އިދިކޮޅު މައި ޕާޓީ، އެމްޑީޕީއާއި އެޕާޓީން އިސް ބައެއް ބޭފުޅުން ވަކިވެވަޑައިގެން އުފެއްދި ދަ ޑިމޮކްރެޓްސް އިން ބޮޑު މަޝްވަރާއެއް ފެށި ކަމަށް އިއްޔެ ރިޕޯޓުކުރި އެވެ.
އެ ދެ ޕާޓީގެ ލީޑަޝިޕުގެ ބައެއް ބޭފުޅުން މާލެ ކައިިރި ރިސޯޓެއްގައި ބައްދަލުކުރައްވާކަން ވަނީ "އަދަދު" އަށް ވަނީ އެނގިފަ އެވެ. އެ މަޝްވަރާތަކާ ގުޅޭ ގޮތުން ސުވާލުކުރުމުން، ދަ ޑިމޮކްރެޓްސްގެ ރައީސް އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވީ އެމްޑީޕީއާއެކު އަބަދުވެސް އެކި ކަންކަމުގައި އެ ޕާޓީން މަޝްވަރާކުރާ ކަމަށެވެ.
ހަސަން ވިދާޅުވީ ޕާޓީގެ އިސް ހައެއްކަ ބޭފުޅުން މަޖިލީހާއި އެހެން ސިޔާސީ ކަންކަމުގެ މަސައްކަތުގައި މާލެއިން ބޭރުގައި އުޅުއްވާ ކަމަށެވެ. އިތުރު ތަފްސީލެއް ނުދެއްވަ އެވެ.
އެމްޑީޕީއާ އާއި ދަ ޑިމޮކްރެޓްސްގެ ބޮޑު މަޝްވަރާއެއް ކުރިއަށް ގެންދާކަން ދަ ޑިމޮކްރެޓްސްގެ ޕާލިމެންޓަރީ ގްރޫޕްގެ ލީޑަރު އަލީ އާޒިމް ވެސް ކަށަވަރުކޮށް ދެއްވި އެވެ. އޭނާ ވިދާޅުވި ގޮތުގައި މި ވަގުތު ކުރިއަށް ދަނީ މަޝްވަރާ އަކީ ރާއްޖޭގެ ސިޔާސީ މަޝްރަހު "ރަނގަޅުކުރުމުގެ" މަޝްވަރާ އެވެ.
"ފެހި ގާނޫނުއަސާސީއަށް އަމަލު ކުރަން ފެށި ފަހުން ބޭއްވި އިންތިހާބުތަކުގައި މުޅީން ވެސް ރައްޔިތުން ވޯޓުލީ ވެރިކަމުން މީހަކު ބާލަން. އެކަން ބަދަލުކުރަން އަޅުގަނޑުމެން މި މަޝްވަރާ ކުރަނީ،" އާޒިމް ވިދާޅުވި އެވެ.
އެމްޑީޕީ އާއި ދަ ޑިމޮކްރެޓްސް އިން އެފަދަ މަޝްވަރާތަކެއް ކުރިއަށް ގެންދާ އިރު ރައްޔިތުންގެ މަޖިލީހުގެ ގަވައިދަށް ގެންނަން ކޮމިޓީ މަރުހަލާއިން ނިންމާފައިވާ ބަދަލާއެކު ރައީސް ޑރ. މުހައްމަދު މުއިއްޒު ވެރިކަމުން އަޒުލު ކުރަން އުޅޭ ކަމުގެ އަޑުތައް ވަނީ ގަދަވެފަ އެވެ.
މަޖިލީހުގެ ގަވައިދަށް ގެންނަން އުޅޭ ބަދަލުގައިވާ ގޮތުން މަޖިލީހުގެ ޖުމްލަ މެމްބަރުން ކަމަށް ބަލާނީ މިހާރު ތިއްބެވި މެމްބަރުންގެ އަދަދެވެ. އެ ބަދަލު އަންނާނީ އެކަމަކު ކޮމިޓީން ނިންމި ގޮތަށް މަޖިލީހުގެ ތަޅުމުން ފާސްކުރުމުންނެވެ.
މި ބަދަލާއެކު މަޖިލީހުގައި ކަންކަން ފާސްކުރަން ކަނޑައަޅާފައިވާ އަޣުލަބިއްޔަތުގެ މިންވަރުތަކަށް ބަދަލު އަންނާނެ އެވެ. އެގޮތުން ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު އަޒުލުކުރަން ދެން ބޭނުން ވާނީ 54 މެންބަރުންގެ ވޯޓެވެ. ކުރިން ނަމަ 58 މެންބަރުންގެ ވޯޓު ބޭނުން ވާނެ އެވެ. އެމްޑީޕީގެ ޕީޖީ ގްރޫޕުގައި 56 މެންބަރުން އެބަތިއްބެވެ.
