ދަ ޑިމޮކްރެޓްސްގެ ކެންޑޭޓް ސައިފު ފާތިހު (އައިކޮ) އަށް މޭޔަރުކަން ލިބިއްޖެނަމަ، ދަތި މަގުތަކުން ދޫކޮށްފައި ހުރި ޕްރައިވެޓް ޕާކިން ސްލޮޓްތައް ނަގާނެ ކަމަށް ވިދާޅުވެއްޖެ އެވެ.
މޭޔަރުކަމުގެ ބަހުސްގައި މާލޭގެ މަގުތަކުގެ ހާލަތު ރަނގަޅުކޮށް ޓްރެފިކް އަދި ޕާކިން ނިޒާމަށް ގެންނާނެ ބަދަލުތަކާއި ގުޅޭ ގޮތުން ސުވާލު ކުރުމުން މާލޭގެ ޕާކިން އަދި ޓްރެފިކް ހާލަތު ރަނގަޅު ކުރުމަށް ކުރާ މަސައްކަތުގެ ތެރެއިން، ޕްރައިވެޓް ޕާކިން ސްކީމް ނުވަތަ ޕާކިން ސްލޮޓް ދޫކުރުމަށް ހާއްސަކޮށްފައި އޮތް ސްކީމް ރިވިއު ކުރާނެ ކަމަށް ވިދާޅުވި އެވެ.
އެގޮތުން، މައި މަގުތަކާއި ސްކޫލްތަކާއި ހޮސްޕިޓަލާއި ކްލިނިކްތައް އަދި ސަރުކާރު އޮފީސްތައް ކައިރިން، ދަތި ދޭތެރެތަކުން ދޫކޮށްފައި ހުރި ޕްރައިވެޓް ޕާކިން ސްލޮޓްތައް ނަގާނެ ކަމަށް ސައިފު އިއުލާން ކުރެއްވި އެވެ.
"ޕާކިން ސްލޮޓްތަކަށް އެދިފައި ހުރި މީހުންނާއި، ސްލޮޓްތައް ދޫކޮށްފައި ހުރީ ކޮން ބަޔަކަށް ކިހާ މުއްދަތަކަށް ކަން އެނގޭނެހެން އެކަން ހާމަ ކުރާނަން، ހާމަ ލޮގެއްގައި ނޫނީ އެކަން ހިނގައިގެން ނުވާނެ، ކައުންސިލަށް މިހާރުވެސް ކޮރަޕްޝަންގެ ތުހުމަތުތައް އަމާޒުވެގެން ދަނީ ސިއްރިއްޔާތުގައި މިކަން ކުރާތީ،" ސައިފު ވިދާޅުވި އެވެ.
ސައިފުގެ ވާހަކައިގައި "ވެހިކަލް ކެރީން ކެޕޭސިޓީ" އަށް އަލިއަޅުވާލައި، ގާނޫނުގައި އޮތް ގޮތަށް ވަކި އަދަދަކަށް ވެހިކަލް ގެންގުޅުމުގެ އުސޫލަށް އަމަލު ކުރުން މުހިންމުކަން ފާހަގަކުރެއްވި އެވެ. އެހެންނަމަވެސް މިހާތަނަށް އައިއިރު، އެކަން އެގޮތަށް ނުވެ އޮތީ ވަކި ސަބަބުތަކެއް ހުރެގެން ކަން، ސައިފު ފާހަގަކުރެއްވި އެވެ.
އެގޮތުން، ވިޔަފާރިވެރިންގެ މަސްލަހަތު އިސް ކުރުމާއި ސިޔާސީ ކޯޅުމަކީ ވެހިކަލް ގެންގުޅުމުގެ އަދަދު ހިފެހެއްޓުމެއް ނެތް ވަރަށް ދޫވެފައި އޮތް ސަބަބުތައް ކަމަށް ސައިފު ވިދާޅުވި އެވެ. މިހާރުވެސް މާލޭގައި 3،800 އެއްހާ ސައިކަލު އަދި 500 އަށްވުރެ ގިނަ ލޮރީ، ޕިކަޕު ގެންގުޅޭ ކަމަށް ސައިފު ވިދާޅުވި އެވެ.
"ޓެކްސީ އަދި ބޮޑެތި ވެހިކަލް މާލޭގައި ޕާކް ކުރުން ހުއްޓާލަން ޖެހޭ، މިއޮތީ ހުޅުމާލެއާ ގުޅިފައި ބުރިޖަކުން، ހުޅުމާލޭގައި ބައިވަރު ހުސް ލޮޓްތައް އެބަހުރި، ކީއްކުރަންތޯ ދެ ޓަނުގެ، 4 ޓަނުގެ ޕިކަޕުތަކާއި އެތައް ކާރުތަކެއް މާލޭގެ މިއޮށް ކުޑަ ޖާގައިގައި ގެންގުޅެންވީ، ބަރު ވެހިކަލް ޕާކު ކުރުން ހުޅުމާލެއަށް ބަދަލު ކުރަން ޖެހޭ،" ސައިފު ވިދާޅުވި އެވެ.
އޭގެ އިތުރުން، ސްޓްރީޓް ޕާކިން ނުވަތަ މަގުތަކުގައި ޕާކު ކުރުން ވީހާ ވެސް މަދު ކުރުމަށް ކުރެވޭނެ ކަންކަމަށް އޭނާ އަލުއަޅުވާލި އެވެ. އެގޮތުން، މަގަށް ހުންނަ ގޯތިތަކާއި އިމާރާތަތްތައް ސިޓީ ކައުންސިލަށް ކުއްޔަށް ނެގޭނެ ގޮތްތަކެއް ބަލަން ޖެހޭ ކަމަށް ސައިފު ވިދާޅުވި އެވެ.
މިހާރުގެ ރައީސް ޑރ. މުހައްމަދު މުއިއްޒު މޭޔަރުކަމުގައި ހުންނެވި އިރު 10 ސަރަހައްދެއްގައި މަލްޓި ޕާކިން ސިސްޓަމް ގާއިމް ކުރުމަށް ރާވާފައިވާކަން ވެސް ސައިފު ފާހަގަކުރެއްވި އެވެ.
އެ މަސައްކަތް ނިމިގެން ދާއިރު، މާލޭގެ މަގުތަކުގެ ހާލަތަށް އެދެވޭ ހެޔޮ ބަދަލުތަކެއް އަންނާނެ ކަމަށް ސައިފު ވިދާޅުވި އެވެ.
މާލެ ސިޓީގެ މޭޔަރު ހޮވުމަށް ބާއްވާ އިންތިހާބު އޮންނާނީ އަންނަ ޖެނުއަރީ 13، ގަ އެވެ.
