އަންނަ އަހަރު އޮންނަ ރައްޔިތުންގެ މަޖިލީހުގެ އިންތިހާބުގައި ޕީޕަލްސް ނޭޝަނަލް ކޮންގްރެސް (ޕީއެންސީ) އާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެކުގައި ވާދަކުރުމަށް ޕީޕީއެމްގެ ސެނެޓުން މިރޭ ނިންމައިފި އެވެ.
މިއީ ކުރީގެ ރައީސް އަބްދުالله ޔާމީން ޕީޕީއެމްއާ އާ ދުރަށް ޖެހިވަޑައިގެން އާ ސިޔާސީ ޕާޓީއެއް އުފައްދަވަން ނިންމެވި ފަހުން ބޭއްވި އެ ޕާޓީގެ ފުރަތަމަ ސެނެޓު ބައްދަލުވުމެވެ. ޕީޕީއެމްގެ ލީޑާޝިޕާއި ޔާމީނާއި ހިޔާލު ތަފާތުވިއިރު ލީޑާޝިޕްގެ ގިނަ ބޭފުޅުން އިހުތިޔާރު ކުރެއްވީ ވެރިކަމުގައި ހުންނެވި ރައީސް ޑރ. މުހައްމަދު މުއިއްޒުގެ ފަޅި އެވެ.
އޭގެ އިތުރުން, ޕީޕީއެމްއަށް ސެކްރެޓަރީ ޖެނެރަލް އައްޔަނުކުރަން ޕާޓީގެ ލީޑާޝިޕަށް އިހުތިޔާރު ދިނުމަށް ވެސް ވަނީ ނިންމާފަ އެވެ. އެ މަގާމު ހުސްވީ ކުރިން ހުންނެވި އަހުމަދު ތޮލާލް ސަރުކާރުގެ މަގާމަކަށް ވަޑައިގަތުމަށް އެ ޕާޓީން އިސްތިއުފާ ދެއްވުމުންނެވެ.
ހަމައެހެންމެ, މިކަމާ ގުޅޭގޮތުން ނިންމަން ޖެހޭ އިތުރު ނިންމުންތައް ދެ ޕާޓީގެ ޖޮއިންޓް ސެނެޓުން ނިންމުމަށް ވެސް ވަނީ ކަނޑައަޅާފަ އެވެ.
ޕީއެންސީ/ޕީޕީއެމުން މީގެކުރިން ހާމަކޮށްފައިވާ ގޮތުގައި މަޖިލިސް އިންތިހާބަށް ޕްރައިމަރީ ބާއްވާނީ ޖެނުއަރީ 20, 2024 ގައި ކަމަށެވެ.
އެ ކޯލިޝަނުގެ ޓިކެޓަށް ޝައުގުވެރިވާ ޕީޕީއެމް އަދި ޕީއެންސީގެ މެމްބަރުން އެކަމަށް އެދި ހުށަހެޅުމުގެ ފުރުސަތު ޑިސެމްބަރު 20 އިން 31 އަށް ހުޅުވާލާނެ ކަމަށް ވެސް މީގެކުރިން ހާމަކޮށްފައިވެ އެވެ.
މަޖިލިސް އިންތިހާބަށް ޕީޕީއެމުން ޕީއެންސީ އެކުގައި ނުކުންނައިރު ޔާމީން އުފައްދަވާ އާ ޕާޓީން ވެސް އެ އިންތިހާބުގައި ވާދަކުރާނެ އެވެ. އެހެންކަމުން, މި ދެ ޕާޓީގެ ސަޕޯޓަރުންގެ ތެރެއިން ޔާމީނާ އެކުގައި ތިއްބެވި ބޭފުޅުންގެ ވޯޓު އެމަނިކުފާނު ހޯއްދަވާނެ ކަމަށް ބެލެވެ އެވެ.
ވެރިކަމުގައި މިވަގުތު އޮތީ ޕީއެންސީ އެވެ. އެއީ ރައީސް މުއިއްޒު އިންތިހާބު ކާމިޔާބު ކުރެއްވީ އެ ޕާޓީގެ ޓިކެޓުގައި ކަމަށްވާތީ އެވެ. އެ ޕާޓީގެ ޓިކެޓުގައި ވެސް ގިނަ އަދަދެއްގެ ބަޔަކު މަޖިލިސް އިންތިހާބުގައި ވާދަކުރުމަށް ޝައުގުވެރިކަން ފާޅުކޮށްފައިވެ އެވެ.
