ކުރީގެ ރައީސް އަބްދުﷲ ޔާމީން އަބްދުލްގައްޔޫމް އިސްކޮށް ހުންނަވައި އުފެއްދުމަށް މަސައްކަތް ކުރައްވާ ސިޔާސީ ޕާޓީގެ ކަންކަމުގައި އެމަނިކުފާނުގެ ސަޕޯޓަރުންނާއި ސަޕޯޓަރުންގެ އާއިލާތަކުން ފޯރީގައި އުޅެދޭން ޔާމީން އެދިވަޑައިގެންފި އެވެ.
ރައީސް ޔާމީން އެގޮތަށް އެދިވަޑައިގެންނެވީ ޕީޕަލްސް ނެޝަނަލް ފުރަންޓުގެ ނަމުގައި އުފައްދާ އައު ސިޔާސީ ޕާޓީގެ ކަންކަމުގައި އިސްކޮށް އުޅުއްވާ، ކުރީގެ މިނިސްޓަރު، މުހައްމަދު މަލީހު ޖަމާލު މެދުވެރިކުރައްވައި "އަދަދު" އަށް ދެއްވި މެސެޖެއްގަ އެވެ.
"[ރައީސް ޔާމީންގެ] މެސެޖަކީ ފޯރީގައި މި ޕާޓީ އުފެއްދުމުގައި އެމަނިކުފާނުގެ ހުރިހާ ސަޕޯޓަރުންނާއި ސަޕޯޓަރުންގެ އާއިލާއިން އުޅެދެއްވުން،" މެސެޖުގައި ރައީސް ޔާމީން ވިދާޅުވެފައިވެ އެވެ.
ސަޕޯޓަރުންނަށް ރައީސް ޔާމީން ހާއްސަ މެސެޖެއް ދެއްވިއިރު، ރެއިން ފެށިގެން ރައީސް ޔާމީނުގެ ސަޕޯޓަރުން ގެންދަނީ ޕީއެންއެފްއަށް ސޮއި ކުރަމުންނެވެ. ޒޭން އަބްދުﷲ ޔާމީންގެ މުއައްސިސް ކަމުގެ ދަށުން ރެޖިސްޓަރީ ކުރުމަށް މަސައްކަތް ކުރާ އެ ޕާޓީއަށް އެންމެ ފުރަތަމަ ބޭފުޅަކަށް ރޭގައި ސޮއި ކުރެެއްވީ ރައީސް ޔާމީން އެވެ.
ޒޭންގެ އިތުރުން އެ ޕާޓީގެ މުއައްސިސުންގެ ގޮތުގައި ތިއްބަވާނީ ރައީސް ޔާމީނާއި, އެމަނިކުފާނުގެ ވެރިކަމުގައި ނައިބު ރައީސަކަށް ހުންނެވި ޑރ. މުހައްމަދު ޖަމީލު އަހުމަދާއި ކުރީގެ ސީޕީ ހުސައިން ވަހީދާއި މުލިއާގޭގެ ޗީފް އޮފް ސްޓާފް އަހުމަދު މުސްތަފާގެ އިތުރުން އަދްލީ އިސްމާއީލް އާއި ޑރ. ޖިހާދު ހަސަން އަދި ކަކާގޭ އަލީ އާދަމް އެވެ.
ޔާމީނުގެ އާ ޕާޓީ އުފެއްދުމަށް އިއްޔެ ހެނދުނު ވަނީ އީސީގެ ހުއްދަށް އެދިފަ އެވެ. ޕީއެންއެފް ޕާޓީގެ ނަމާއި ލޯގޯ އާންމުކުރީ އިއްޔެ ރޭގެ ވަގުތެއްގައި ސޯޝަލް މީޑިއާ މެދުވެރިކޮށެވެ.
ޕީޕީއެމުން ވަކިވެ، އައު ޕާޓީއެއް ހެއްދެވުމަށް ރައީސް ޔާމީން ނިންމެވީ ޕްރޮގުރެސިވް ކޯލިޝަނުގެ ލީޑާޝިރުޕުން އެމަނިކުފާނު އެއްފަރާތް ކޮށްފައިވާ ކަމަށް ބުނެ އެވެ. ޔާމީންގެ ފަރާތުން ރައީސް މުއިއްޒަށް ގިނަ ތުހުމަތުތަކެއް ކޮށްފައިވާއިރު އޭގެ ތެރޭގައި، އެމަނިކުފާނުގެ ފޯނު ކޯލަށް ރައީސް ޖަވާބު ނުދެއްވުމާއި ޖަލު ހުކުމުން މިނިވަން ނުކުރުން ހިމެނެ އެވެ.
