މަސްވެރިންގެ ހިޔާލާއި ކަންބޮޑުވުންތައް ސަރުކާާރާ ހިއްސާކުރަން ބާއްވާ މަސްވެރިންގެ ގުންޒަރު ފަށައިފި އެވެ.
މަސްވެރިންގެ ދުވަހުގެ މުނާސަބާގައި ކުރިއަށް ގެންދާ އެ ގުންޒަރު، އިފްތިތާހުކޮށްދެއްވީ ފިޝަރީޒް މިނިސްޓަރު އަހުމަދު ޝިޔާމެވެ.
ފިޝަރީޒް މިނިސްޓްރީން ބުނީ ގުންޒަރުގައި ރާއްޖޭގެ އެކި ސަރަހައްދުތަކުން 40 މަސްވެރިން ބައިވެރިވާކަމަށެވެ. މަސްވެރިންގެ އިތުރުން، މަސްވެރިކަމުގެ ސިނާއަތުގައި ހަރަކާތްތެރިވަމުންދާ އެކިއެކި ފަރާތްތަކުން ވެސް ވަނީ އެ ގުންޒަރުގައި ބައިވެރިވެ އެވެ. ގުންޒަރުގައި މަސްވެރިންނާއި މަސްވެރިކަމާއި ގުޅޭ ތަފާތު އެކި ދާއިރާތަކާއި ބެހޭގޮތުން މަޝްވަރާ ކުރާނެ ކަމަށް ވެސް މިނިސްޓްރީން ބުންޏެވެ.
މަހުގެ އަގު ކަނޑައެޅުމުގައި އަމިއްލަ ކުންފުނިތަކުގެ ފަރާތުން ގެންގުޅޭ ހަމަތަކާއި މިންގަނޑުތަކާއި ގުޅޭގޮތުން މައުލޫމާތު ހިއްސާކުރުން ވެސް ގުންޒަރުގައި ކުރިއަށް ދާނެ އެވެ. މަސްވެރިކަމުގެ ސިނާއަތުގައި ހުރި ކަންބޮޑުވުންތައް ހިއްސާކޮށް އެކަންކަން ހައްލުކުރުމަށް ކުރެވިދާނެ ކަންތައްތަކާ ގުޅޭ ގޮތުން މަޝްވަރާކޮށް މަސްވެރިންގެ ހިޔާލު ހޯދުން ވެސް ގުންޒަރުގައި އޮންނާނެ އެވެ.
އޭގެ އިތުރުން، ކަޅުބިލަމަހުގެ އެމް.އެސް.ސީ ސެޓިފިކެޓް ދެމެހެއްޓުމަށް ކުރަންޖެހޭ ކަންތައްތަކާއ،ި ބޮޑުކަންނެލީގެ މަސްވެރިކަން ދެމެހެއްޓުމަށްޓަކައި ހިންގަމުންދާ މަސައްކަތްތަކާއި ބެހޭ ގޮތުން ބައިވެރިންނަށް މައުލޫމާތު ދޭނެ ކަމަށް ފިޝަރީޒް މިނިސްޓްރީން ބުންޏެވެ.
މަސް ދޯނި ފަހަރުގައި ރެސްކިއު ޑައިވިން އަށް ސެޓިފައިވެފައިވާ ފަޅުވެރިން ތިބުމުގެ މުހިންމުކަމާއ،ި ކަނދުފަތި ގާއިމްކުރުމުގައި ބަލަންޖެހޭ ބައެއް ފަންނީ ކަންކަން ވެސް ގުންޒަރުގައި މަސްވެރިންނަށް ކިޔައިދޭނެ އެވެ. މަސްވެރިޔާ ކާޑުގެ މައުލޫމާތު ހިއްސާ ކުރުމުގެ އިތުރުން ސްކޭމްތަކަށް ރައްކާތެރިވުމަށް މައުލޫމާތު ވެސް ގުންޒަރުގައި މަސްވެރިންނަަށް ދޭނެ އެވެ.
ގުންޒަރު ކުރިއަށް ދާނީ މިއަދު ހެނދުނު 09:00 އިން ހަވީރު 17:00 ގެ ނިޔަލަށް މީރުމާ އިވެންޓްސް ހޯލްގައެވެ.
