އައްޑޫގެ ގުޅިފައިވާ ރަށްތަކުން ފެނުގެ ހިދުމަތް ކެނޑިފައި އޮންނަތާ 48 ގަޑިއިރަށްވުރެ އިތުރުވެފައިވާއިރު، ފެން ދޫކުރަން ބޭނުުންވާ އިތުރު ވޭރިއޭބަލް ފްރިކުއެންސީ ޑްރައިވްއެއް (ވީއެފްޑީ) އައްޑޫއަށް ގެންދިއުމުގެ މަސައްކަތް ކުރަމުން އަންނަ ކަމަށް ފެނަކައިން ބުނެފި އެވެ.
ފެނަކައިގެން މެނޭޖިން ޑިރެކްޓަރު މުއާޒް މުހައްމަދު ރަޝީދު ވިދާޅުވީ އައްޑޫއިން ފެން ކެނޑިފައި ވަނީ އާރޯ ޕްލާންޓުގެ ވީއެފްޑީއަށް ދިމާވި މައްސަލައަކުން ކަމަށާއި އެ މައްސަލަ ހައްލު ކުރުމަށްޓަކައި މާލެއިން އިއްޔެ އެކޮޅަށް ވީއެފްޑީއެއް ގެންގޮސް ފެނުގެ ހިދުމަތް ފެށޭތޯ މަސައްކަތް ކުރި ކަމަށެވެ. ނަމަވެސް އެ ޑްރައިވް ގެންގޮސް އިންސްޓޯލު ކުރިފަހުން މަސައްކަތް ނުކުރާތީ ފެނުގެ ހިދުމަތް އަދިވެސް ނުފެށޭ ކަމަށް އޭނާ ވިދާޅުވި އެވެ.
ވީއެފްޑީއަކީ އިންޕުޓް ކަރަންޓުގެ ފްރިކުއެންސީ ތަފާތުކޮށްގެން ފެން އުފައްދާ ޕްލާންޓުގެ ސްޕީޑާއި ޓޯކް ކޮންޓްރޯލްކުރާ އޭސީ މޮޓޯ ޑްރައިވް (މޮޓަރެއް ހިމެނޭ ސިސްޓަމް) ގެ ބާވަތެކެވެ. ޕްލާންޓުގެ ޓޮޕޮލޮޖީއަށް ބެލުމަށްފަހު، އެސޯސިއޭޓެޑް ވޯލްޓޭޖް ނުވަތަ ކަރަންޓް ވޭރިއޭޝަން އޭގެން ކޮންޓްރޯލް ކުރެ އެވެ.
"މިހާރު އަޅުގަނޑުމެންނަށް އަނެއްކާ ވެސް އެމްއެންޑީއެފްގައި ހުރި ވީއެފްޑީއެއް ލިބިފައި ވަނީ، އެމްޑަބްލިއުއެސްސީ އިންޖިނޭރުންނާ ގުޅިގެން އެ ޑްރައިވް ޓެސްޓު ކުރުމުގެ މަސައްކަތް ކުރަމުން މިދަނީ، ޓެސްޓުކޮށް ނިމުމާއެކު މޯލްޑިވިއަންގެ ފްލައިޓެއް ޗާޓަރުކޮށްގެން އެކޮޅަށް ފޮނުވުމުގެ މަސައްކަތް ކުރާނަން،" މުއާޒް ވިދާޅުވި އެވެ.
އައްޑޫގެ އެންމެ އާބާދީ ބޮޑު ހަތަރު ރަށުން ސަޕްލައި ފެން ކެނޑިފައި ވަނީ މިދިޔަ ބުރާސްފަތި ދުވަހުގެ ހެނދުނު ދިމާވި ކަރަންޓު މައްސަލައަކާ ގުޅިގެންނެވެ. އެ މައްސަލަ ހައްލު ކުރުމަށްޓަކައި އެ ދުވަހުން ފެށިގެން ފެނަކައާއި އެމްޑަބްލިއުއެސްސީގެ އިންޖިނޭރުން ގުޅިގެން ދަނީ މަސައްކަތް ކުރަމުންނެވެ.
އައްޑޫއިން ފެން ކެނޑުމާ ގުޅިގެން ގިނަ ބަޔަކު ދަނީ މީސްމީޑިއާގައި ވެސް ކަންބޮޑުވުން ފާޅު ކުރަމުންނެވެ. ނަމަވެސް މައްސަލަ ހައްލު ކުރުމުގައި ދަތިތަކެއް ކުރިމަތިވަމުން ދަނީ ވީއެފްޑީއަކީ ރާއްޖެއިން ލިބެން ހުންނަ އެއްޗަކަށް ނުވާތީ ކަމަށް މުއާޒް ވިދާޅުވި އެވެ.
