ޅ. ދިއްފުށިމާދޫ ކިޔާ ފަޅު ރަށަށް ދަތުރު ގޮސް އުޅުނު ބައެއްގެ ގައިމައްޗަށް އެރަށުގައި ހުރި އިމާރާތެއްގެ ފާރެއް ވެއްޓި އަނިޔާވެއްޖެ އެވެ.
އެމްއެންޑީއެފްއިން ބުނި ގޮތުގައި އެ ހާދިސާގެ ރިޕޯޓް ލިބިފައި ވަނީ ފަތިހު 5:19 ހާއިރު އެވެ. ފާރުވެއްޓުމުގެ ސަބަބުން ދެ މީހަކަށް އަނިޔާވެފައިވާ ކަމަށާއި އެއީ 57 އަހަރުގެ އަންހެނަކަށާއި، 27 އަހަރުގެ ފިރިހެނެއް ކަމަށް އެމްއެންޑީއެފުން ބުނެ އެވެ.
އަނިޔާވި މީހުން ވަނީ ކޯސްޓުގާޑުގެ އެހީގައި ނައިފަރުގައި ހުންނަ ޅ.އަތޮޅު ހޮސްޕިޓަލަށް ގެންގޮސްފަ އެވެ.
އެ ހޮސްޕިޓަލުން ބުނީ އަނިޔާވި ފިރިހެން މީހާއަށް މާ ބޮޑު ގެއްލުމެއް ލިބިފައެއް ނެތް ކަމަށެވެ. ނަމަވެސް އަންހެން މީހާއަށް ލިބުނު އަނިޔާތަކަށް އިތުރު ފަރުވާ ދިނުމަށް އޭނާ މާލެއަށް ގެގެނަައުމުގެ މަސައްކަތް ކުރަމުންދާ ކަމަށް އެ ހޮސްޕިޓަލުން ބުންޏެވެ.
އޭނާއަށް ލިބުނު އަނިޔާގެ ތަފްސީލެއް ހޮސްޕިޓަލުން ނުދެ އެވެ.
