ރައީސް ޑރ. މުހައްމަދު މުއިއްޒުގެ ކެބިނެޓުގައި ހިމެނޭ 22 ވަޒީރުންނަށް ރައްޔިތުންގެ މަޖިލީހުން ރުހުން ނުދިނަސް މައްސަލައެއް ނެތް ކަމަށް ވެރިކަންކުރާ ޕީއެންސީގެ ޗެއާޕާސަން އަދި ރައީސްގެ އިސް އެޑްވައިޒަރު އަބްދުއްރަހީމް އަބްދުﷲ މިރޭ ވިދާޅުވެއްޖެ އެވެ.
ވަޒީރުންނަށް ރުހުން ދިނުން މަޖިލީހުގައި މެޖޯރިޓީ އޮތް ޕާޓީ، އެމްޑީޕީން ދަނީ ލަސްކުރަމުންނެވެ. އަދި ރައީސުލްޖުމްހޫރިއްޔާ އާއި ނައިބު ރައީސް އަޒުލުކުރުން ފަސޭހަކޮށް މަޖިލީހުގެ ގަވާއިދު ވެސް ބަދަލުކޮށްފައި ވާއިރު، ރައީސް މުއިއްޒު އަދި ޕީއެންސީ އާއި ޕީޕީއެމްގެ އިސް ބޭފުޅުން ގެންދަވަނީ އެ މަނިކުފާނުގެ އިތުބާރު ނެތް ކަމުގެ މައްސަލަ މަޖިލީހަށް ވެއްދިޔަ ނުދިނުމަށް ނުވަތަ ފާސް ވިޔަ ނުދިނުމަށް އެމްޑީޕީގެ މެމްބަރުން ޕީއެންސީއަށް ބަދަލު ކުރެއްވުމަށް މަސައްކަތް ކުރައްވަމުންނެވެ. އެމްޑީޕީ އަށް ނިސްބަތްވާ 13 މެމްބަރަކު މިރޭ ވަނީ ޕީއެންސީއަށް ބަދަލުވެ ވަޑައިގެންފަ އެވެ.
އެ މެމްބަރުން ޕީއެންސީއަށް ގުޅުމާއި، ރިޔާސީ އިންތިހާބަށް ފަހު ޕީއެންސީ "ފެށުން" ނަމުގައި ދަރުބާރުގޭގައި ބޭއްވި ޖަލްސާގައި އަބްދުއްރަހީމް ވިދާޅުވީ، ވަޒީރުންނަށް ރުހުން ދިނުން ފަސްކުރުމާއެކު އެމްޑީޕީއިން ދައްކުވައި ދިނީ އެ ޕާޓީއަށް ޑިމޮކްރަސީ ނޭނގޭކަން ކަމަށެވެ.
"ރައީސުލްޖުމްހޫރިއްޔަކު ރައްޔިތުން އިންތިހާބު ކުރީމާ އެ ރައީސުލްޖުމްހުރިއްޔާ އެމަނިކުފާނު ކެބިނެޓު އެކުލަވާލާ ރުހުން ހޯދަން މަޖިލީހަށް ފޮނުވީމާ ރުހުން ނުދޭ ބަޔަކު ދެން ތިމަންނަމެންމީ ޑިމޮކްރަސީ ދަންނަ ބައެކޭ ކިޔައިގެން ވަކާލާތު ކުރައްވާނެ ކަމެއް ނެތް،" ރައްޔިތުންގެ މަޖިލީހުގެ މެމްބަރުކަން ދެ ދައުރުގައި ކުރެއްވި އަބްދުއްރަހީމް ވިދާޅުވި އެވެ.
މީގެ ކުރީގެ ރައީސުންގެ ކެބިނެޓުތަކަށް ވެސް މަޖިލީހުން ލަސްކުރުމެއް ނެތި ރުހުން ދީފައިވާ ކަމަށް އޭނާ ފާހަގަ ކުރެއްވި އެވެ.
"ރުހުން ދެންޏާ ދޭންވީ ނުދެންޏާ ނުދީ ތިއްބަވަންވީ،" އަބްދުއްރަހީމް ވިދާޅުވި އެވެ.
ރުހުން ނުދީ ލަސްކޮށްފިއްޔާ އެއްގޮތަކުން ރަނގަޅު ކަމަށާއި އޭރުން ވަޒީރުންގެ އިތުބާރު ނެތްކަމުގެ މައްސަލައެއް ނުވެއްދޭނެ ކަމަށާއި މަޖިލީހުން ރުހުން ނުދިނަސް ގާނޫނު އަސާސީން ރައީސްއަށް މަތިކޮށްފައިވާ ވާޖިބު އަދާކުރަން މަގާމުތަކަށް ބޭފުޅުން އައްޔަން ކުރެއްވޭނެ ކަމަށެވެ.
ސަރުކާރަށް ދޮޅުމަހެއްހާ ދުވަސް ވެފައިވާއިރު، މި އަހަރުގެ މަޖިލީހުގެ ފަހު ދައުރު މިއަދު ނިންމާލާފައިވަނީ ވަޒީރުންނަށް ރުހުން ދިނުމުގެ މައްސަލައަށް ގޮތެއް ނުނިންމަ އެވެ. ވަޒީރުންނަށް ރުހުން ދިނުމުގެ މައްސަލަ ކޮމިޓީން ދިރާސާކޮށް ތަޅުމަށް ފޮނުވި ނަމަވެސް އެ މައްސަލަ އަނބުރާ ކޮމިޓީއަށް ފޮނުވާލީ ވުޒާރާތަކުގެ މެންޑޭޓުތައް މަޖިލީހަށް ހުށަހަޅާފައި ނުވާ ކަމަށް ބުނެ އެވެ.
ސަރުކާރުން މެންޑޭޓުތައް ފޮނުވުމާއެކު މިއަދުގެ ޖަލްސާގައި ވަނީ އެ މައްސަލަ ދިރާސާ ކުރުމަށް ކޮމިޓީއަށް ފޮނުވާފަ އެވެ. މިއަދުގެ ޖަލްސާގައި މަޖިލީހުގެ ރައީސް މުހައްމަދު އަސްލަމް ވަނީ، ވަޒީރުންނަށް ރުހުން ދިނުމުގެ މައްސަލައަށް ގޮތެއް ނިންމުމަށް ދައުރުން ބޭރުގައި ޖަލްސާއެއް ބޭއްވިދާނެ ކަމަށް ވިދާޅުވެފަ އެވެ.
ރައްޔިތުންގެ މަޖިލީހުގައި މިއަދާ ހަމައަށް ވެރިކަންކުރާ ކޯލިޝަނުގައި ތިއްބެވީ ހަތަރު މެންބަރުންނެވެ. ނަމަވެސް މިރޭގެ ޖަލްސާގައި އެމްޑީޕީގެ 13 މެންބަރަކު ޕީއެންސީއަށް ސޮއިކުރުމާއެކު އެ އަދަދު ވަނީ 17 އަށް އަރައިފަ އެވެ.
