ސަރުކާރުން އަލަށް އުފެއްދި ވުޒާރާތަކުގެ މެންޑޭޓް ރައްޔިތުންގެ މަޖިލީހުން ފާސްކުރަން ފޮނުވާފައި ނުވާތީ، އެކަން އެހެން އޮއްވައި ވަޒީރުންނަށް ރިޕޯޓްގެ މަސައްކަތް ކުރިއަށް ނުގެންދެވިގެން، މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރު މަޝްވަރާ ކުރައްވަން ޖެހިއްޖެ އެވެ.
މަޖިލީހުގެ މިއަދުގެ ޖަލްސާ ފަށައި އެޖެންޑާ އިއުލާނުކުރުމާ އެކު ނިޒާމާ ބެހޭ މައްސަލައެެއްގެ ގޮތުގައި އެކަން ފާހަގަކުރެއްވީ ތުޅާދޫ ދާއިރާގެ އެމްޑީޕީ މެމްބަރު ހިސާން ހުސައިންނެވެ. ވުޒާރާތަކުގެ މެންޑޭޓް ފާސްކުރަން ފޮނުވާފައި ނެތީސް ވަޒީރުންނަށް ރުހުން ދިނުމުގެ މައްސަލައިގެ ރިޕޯޓް މަޖިލީހުގެ ކަމާ ބެހޭ ކޮމިޓީން ފާސްކުރީ ގަވައިދާ ހިލާފަށް ކަމަށް އޭނާ ވިދާޅުވި އެވެ.
ނިޒާމާ ބެހޭ މައްސަލައެއް ކަމަށް ވިދާޅުވެ ހޯއްދެވި ފުރުސަތުގައި ހިސާން ވިދާޅުވީ ވަޒީރުންނަށް ރުހުން ދިނުމުގެ މައްސަލަ ދިރާސާކޮށް، ސަރުކާރުގެ މަސްއޫލިއްޔަތު އަދާކުރަ މިންވަރު ބަލާ ކޮމިޓީން އެކުލަވައިލި ރިޕޯޓް އޮތީ މަޖިލީހުގެ ގަވާއިދުގެ 200 ވަނަ މާއްދާގެ ވ، ރ، ކ އަދި އ ގައި ބަޔާންކޮށްފައި އޮތް ހަމަތަކާއި ހިލާފަށް ކަމަށެވެ.
އެ މާއްދާތަކުގައި ހުރި ކަންކަން ފުރިހަމަ ނުވާ ރިޕޯޓަކަށް ވާތީ އެ ރިޕޯޓަށް ވޯޓަށް އެހޭނެ ކަމަކަށް ގަބޫލެއް ނުކުރައްވާ ކަމަށް ވެސް އޭނާ ވިދާޅުވި އެވެ.
"ގާނޫނުއަސާސީގެ 116 ވަނަ މާއްދާގެ ހ އާއި 200 ވަނަ މާއްދާގެ އ އަށް ބަލާއިރު ސަރުކާރުން އުފައްދަން ބޭނުންވާ ވުޒާރާތަކުގެ ދާއިރާތަކުގައި ހިމެނޭ މަސައްކަތް، އެއީ މި މަޖިލީހުން ފާސްކުރުމަށް ރައީސް ހުށަހަޅަން ޖެހޭނެ މަސައްކަތްތަކެއް، މިހާރު ސަރުކާރުން މި މިނިސްޓްރީތައް ގާއިމް ކޮށް 30 ދުވަސް ވެފައިވާއިރު، މިނިސްޓްރީތަކުގެ މެންޑޭޓް ފާސް ކުރަން ފޮނުވާފައި ނުވާތީ، މިނިސްޓަރުންނަށް ރުހުން މި ދެނީ އެ ބޭފުޅުން ކޮން މަސްއޫލިއްޔަތުތަކެއް އަދާ ކުރުމަށް ނުވަތަ އަދާ ކުރުމުގެ ގާބިލުކަން ހުރެގެންތޯ ނުވަތަ ނެތިގެންތޯ ރިޕޯޓުން ސާފެއް ނުވޭ،" ހިސާން ވިދާޅުވި އެވެ.
އެއީ ނިޒާމާ ބެހޭ މައްސަލައެއް ކަމަށް ބަލައިގަނެ، ރިޔާސަތުން މަޖިލީހުގެ ރައީސް މުހައްމަދު އަސްލަމް ނިންމެވީ އެކަމާ ބެހޭ ގޮތުން މަޖިލީހުގެ މެޖޯރިޓީ ލީޑަރު، ( އެމްޑީޕީގެ ޕާލަމެންޓްރީ ގްރޫޕްގެ ލީޑަރު) މުހައްމަދު ރަޝީދާއި މައިނޯރިޓީ ލީޑަރު ( ދަ ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު) އަލީ އާޒިމް އާ އެކަމުގައި މަޝްވަރާ ކުރެއްވުމަށެވެ.
