މާލޭގެ މޭޔަރުގެ އިންތިހާބުގައި ދަ ޑިމޮކްރެޓްސްގެ ޓިކެޓު ވާދަކުރާނެ ކެންޑިޑޭޓަކީ މާލެ ސިޓީ ކައުންސިލްގެ މެންބަރު މުހައްމަދު ސައިފް ފާތިހު ކަމަށް އެޕާޓީން ކަނޑައަޅައިފި އެވެ.
މޭޔަރުގެ އިންތިހާބަށް ވާދަކުރާނެ ޑިމޮކްރެޓްސްގެ ކެންޑިޑޭޓަކު ކަނޑައެޅުމަށް ބާއްވާ އެތެރޭގެ ޕްރައިމަރީއަށް ކުރިމަތިލީ، ގަލޮޅު އުތުރު ދާއިރާގެ ކައުންސިލަރު ސައިފު އެކަންޏެވެ.
މާލޭގެ މޭޔަރުގެ މަގާމު ހުސްވީ، ކުރިން އެ މަގާމުގައި ހުންނެވި ޑރ. މުހައްމަދު މުއިއްޒު ރައީސްކަމަށް އިންތިހާބުވެ، އެ މަގާމަށް ވަޑައިގެންނެވުމުންނެވެ.
ރިޔާސީ އިންތިހާބަށް ފަހު، މާލެ ސިޓީ ކައުންސިލްގެ ހިންގުން ގެންދިޔުން ވަގުތީ ގޮތުން ހަވާލުވެވަޑައިގެންފައިވަނީ ޑެޕިއުޓީ މޭޔަރު އަހުމަދު ނަރީޝް އެވެ.
މޭޔަރުގެ އިންތިހާބު އޮންނާނީ ޖެނުއަރީ މަހުގަ އެވެ. ނަމަވެސް ސީދާ ތާރީހެއް އިލެކްޝަންސް ކޮމިޝަން (އީސީ) އިން އަދި ނުނިންމަ އެވެ.
މޭޔަރުގެ އިންތިހާބުގައި ވާދަކުރެއްވުމަށް، މުއިއްޒު ނިސްބަތްވާ ޕީޕީއެމް/ޕީއެންސީން ޝައުގުވެރިކަން ފާޅުކުރައްވާފައިވަނީ ކުރީގެ އެޓާނީ ޖެނެރަލް އައިޝަތު އާޒިމާއާއި ކުރީގެ ޕޮލިސް ކޮމިޝަނަރު ހުސައިން ވަހީދެވެ. އެމްޑީޕީން ކުރީގެ ޔޫތު މިނިސްޓަރު އަހުމަދު މަހުލޫފު ޝައުގުވެރިކަން ފާޅުކުރައްވާފައިވެ އެވެ.
