ސިވިލް ކޯޓު ފަނޑިޔާރުކަމަށް އާދަމް ޒާލިފް އައްޔަންކުރުމަށް ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމައިފި އެވެ.
ޖޭއެސްސީން ބުނީ މިދިޔަ މަހުގެ ފަސް ވަނަ ދުވަހު އެ ކޮމިޝަނުން ކުރި އިއުލާނުގެ ދަށުން، ފަނޑިޔާރުން އައްުޔަންކުރުމުގައި ލަފާދޭ ކޮމިޓީން އިންޓަވިއުކުރުމަށް ފަހު ފަނޑިޔާރުކަމަށް ޒާލިފް އައްޔަންކުރުމަށް ލަފާދީފައިވާކަމަށެވެ. އެ ލަފަޔާ އެއްގޮތަށް މިއަދު ބޭއްވުނު ޖޭއެސްސީގެ 71 ވަނަ ބައްދަލުވުމުގައި ސިވިލް ކޯޓު ފަނޑިޔާރުކަމަށް އާދަމް ޒާލިފް އައްޔަންކުރުމަށް ނިންމާފައިވާކަމަށް ވެސް އެ ކޮމިޝަނުން ބުނެ އެވެ.
ޒާލިފް އަކީ ވިލާ ކޮލެޖްއިން ބެޗްލާ އޮފް ޝަރީއާ އާއި މާސްޓާ އޮފް ޝަރީއާ ހާސިލްކުރައްވާފައިވާ ބޭފުޅެކެވެ.
ޝަރުއީ ދާއިރާގައި 7 އަހަރަށްވުރެ ގިނަ ދުވަހުގެ ތަޖުރިބާ ލިބިފައިވާއިރު ޓްރައިބިއުނަލްގެ މެންބަރުކަން އަދާކުރައްވާ، ވަކާލާތުކުރައްވާ އަދި ޏ.ފުވައްމުލައް މެޖިސްޓްރޭޓް ކޯޓުގެ ލީގަލް އެސިސްޓެންޓްގެ މަގާމް ވެސް އޭނާ އަދާކުރައްވާފައިވެ އެވެ. ޒާލިފް ފަނޑިޔާރުކަމަށް އައްޔަންކުރަން ނިންމެވިއިރު އޭއެންޑް ޒެޑް އެސޯސިއޭޓްސް އެލްއެލްޕީގެ މެނޭޖިން ޕާޓްނާގެ މަގާމް އައީ އަދާ ކުރައްވަމުންނެވެ.
ސިވިލް ކޯޓަށް ފަނޑިޔާރަކު އައްޔަންކޮށްފައި ވަނީ އެ ކޯޓުގެ ކުރީގެ އިސްގާޒީ އަހުމަދު ނިމާލް އަވަހާރަވުމާ އެކު އެ މަގާމު ހުސްވެފައި ވާތީ އެވެ.
ނިމާލް އަވަހާރަވީ މިދިޔަ ސެޕްޓެމްބަރު މަހުގެ 19 ގައި މެޔަށް ތަދެއް އަރައިގެން އައިޖީއެމްއެޗްގައި ފަރުވާދެމުން ދަނިކޮށެވެ. ސިވިލް ކޯޓުގެ ފަނޑިޔާރަކަށް ނިމާލް އައްޔަނުކޮށްފައި ވަނީ މާޗު 2022 ގަ އެވެ. އަދި, އެ ކޯޓުގެ އިސް ގާޒީ ކަމުގެ މަސްއޫލިއްޔަތުތައް އޭނާއާ ހަވާލުކޮށްފައި ވަނީ އޮގަސްޓު 22, 2022 ގަ އެވެ.
ތިރީސްހާސް ރުފިޔާގެ މުސާރައެއް ލިބޭ އެ މަގާމަށް ކުރިމަތިލާން ހުޅުވާލާފައިވަނީ މި މަހު 19، ގެ މެންދުރު 12:00 ގެ ނިޔަލަށެވެ. ހުޅުވާލި މުއްދަތުގައި ސިވިލް ކޯޓު އިސް ގާޒީގެ މަގާމަށް 15 ބޭފުޅަކު ކުރިމަތިލާފައިވެ އެވެ.
