ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދުނިޔޭގެ ފުޓުބޯޅަ ފެޑެރޭޝަން (ފީފާ) އިން ފޮނުވާ ފައިސާ ނަހަމަ ގޮތުގައި ބޭނުންކުރާ ކަމުގެ ސީރިއަސް ތުހުމަތުތަކެއް ކުރެވިފައިވާ އެ އެސޯސިއޭޝަންގެ ރައީސް ބައްސާމް އަދީލް ޖަލީލްގެ ޕާސްޕޯޓު ހިފަހައްޓައިފި އެވެ.
އެފްއޭއެމްގެ މައްސަލައިގައި މިހާތަނަށް ވަރަށް ގިނަ މައުލޫމާތު ލިބިފައިވާ ކަމަށް ޕްރޮސެކިއުޓާ ޖެނެރަލް (ޕީޖީ) ގެ އޮފީހުން ހާމަކޮށްފައިވާއިރު އެ މައްސަލާގައި ފުލުހުން ކުރަމުންދާ ތަހުގީގަށް ވެސް ވަނީ ކުރިއެރުން ލިބިފަ އެވެ.
"އަދަދު" ނޫހަށް ޔަގީން ކުރެވިފައިވާ ގޮތުގައި އެ މައްްސަލައާ ގުޅިގެން ބައްސާާމްގެ ޕާސްޕޯޓު ވަނީ ހިފަހައްޓައިފި އެވެ. އޭނާގެ ޕާސްޕޯޓު ހިފަހައްޓާފައިވާއިރު ބައްސާމަކީ ވަރަށް ގިނައިން ބޭރުގެ އެކި ގައުމުތަކަށް ދަތުރުކުރައްވާ އެ ދަތުރުތަކުގެ ފޮޓޯތައް ސޯޝަލް މީޑިއާގައި އާންމުކުރާ މީހެކެވެ.
ފުލުހުން މައުލޫމާތު ދިން ގޮތުގައި ކޯޓުން ވަނީ އޭނާ ރާްއްޖޭން ފުރުން މަނާކުރުމުގެ އަމުރެއް ވެސް ނެރެދީފަ އެވެ.
ފައިސާ ނަހަމަ ގޮތުގައި ބޭނުންކުރުމުގެ މައްސަލައިގައި އެންމެ ބޮޑު ތުހުމަތުތަކެއް އަމާޒުވަނީ އެފްއޭއެމްގެ ރައީސް ބައްސާމް އަށް ކަމަށާއި ހެކި ހޯދުމަށް ފަހު ދައުވާ ކުރާނެ ކަމަށް ވެސް ޕީޖީން ބުނެފައިވެ އެވެ.
ތަހުގީގުގައި މިހާތަނަށް ކުރި މަސައްކަތުން، އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަން އޭގެ ސާފު ކިތާބީ ހެކި ބޭންކް ސްޓޭޓްމަންޓްތަކުން ފެންނަން އެބަހުރި ކަމަށް ފުލުހުން ހާމަކޮށްފައިވެ އެވެ.
ޕްރޮސިކިއުޓާ ޖެނެރަލްގެ އަމުރަށް ފުލުހުން ތަހުގީގު ފަށައި މިދިޔަ މަހުގެ 22 ވަނަ ދުވަހު އެފްއޭއެމަށްވަނީ ވަދެފަ އެވެ. އަދި އެތަނަށް ވަދެ އެ އިދާރާގެ ގިނަ އަދަދެއްގެ ލިޔެކިޔުމާއި، ސާވާ ބެކަޕް އަދި ހާޑް ޑިސްކުތަކެއްވަނީ ގެންގޮސްފަ އެވެ.
ފުލުހުން ކުރަމުން އަންނަ ތަހުގީގާ ގުޅޭގޮތުން އެފްއޭއެމުން ނެރުނު ބަޔާނުގައި ބުނެފައިވަނީ އެ އިދާރާއަށް ލިބިފައިވާ އެފްއޭއެމަށް ނިސްބަތްވާ އެއްވެސް ފަރާތަކުން ހިޔާނާތްތެރިވެފައި ނުވާނެ ކަމަށާއި، މިއީ އަމިއްލަ މަސްލަހަތާއި، ޒާތީ ބޭނުމަށް ހާލަތުގެ ފައިދާ ނެގުމުގެ ގޮތުން ބަޔަކު ކޮށްގެން އުޅޭކަމެއް ކަމަށެވެ.
މި މައްސަލަ ފެންމަތިވުމުގެ ކުރިން ވެސް އޭނާގެ އިސްތިއުފާއަށް އާންމުންގެ ތެރެއިން ގިނަ ބަޔަކު ގޮވާލާފައިވެ އެވެ.
