އައްޑޫ ސިޓީގެ ފެން ޕްލާންޓަށް ދިމާވި މައްސަލަ ހައްލުކޮށް އެ ސިޓީގެ ރަށްތަކަށް ރޭ ފެން ދޫކޮށްފި އެވެ.
މާލެ ފިޔަވައި ދިވެހިރާއްޖޭގެ އާބާދީ އެންމެ ބޮޑު ސިޓީގެ ފެން ޕްލާންޓު ހަލާކުވެގެން ފެން ކެނޑުނީ ބުރާސްފަތި ދުވަހު އެވެ. ހަލާކުވި ބަޔަކީ ޕްލާންޓުން އުފައްދާ ފެން ދައުރުކުރުވުމުގައި އެންމެ މުހިންމު ދައުރެއް އަދާކުރާ ވީއެފްޑީ ޑްރައިވެ އެވެ. ފެން ދޫކުރާ މިންވަރާއި ބާރުމިން ރެގިއުލޭޓް ކުރާނީ އެ ބައި ބޭނުންކޮށްގެނެވެ.
އެ މައްސަލަ ހައްލުކުރުމަށްޓަކައި ވެރިރަށް މާލެއިން ދެ ވަނަ ފަހަރަށް ސްޕެއާ ޕާޓްސް ގެންދިޔަ އެވެ. އެއަށް ފަހު މުޅި މައްސަލަ ހައްލުކޮށް ފެން ދޫކުރެވުނީ ރޭ ދަންވަރު އެވެ.
ގާތްގަނޑަކަށް 20،500 މީހުން ދިރިއުޅޭ އައްޑޫ ސިޓީއަށް ފެނުގެ ހިދުމަތް ކެނޑުނީ ފެނަކަ ކޯޕަރޭޝަނުން ބުނި ގޮތުގައި ގަވާއިދުން ފެން ޕްލާންޓު މަރާމާތު ނުކުރުންނެވެ.
"އައްޑޫ ސިޓީގައި މި ދިމާވި ފެނުގެ މައްސަލައަކީ ތާވަލު ކުރެވިގެން ކުރަންޖެހޭ މަރާމާތުގެ މަސައްކަތްތައް ކުރުމަށް އިސްކަން ދެވިފައި ނުވާތީ އާއި ޔުޓިލިޓީ ރެގިއުލޭޓަރީ އޮތޯރިޓީން އިންސްޕެކްޓުކޮށް، ހައްލުކުރަންޖެހޭ ކަންކަން ހައްލުކުރުމަށް އަންގަވައި ފޮނުއްވާފައިވާ ރިޕޯޓަށް އެ އޮތޯރިޓީން ދެއްވާފައިވާ ޓައިމްލައިނާ އެއްގޮތަށް އަމަލުކުރެވިފައި ނުވުމުގެ ސަބަބުން ދިމާވި މައްސަލައެއްކަން މިހާތަނަށް ބެލި ބެލުމުން ފާހަގަ ކުރެވިފައިވެ އެވެ،" ފެނަކަ ކޯޕަރޭޝަނުން ނެރުނު ބަޔާނެއްގައި ބުނެފައިވެ އެވެ.
ފެން ޕްލާންޓަށް މައްސަލަ ދިމާވިތާ ކުޑަ ވަގުތު ކޮޅެއްގެ ތެރޭގައި ފެން ފޯރުކޮށް ދިނުމުގެ މުޅި ހިދުމަތް މެދުކެނޑެން ޖެހުނީ އެކަށީގެންވާ މިންވަރަށް ފެނުގެ ސްޓޮކެއް ނެތުމުން ކަމަށް ވެސް އެ ކުންފުނިން ބުންޏެވެ.
އެހެންވެ، ކުރިޔަށް އޮތް ތަނުގައި އައްޑޫ ސިޓީގައި މިފަދަ ގޮތަކަށް ފެނުގެ ހިދުމަތް ކެނޑިގެން ނުދާނެ ގޮތެއް ހޯދަން، ފެނުގެ ސްޓޯރޭޖު އިތުރުމުގެ މަސައްކަތް ވެސް ފަށާފައިވާ ކަމަށް ފެނަކައިން ބުނެ އެވެ.
މިފަހަރު އައްޑޫ ސިޓީގެ ފެން ޕްލާންޓުން ހަލާކުވި ވީއެފްޑީ ޑްރައިވް ފޯރުކޮށް ދިނީ އެމްޑަބްލިޔޫއެސްސީން ކަމަށާއި އަދި މައްސަލަ ހައްލުކުރަން ފަންނީ އެހީ ވެސް އެ ކުންފުނިން ލިބުނު ކަމަށް ފެނަކައިން ބުންޏެވެ.
