އިއްޔެ ކުރިއަށްދިޔަ ދަ ޑިމޮކްރެޓްސްގެ ފުރަތަމަ އެތެރޭގެ އިންތިހާބުގެ ނަތީޖާ, އިންތިހާބަށް 24 ގަޑިއިރު ފަހުން އިއުލާނު ކުރިއިރު، އެ ޕާޓީގެ ރައީސަކަށް ހެންވޭރު ހުޅަނގު ދާއިރާގެ މެމްބަރު އަދި މިވަގުތު ޑިމޮކްރެޓްސްގެ އިންޓެރިމް ޗެއާޕާސަން ހަސަން ލަތީފު ހޮވިއްޖެ އެވެ.
މިރޭ ބޭއްވި ނޫސްވެރިންގެ ބައްދަލުވުމެއްގައި ނަތީޖާ އިއުލާނުކުރެއްވީ އެ ޕާޓީގެ ޕީޖީ ގްރޫޕު ލީޑަރު މެދު ހެންވޭރު ދާއިރާގެ މެމްބަރު އަލީ އާޒިމް އެވެ.
އޭނާ ވިދާޅުވި ގޮތުން ހަސަން ލަތީފު އިންތިހާބު ކާމިޔާބުކުރެއްވީ 1,704 ވޯޓެވެ. އޭނާއާ ވާދަކުރެއްވި، ނިމިދިޔަ ސަރުކާރުގައި އެސްޓީއޯގެ މެނޭޖިން ޑިރެކްޓަރުކަން ކުރެއްވި ހުސެއިން އަމްރުއަށް ލިބުނީ 1,300 ވޯޓެވެ. އަދި, 50 ބާތިލު ވޯޓުލާފައިވާ ކަމަށް ވެސް އާޒިމް ހާމަކުރެއްވި އެވެ.
އޭގެއިތުރުން، އިއްޔެ ކުރިއަށް ގެންދިޔަ އިންތިހާބުގައި އެ ޕާޓީގެ އިސް އެހެން މަގާމުތަކަށް ހޮވުނު ފަރާތްތަށްވެސް އާޒިމު ވަނީ އިއުލާނުކުރައްވާފަ އެވެ.
އެގޮތުން، ޕާޓީގެ ނައިބު ރައީސް (އަންހެން) ގެ މަގާމަށް ހޮވުނީ އައިޝަތު އަލައިކާ އަދުނާނެވެ. ޕާޓީގެ ނައިބު ރައީސް (ޔޫތު) ގެ މަގާމަށް ހޮވުނީ ހަސަން ފިރުޝާނެވެ. ޕާޓީގެ އަންހެން ލީޑަރެއްގެ ގޮތުގައި ހުވުނީ ފާތުމަތު ހަމްދާ އެވެ. ޑިމޮކްރެޓްސްގެ ޒުވާނުންގެ ރައީސަކަށް ހޮވުނީ މުހައްމަދު މާސިހު އެވެ.
މިރޭ އާޒިމް އިއުލާނުކުރެއްވީ މި މަގާމުތަކުގެ ނަތީޖާ އެކަންޏެވެ. ވިދާޅުވީ ދެން ހުރި މަގާމުތަކާއި ވަކި ރަށްތަކުގެ ނަތީޖާތައް ޕާޓީން އިއުލާނުކުރަމުންދާނެ ކަމަށެވެ.
އިއްޔެ ހެދުނު 10:00 ހަވީރު 16:00 އަށް ވޯޓުލުން ކުރިއަށް ދިޔަ ނަމަވެސް ޕާޓީއިން ރަސްމީ ސިފައެއްގައި އިންތިހާބާއިގުޅޭ މައުލޫމާތު އަދި ވަގުތީ ނަތީޖާ އިއުލާނުކުރުން ލަސްވާތީީ އެ ޕާޓީގެ އާންމު މެމްބަރުން ވަނީ ނުރުހުން ފާޅުކޮށްފަ އެވެ.
އަދި، ރޭގެ ވަގުތެެއްގައި ރައީސްކަމަށް ވާދަކުރެއްވި ހަސަން ލަތީފު އަދި އަމްރުވެސް ވަނީ އިންތިހާބު ކާމިޔާބުވެފައިވާ ކަަމަށް ވިދާޅުވެ ސޯޝަލް މީޑިއާގައި ޕޯސްޓުތަކެއް ކުރައްވާފަ އެވެ.
ޑިމޮކްރަޓްސްގެ އެތެރޭގެ އިންތިހާބުގައި ވޯޓުލުމުގެ ހައްގު 5،835 މެމްބަރުންނަށް ލިބުނެވެ.
