އިޒްރޭލުގެ ޕާސްޕޯޓު މަނާކޮށް، އެ ގައުމުގެ ފަތުރުވެރިން ރާއްޖެ އައުން މަނާކުރަން ގޮވާލައި މާލޭގައި ކުރަމުންދާ މުޒާހަރާގެ ބައިވެރިން ފޮރިން މިނިސްޓްރީ ދޮށަށް ދިއުމުން މިނިސްޓަރު މޫސާ ޒަމީރު ނުކުމެވަަޑައިގެން ފަލަސްތީނު މީހުންގެ ދިފާއުގައި ޝުއޫރު ފާޅުކުރައްވައިފި އެވެ.
މިއަދުގެ މުޒާހަރާ ފުރަތަމަ ކުރިއަށްދިޔައީ ރައްޔިތުންގެ މަޖިލިސްގެ ބޭރުގަ އެވެ. އެވަގުތު މަޖިލީހުގެ ބައެއް ،މެމްބަރުން ނުކުމެވަޑައިގެން އެމީހުންނަށް ދެއްވީ އިޒްރޭލާ ދެކޮަޅަށް ހުށަހެޅި ގަރާރުގެ މަސައްކަތް އަވަސްކޮށްދެއްވާނެ ކަމުގެ ޔަގީންކަމެވެ.
އެއަށްފަހު، މުޒާހަރާގެ ބައިވެރިން ވަނީ ފޮރިން މިނިސްޓްރީ ދޮށަށް ގޮސް، ގޮވައިލީ އިޒްރޭލުގެ ޕާސްޕޯޓު މަނާކުރުމަށާއި އިޒްރޭލުގެ އިސް ފަރާތްތައް ބްލެކު ލިސްޓު ކުރުމަށެވެ. މުޒާހަރާގެ ބައެއް ބައިވެރިން މިނިސްޓަރު ޒަމީރާ ބައްދަލުކުރަން އެދުމުން އޭނާ ނުކުމެވަޑައިގެން މުޒާހަރާގެ ބައިވެރިންގެ އަޑު އެއްސެވި އެވެ.
"ރައީސް މިދިޔަ ދުވަސްތަކުގެ ތެރޭގަ އޯއައިސީގެ ސެކެޓްރީ ޖެނެރަލާއި ފަލަސްތީނުގެ ސަފީރުގެ އިތުރުން، އެހެން ގައުމުތަކުގެ ބޭފުޅުންނާ ބައްދަލުކުރެއްވި، އެ ހުރިހާ ބޭފުޅުންގެ އަރިހުގައިވެސް ވިދާޅުވެފައިވީ އިމީޑިއެޓް ސީޒްފަޔާ އެއް އަޅުގަނޑުމެން ބޭނުންވާ ކަމަށާއި ހިއުމަނިޓޭރިއަން ކޮރިޑޯޒް ހުޅުވާލަން ޖެހޭނެ ކަމަށާއި 1967 ގެ ބޯޑަރުތަކަށް އަނބުރާ ދިއުމަށް، އެއީ އަޅުގަނޑުމެން ހުށަހަޅާ ހުށަހެޅުމަކީ" ފަލަސްތީނު މީހުންގެ ހައްގުގައި ސަރުކާރުން ކުރާ މަސައްކަތުގެ ތަފްސީލު ދެއްވަމުން ޒަމީރު ވިދާޅުވި އެވެ.
މިނިސްޓަރު އެމޭރުމުން ވާހަކަ ދައްކަވަނިކޮށް، " ސީޒް ފަޔާ ނައު[ހަމަލާ ދިނުން މިހާރު ހުއްޓައިލާ]" އޭ ކިޔައި މުޒާހަރާގެ ބައިވެރިން އަޑު އުފުލަން ފެށި އެވެ.
ޒަމީރު ވިދާޅުވީ ސަރުކާރުގެ ވެސް އޮތީ ހަމަ އެ ވިސްނުން ކަމަށެވެ.
"ސީޒް ފަޔާ ނައު އިނގޭތޯ އަޅުގަނޑުމެންގެ ވެސް ސްޓޭންޑަކީ. ސީޒް ފަޔާ ނައު" އޭނާ ވިދާޅުވި އެވެ.
ޒަމީރު މިހެން ވިދާޅުވި ނަމަވެސް، ސީޒްފަޔާއަށް ރައީސް ގޮވާލެއްވި ވާހަކަ އެއިން އެއްވެސް ބައްދަލުވުމަކަށްފަހު ރައީސް އޮފީހުން ޝާއިރުކުރި އެއްވެސް ހަބަރެއްގައި ހިމަނާފައެއް ނުވެ އެވެ.
މިދިޔަ އޮކްޓޫބަރު މަހު 7 ގައި ފެށި ހަނގުރާމައަށް ދޮޅު މަސް ވާން ގާތްވެފައިވާއިރު މިހައިތަނަށް އިޒްރޭލުގެ ހަމަލާތަކުގައި ފަލަސްތީނުގެ 12،000 އަށްވުރެ ގިނަ މީހުން ވަނީ ޝަހީދުކޮށްލައިފަ އެވެ. އޭގެތެރެއިން 5000 އަކީ ކުޑަކުދިންނެވެ.
