ރައީސް ޔާމީނުގެ އިސް ގާނޫނީ ވަކީލު، ޑރ، މުހައްމަދު ޖަމީލު އަހުމަދު ވެސް ޕްރޮގުރެސިވް ޕާޓީ އޮފް ދަ މޯލްޑިވްސް (ޕީޕީއެމް) އިން ވަކިވެވަޑައިގެންފި އެވެ.
ޑރ. ޖަމީލު ޕާޓީއިން ވަކިވެވަޑައިގެންފައިވާކަން ރައީސް ޔާމީންގެ އައު ސިޔާސީ ހަރަކާތުގެ އިސްކޮށް އުޅުއްވާ އައްބާސް އާދިލް ރިޒާ ވަނީ ކަށަވަރުކޮށްދެއްވައިފަ އެވެ.
ޕްރޮގުރެސިވް ކޯލިޝަން ތެރޭގައި އުފެދުނު ހިޔާލު ތަފާތުވުންތަކުގައި އެ ކޯލިޝަން ރޫޅުނުއިރު، ޑރ. ޖަމީލު ހުންނެވީ ރައީސް ޔާމީންގެ ފަހަތްޕުޅުގަ އެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރާ ދެމެދު އުފެދުނު ހިޔާލުތަފާތުވުންތަކުގައި ރައީސް ޔާމީން ވެސް ވަނީ މިދިޔަ ބުރާސްފަތު ދުވަހުގެރޭ ޕީޕީއެމުން ވަކިވެވަޑައިގެންފަ އެވެ.
ރައީސް ޔާމީންއާއި އެމަނިކުފާނަށް ވަފާދާރު ބޭފުޅުން ޕީޕީއެމުން ވަކިވަމުން މިދަނީ މިހާރު ސަރުކާރުން ޔާމީންއާ އެއްކޮށް ގުޅުން ކަނޑައިލާ އަނިޔާ ކުރަމުންދާ ކަމަށް ބުނެ އެވެ.
މިހާރުގެ ސަރުކާރު ގެނައުމަށް ވެސް ބުރަ މަސައްކަތްތަކެއް ކުރެއްވި ޑރ. ޖަމީލު ޕީޕީއެމްއާ ވަކިވެވަޑައިގެންފައި ވާއިރު، އެބޭފުޅުން ގެންދަވަނީ ރައީސް ޔާމީންގެ ނަންފުޅުގައި އައު ސިޔާސީ ޕާޓީއެއް އުފެއްދުމުގެ މަސައްކަތް ކުރައްވަމުންނެވެ. އެޕާޓީއަށް ކިޔާނެ ނަމަކާއި ލޯގޯއެއް މިހާރު ކަނޑައަޅާފައިވާކަމަށް އެކަމުގައި އިސްކޮށް އުޅުއްވާ މުހައްމަދު މަލީހު ޖަމާލް އިއްޔެ ވިދާޅުވެފައިވެ އެވެ.
ރައީސް ޔާމީން އިސްކޮށް ހުންނަވައި އުފައްދަވާ ޕާޓީ އުފެއްދުމުގެ ހުއްދައަށް މާދަމާ އިލެކްޝަންސްގައި އެދޭނެ ކަމަށް އެ ޔާމީންއަށް ވަފާތެރި ބޭފުޅުން ވިދާޅުވެ އެވެ.
މިއީ ވެރިކަން ލިބުމަށްފަހު ޕީޕީއެމް ދެފަޅިވި ދެވަނަ ފަހަރެވެ. މިހާރު އިލެކްޝަންސްއިން ގަބޫލު ކުރާ މިންވަރަށް މެންބަރުން ނެތުމުގެ ސަބަބުން އުވައިލަން ނިންމާފައިވާ އެމްއާރުއެމް އަކީ މީގެ ކުރިން 2013 ވަނަ އަހަރު ރައީސް ޔާމީނު ވެރިކަމަށް ވަޑައިގަތުމަށްފަހު، އޭރު އެ ޕާޓީގެ އިސް ލީޑަރެއްގެ ގޮތުގައި ހުންނެވި، ޔާމީނުގެ އެއްބަފާ ބޭބޭފުޅު، ރައީސް މައުމޫން އަބްދުލް ގައްޔޫމްއާ ހިޔާލު ތަފާތުވެ، މައުމޫން އުފެއްދެވި ޕާޓީއެކެވެ.
މިހާރު ވެރިކަން ކުރާ ޕީއެންސީއަކީ އޭރު، ރައީސް ޔާމީންއަށް ޕީޕީއެމް ގެއްލިދާނެ ކަމުގެ ބިރު ހީވުމުން، އުފެއްދެވި ޕާޓީ އެކެވެ. ނަމަވެސް ޕީޕީއެމްގެ ބާރުތައް ރައީސް ޔާމީނަށް ލިބިވަޑައިގަތުމުން ޕީޕީއެމްގެ ހިިޔަނީގައި ޕީއެންސީ ހިންގަމުން ގެންދިޔައީ އެވެ.
