ރައީސް ޑރ. މުހައްމަދު މުއިއްޒުގެ ކެބިނެޓުގެ ވަޒީރުންނަށް ރުހުން ދިނުމާއި ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނާއިބު އަޒުލުކުރުން ކުރިއަށް ގެންދިއުމަށް މަޖިލީހުގެ ގަވާއިދުގައި ބަޔާންކޮށްފައިވާ މާއްދާތައް އިސްލާހުކުރުމާ ގުޅޭގޮތުން، މާދަމާ އޮންނަ ރައްޔިތުންގެ މަޖިލީހުގެ އެންމެ ފަހު ދައުރުގެ ޖަލްސާގައި ވޯޓަށް އަހާނެ އެވެ.
މަޖިލީހުގެ ތިން ވަނަ ދައުރު ނިމޭ ތާރީހަކީ ނޮވެމްބަރު 27 އެވެ. ނަމަވެސް، އޭރު ވެސް މަސައްކަތްތައް ހުރުމުން، ޑިސެމްބަރު 7، އަށް މުއްދަތު އިތުރު ކުރި އެވެ. އަދި އެ މުއްދަތު ދެވަނަ ފަހަރަށް އިތުރުކުރީ ޑިސެމްބަރު 18, ގަ އެވެ.
"އަދަދު" ނޫހަށް އެނގިފައިވާ ގޮތުގައި މާދަމާގެ ޖަލްސާގައި ކެބިނެޓަށް ރުހުން ދިނުމާއި ކޮމިޓީ އިސްލާހުތަކާއި އަދި މުހިންމު ބިލުތަކެއް ފާސްކުރަން ވޯޓަށް އަހާނެ އެވެ.
ކެބިނެޓަށް ރުހުން ދިނުމާ ގުޅޭގޮތުން މަޖިލީހުގެ މެޖޯރިޓީ އޮންނަ އެމްޑީޕީން ނިންމާފައިވާ ގޮތް ހާމަކޮށްފައި ނުވެ އެވެ. ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން ނިންމީ 22 ވަޒީރުންގެ ޝަރުތު ހަމަވާތީ މަޖިލީހުގެ ތަޅުމުގައި ވަކިވަކިން ވަޒީރުންނަށް ރުހުން ދިނުމަށް ވޯޓަށް އެހުމަށެވެ.
ރައީސް އާއި ނައިބު ރައީސް އަޒުލުކުރުމުގެ ގަރާރެއް ހުށަހަޅައިފި ނަމަ މަޖިލީހުގެ ރައީސްގެ މޭޒުކޮޅުގައި މައްސަލަ ހުއްޓުވާފައި ބޭއްވިޔަ ނުދިނުމަށްޓަކައި ހަމަތަކާއި ތަރުތީބުތަކެއް މަޖިލީހުގެ ގަވާއިދަށް ގެންނަން އާންމު ކޮމިޓީން ވަނީ ފާސްކޮށްފަ އެވެ. މި އިސްލާހު ފާސްވެއްޖެ ނަމަ މި ބަދަލުތަކާއެކު ރައީސުލްޖުމްހޫރިއްޔާ އާއި ރައީސުލްހުމްހޫރިއްޔާގެ ނައިބު މަގާމުން ވަކިކުރުން ފަސޭހަ ވެގެންދާނެ އެވެ.
އޭގެ އިތުރުން, އިންޑަސްޓްރިއަލް ރިލޭޝަންސް ބިލާއި އޮކިއުޕޭޝަނަލް ސޭފްޓީ ބިލު ވެސް ކޮމިޓީން ނިންމައި ތަޅުމަށް ވަނީ ފޮނުވާފަ އެވެ.
