އާ ސަރުކާރުގެ ވަޒީރުންނަށް ރުހުން ދޭން, ރައްޔިތުންގެ މަޖިލީހުގެ ދައުރުން ބޭރު ޖަލްސާއެއް ބާއްވަން އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ހުށަހަޅަން ނިންމައި, އެކަމަށް ބޭނުންވާ ސޮއި ހަމަކުރަން ފަށައިފި އެވެ.
މަޖިލީހުގެ ގަވައިދުގައިވާ ގޮތުން ދައުރުން ބޭރު ޖަލްސާއެއް ބާއްވަން، މަޖިލީހުގެ ތިންބައިކުޅަ އެެއްބައި މެމްބަރުން އެދިވަޑައިގެންފި ނަމަ 14 ދުވަހެ ތެރޭގައި އެ ޖަލްސާ ބާއްވަން ޖެހެ އެވެ.
ވަޒީރުންނަށް ރުހުން ދޭން ހާއްސަ ޖަލްސާއެއް ބާއްވަން ބޭނުންވާ އަދަދަށް މެމްބަރުންގެ ސޮއި ހަމަކުރަމުންދާ ކަމަށް އެ ޕާޓީގެ ސީނިއާ މަޖިލިސް މެމްބަރަކު "އަދަދު" ނޫހަށަ ކަށަވަރު ކޮށްދެއްވި އެވެ. ނަމަވެސް, އަދި އެފަދަ ޖަލްސާއެއް ބާއްވަން މަޖިލިސް އިދާރާއަށް ހުށަހަޅާފައިވާކަން އެނގިފައި ނުވެ އެވެ.
އެ ޕާޓީން އެގޮތަށް ނިންމީ ސަރުކާރުގެ މަސްއޫލިއްޔަތު އަދާ ކުރާ މިންވަރު ބަލާ ކޮމިޓީން މިއަދު, ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓުގައި ހިމެނިވަޑައިގަންނަވާ 22 ވަޒީރުންނަށް ވެސް ރުހުން ދޭން ފެންނަ ކަމަށް ފާސް ކުރުމުންނެވެ.
ވަޒީރުންނަށް ރުހުން ދިނުމުގެ މައްސަލަ އެ ކޮމިޓީން ކުރިން ނިންމައި ތަޅުމަށް ފޮނުވި ނަމަވެސް، ރިޔާސަތުން ނިންމީ ކޮމިޓީން ރިޕޯޓު ފާސްކޮށްފައި އޮތީ މަޖިލީހުގެ ގަވައިދާ އެއްގޮތަށް ނޫން ކަމަށެވެ. އެހެންވެ، މި މަހުގެ 18 ވަނަ ދުވަހު އެ މައްސަލަ އަނބުރާ ކޮމިޓީއަށް ފޮނުވީ އެވެ.
އެ ރިޕޯޓު އޭރު އަނބުރާ ފޮނުވައިލީ ރައީސް މުއިއްޒު އުފެއްދެވި ވުޒާރާތަކުގެ މެންޑޭޓު ގާނޫނު އަސާސީގެ 116 ވަނަ މާއްދާއާ އެއްގޮތަށް މަޖިލީހުން ފާސްކުރަން ފޮނުވާފައި ނެތުމުންނެވެ. މަޖިލީހުގެ ރިޔާސަތުން އެގޮތަށް ނިންމުމާއެކު، ވުޒާރާތަކުގެ މެންޑޭޓު ފާސްކުރަން މަޖިލީހަށް ފޮނުވި އެވެ.
އެހެންކަމުން މި މަހުގެ 28 ވަނަ ދުވަހު ރައްޔިތުންގެ މަޖިލީހުގެ މި ދައުރު ނިންމާ, މަޖިލިސް ޗުއްޓީއަށް ދިޔައީ ވަޒީރުންނަށް ރުހުން ދިނުމުގެ މަސައްކަތް ނުނިންމަ އެވެ.
