުމާއި އެހެން މައްސަލަތައް ދިމާވެގެން ހުއްޓިފަ އެވެ.
އާންމު ދުވަސްތަކާ ހިލާފަށް މަގުމަތި ވެސް ފެންނަނީ ވަރަށް ބޮޑަށް ހުސްކޮށެވެ. ގިނައިން ބޭރަށް ނުކުމެ އުޅެނީ ޒަރޫރީ ބޭނުންތަކުގައި ކޮންމެހެން ނުކުންނަންޖެހޭ މީހުން ކަމަށް ބެލެވެ އެވެ.
މާލޭ މަގުތަކުން ފެން ހިންދުމަށް ސިފައިންގެ ފަޔާ އެންޑް ރެސްކިއު ޑިޕާޓްމަންޓުން ދަނީ ހަރަކާތްތެރިވަމުންނެވެ. ނަމަވެސް ބޯކޮށް ވެހޭ ވާރޭ ނުހުއްޓާތީ މަސައްކަތުގެ މާ ބޮޑު ނަތީޖާއެއް އަދި ނުފެނެ އެވެ.
ފެން ބޮޑުވެފައި އޮތް މަގަކުން މީހަކު ސައިކަލުގައި ދުއްވާފައި ދަނީ: ބައެއް ސައިކަލުތައް މަގުމައްޗަށް ވެއްޓިފައި ހުރިއިރު، ޕާކުކޮށްފައި ހުރި ސައިކަލުތަކުގެ އިންޖީނާ ހަމައަށް ބައެއް ސަރަހައްދުތަކުގައި ހުރީ ފެންބޮޑުވެފަ -- ފޮޓޯ: އަބްދުﷲ އިޔާން / އަދަދު
މެޓު އޮފީހުން ވަނީ ނ. އަތޮޅުން ފެށިގެން ލ. އަތޮޅާ ހަމައަށް ހަވީރު 5:00 ޖެހުމާ ހަމައަށް ޔެލޯ އެލާޓެއް ނެރެފަ އެވެ. މިދިޔަ ހަފުތާގައި މޫސުން ގޯސްވުމުގެ ސަބަބުން ފުވައްމުލައް އަދި އައްޑޫ ސިޓީއަށް މެޓު އޮފީހުން އޮތީ އޮރެންޖު އެލާޓެއް ނެރަފެ އެވެ. ވާރޭ ވެހުމުގެ ސަބަބުން ފުވައްމުލަކާއި އައްޑޫގެ ވަރަށް ގިނަ ގެތަކަށް ވަނީ ގެއްލުންވެފަ އެވެ.
ރާއްޖެއަށް ކުރަމުންދާ ވިއްސާރައިގައި ފ. ނިލަންދޫ، ކ. ގުރައިދޫ، ލ. ގަން އަދި ފޮނަދޫގައި ވެސް ފެންބޮޑުވެ ވަރަށް ގިނަ ގެތަކަށް ވަނީ ގެއްލުން ލިބިފަ އެވެ.
މިދުވަސްވަރު ކުރަމުން މިދާ ވިއްސާރަކީ އާންމުކޮށް ކޮންމެ އަހަރަކު ވެސް އިރުވައި މޫސުން ފެށޭ ދުވަސްވަރަކު ކުރާ ވިއްސާރައެއް ކަމަށާއި، މި އަހަރު މޫސުން ރަނގަޅު ނުވެ ދިގުލައިގެން ގޮސްފައި ވަނީ މި ސަރަހައްދާއި އަރަބި ކަނޑުގައި އުފެދިފައިވާ ކުދި ކޮޅިގަނޑުތަކުގެ ސަބަބުން ކަމަށް މެޓް އޮފީހުން ބުނެ އެވެ.
މިއަދަކީ އިރުވައި މޫސުމުގެ ދެ ވަނަ ނަކަތް ކަމުގައިވާ ފުރަހަޅަ ނަކަތުން ނުވައެކެވެ. މި ނަކަތް ނިމޭނީ ޖެނުއަރީ 5، 2024 ގަ އެވެ.
