ޕީއެންސީ/ ޕީޕީއެމްގެ ކޯލިޝަނުން ކުރީގެ ވަކިވެވަޑައިގަތުމަކީ އެ ދެޕާޓީއަށް ގެއްލުމެއް ނޫން ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ ސިފަކުރައްވައިފި އެވެ.
ޕީއެންސީގެ އާ އޮފީސް ރަސްމީކޮށް ހުޅުވައި، ރޭ ބޭއްވި ނޫސްވެރިއަކު ކުރި ސުވާލަކަށް ޖަވާބުދެއްވަމުން އަބްދުއްރަހީމް ވިދާޅުވީ ރައީސް އަބްދުﷲ ޔާމީން ވަކިވުމަކުން، ޕާޓީގެ ލީޑާޝިޕުން އެއްވެސް މެމްބަރަކު ވަކިވެފައި ނުވާ ކަމަށެވެ.
އެ ބައްދަލުވުމުގައި ނޫސްވެރިޔާ ސުވާލުކުރީ" ޕީއެންސީ/ ޕީޕީއެމް ކޯލިޝަން ދޫކުރައްވާ ޔާމީން ވަޑައިގަތުމުން ޕާޓީއަށް އެއްވެސް އަސަރެއް ކޮށްފާނެކަމަށް ގަބޫލުކުރައްވަންތޯ" އެވެ. އެސުވާލަށް ޖަވާބުދެއްވަމުން އަބްދުއްރަހީމް ވިދާޅުވީ ރައީސް ޔާމީން ޕާޓީން ވަކިވެ ވަޑައިގަތީ އަމިއްލައަށް ކަމަށެވެ. އަދި އެކަމުގެ ސަބަބުން ޕާޓީގެ ލީޑަރޝިޕުން ވެސް އަދި އާންމެ މެމްބަރަކު ވެސް ވަކިވެފައި ނުވާ ކަމަށް ވިދާޅުވި އެވެ.
"މެމްބަރުންގެ އަދަދު ދަނީ އިތުރުވަމުން، މަޖިލީހަށް މި ނުކުންނަނީ އިންތިހާބު ގައި ވާދަކުރަނީ ހަމައެކަނި އަޅުގަނޑުމެން ކަމަށް ދެކިގެނެއް ނޫން، ވާދަވެރި ކެންޑިޑޭޓުން ތިބޭނެ، އެ މީހުންނާ ވާދަކޮށް ކާމިޔާބު ކުރުމަށް ނުކުންނަނީ" އަބްދުއްރަހީމް ވިދާޅުވި އެވެ.
ކުރިއަށް އޮތް މަޖިލިސް އިންތިހާބުގައި ވާދަކޮށް، ވީހާވެސް ގިނަ ގޮނޑި ނެގުމަކީ އެ ކޯލިޝަނާއި ރައީސް ޑރ. މުހައްމަދު މުއިއްޒުގެ އަމާޒުކަން މީގެ ކުރިން ވެސް ހާމަކޮށްފައިވެ އެވެ. އިންތިހާބަށް އެ ކޯލިޝަނުން ކެންޑިޑޭޓުން ނުކުންނާނީ ވަކި ޕާޓީއެއްގެ ޓިކެޓުގައި ނޫން ކަމަށް އަބްދުއްރަހީމް ވިދާޅުވި އެވެ.
ޕީއެންސީއިން ނުވަތަ ޕީޕީއެމްގެ ޓިކެޓުން ޕްރައިމަރީގައި ވާދަކުރި ނަމަވެސް، ޕްރައިމަރީ ބާއްވާނީ އެކުގައި ކަމަށް އަބްދުއްރަހީމް ވިދާޅުވި އެވެ. ރޭ ބޭއްވި ސެނެޓު ބައްދަލުވުމުގައި އެ ކަން އެގޮތަށް ނިންމައި، ދެ ޕާޓީ ގުޅިގެން މަސައްކަތް ކުރުމަށް ނިންމާފައިވާ ކަމަށް ވިދާޅުވި އެވެ.
ޔާމީންގެ އާ ޕާޓީ، ޕީއެންއެފްއަކީ އެ ކޯލިޝަަނަށް އޮތް ގޮންޖެހުމަކަށް ނުވާނެ ކަމަށް ރައީސް ވެސް ވިދާޅުވި އެވެ. އަދި އެކަމުން ކުރިމަތިވާ ގޮންޖެހުމަކީ ހިތްވަރެއްގެ ގޮތުގައި ދެކިގެން މަސައްކަތް ކުރާނެ ކަމަށް ރައީސް ވިދާޅުވެފައިވެ އެވެ.
