ރާއްޖޭގައި ގާއިމުވެ ތިބި ކަމަށް ބުނާ އިންޑިއާ ސިފައިންގެ އަދަދު ހާމަ ނުކުރުމަށް އިންފޮމޭޝަން ކޮމިޝަނަރުގެ އޮފީހުން ނިންމާފައިވަނީ އެ މައުލޫމާތު ހާމަވުމުގެ ސަބަބުން ގައުމީ ސަލާމަތަށް ނުރައްކާވާ ގޮތަކާއި އޭގެ މިންވަރު އެކަށީގެންވާ ވަރަށް ބެލުމެއް ނެތި ކަމަށް ހައި ކޯޓުން ހުކުމްކޮށްފި އެވެ.
"ދިޔަރެސް" ނޫހުގެ ނޫސްވެރިޔާ އަހުމަދު އަޒާން އެދިފައިވަނީ އިންޑިއާ އަސްކަރިއްޔާއިން ހަދިޔާކޮށްފައިވާ އުޅަނދުތައް އޮޕަރޭޓް ކުރުމުގައި ހަރަކާތްތެރިވާ އިންޑިއާ ސިފައިން ހިމެނޭހެން ރާއްޖޭގައި ހަރަކާތްތެރިވާ ސިފައިންގެ ޖުމުލަ އަދަދާއި އެ ސިފައިންނަށް ދިވެހި ދައުލަތުން ކުރާ ހަރަދުގެ ތަފްސީލް ދިނުމަށެވެ.
އޭރު އިންފޮމޭޝަން ކޮމިޝަނަރަކަށް ހުންނެވީ "އަދަދު" ނޫހުގެ ސީއީއޯ ހުސައިން ފިޔާޒް މޫސާ އެވެ. އޭރު ކޮމިޝަނުން ނިންމީ އެ މައުލޫމާތުތައް ނުދިނުމަށެވެ. ހައިކޯޓުން މައްސަލަ ބެލީ އަޒާނުގެ ފަރާތުން ނިންމުން އިސްތިއުނާފު ކުރުމުންނެވެ.
ހައި ކޯޓުގައި މި މައްސަލަ ބެލި ތިން ފަނޑިޔާރުންގެ އިއްތިފާގުން ހުކުމްކުރީ، އިންފޮމޭޝަން ކޮމިޝަނަރުގެ އޮފީހުން އެ މައުލޫމާތަކީ ގައުމީ ސާލަމަތަށް ނުރައްކާވާ މައުލޫމާތެއް ކަމަށް ކަނޑައެޅީ ހަމައެކަނި ޑިފެންސް މިނިސްޓްރީ އާއި އެމްއެންޑީއެފުން ދިން މައުލޫމާތެއް މައްޗަށް ބިނާކޮށް އެކަނި ކަމަށެވެ.
ގައުމީ ސަލާމަތަށް ނުރައްކާވާ މައުލޫމާތެއް ކަން ކަނޑައެޅުމުގެ ކުރިން ގާނޫނުގައި ބަޔާންކުރާ އިޖުރާއަތްތަކެއް ހިމެނޭ ކަމާއި، އެ އިޖުރާއަތްތައް ކުރިއަށް ގެންދަން އިންފޮމޭޝަން ކޮމިޝަނަރުގެ އޮފީހަށް ގާނޫން ލިބިދޭ ބާރުތަކެއް ވެސް ހިމެނޭ ކަމަށް ހުކުމުގައި ފާހަގަކޮށްފައިވެ އެވެ.
އިންފޮމޭޝަން ކޮމިޝަނަރުގެ އޮފީހަށް ލިބިދޭ ބާރުތަކުގެ ތެރޭގައި މައުލޫމާތު ހުރި އިދާރާގެ ކަމާ ބެހޭ ފަރާތްތައް ކޮމިޝަނަށް ހާޒިރުކުރުމާއި، ވަކި މައުލޫމާތެއް ފޮނުވުމަށް އެންގުމާއި، އެ މައުލޫމާތެއް މުތާލިއާ ކުރުމާއި، ވަކި ލިޔެކިޔުންތަކެއް ހުރި ކަން ބެލުމަށް ދައުލަތުގެ އިދާރާއަށް ވަދެ ބެލުމުގެ ބާރު ހިމެނެ އެވެ.
އެއިން އެއްވެސް ބާރެއް ބޭނުން ނުކޮށް، ހަމައެކަނި ޑިފެންސް މިނިސްޓްރީ އާއި އެމްއެންޑީއެފްއާއެކު އިންފޮމޭޝަން ކޮމިޝަނަރުގެ އޮފީހުން ބޭއްވި ސިއްރު ބައްދަލުވުމެއްގައި ދިން މައުލޫމާތަކަށް، ގައުމީ ސަލާމަތަށް ނުރައްކާވާ ކަމަށް ކަނޑަނޭޅޭނެ ކަމަށް ހައި ކޯޓުގެ ހުކުމުގައިވެ އެވެ.
މައުލޫމާތު ހޯދުމާއި ލިބިގަތުމުގެ ގާނުނަށާއި، ޑިމޮކްރެޓިކް ގައުމުތަކުގައި ނިންމާފައިވާ މިފަދަ މައްސަލަތަކުގެ ގަޒިއްޔާތަކަށް ހަވާލާދީ، ހުކުމުގައި ބަޔާންކޮށްފައިވަނީ ނިންމުމަށް ވާސިލުވުމުގައި ގައުމީ ސަލާމަތަށް ލިބިދޭ ގެއްލުމެއް ސާފުކޮށް ބަޔާން ކުރެވިފައި އޮންނަން ޖެހޭނެ ކަމަށެވެ.
އިންފޮމޭޝަން ކޮމިޝަނަރުގެ އޮފީހުން ނިންމި ނިންމުމަށް ވާސިލުވި ސަބަބުތައް އެކަށީގެންވާ ވަރަށް ތަފްސީލުކޮށް، މައުލޫމާތަށް އެދިފައިވާ ފަރާތަށް ހިއްސާކޮށްދީފައިނުވާ ކަމަށް ވެސް ހުކުމުގައިވެ އެވެ.
އެހެންކަމުން މި މައްސަލައަކީ އިންފޮމޭޝަން ކޮމިޝަނަރުގެ އޮފީހުން އަލުން ގޮތެއް ނިންމަން ޖެހޭ މައްސަލައެއް ކަމަށް ހައި ކޯޓުން ކަނޑައެޅި އެވެ. އެ ގޮތުން މިއަދުން ފެށިގެން 10 ދުވަހުގެ ތެރޭގައި، އެ ކޮމިޝަނަށް ހުށަހަޅައިފިނަމަ އެ މައްސަލަ އިޖުރާއަތްތައް ފުރިހަމަކޮށްގެން ބެލުމަށް އަމުރުކޮށްފައިވެ އެވެ.
ގައުމީ ސަލާމަތަށް ނުރައްކާވާ މައުލޫމާތެއް ގޮތަށް އޭރު ނިންމި އެއް ސަބަބަކީ އެ އޮޕަރޭޝަންތަކަކީ އިންޑިއާއާއެކު ރާއްޖޭން ހަދާފައިވާ "ސިއްރު" އެއްބަސްވުމެއްގެ ތެރެއިން ކުރިއަށްދާ ކަންކަމަށް ވުމެވެ. އެހެންކަމުން ދޭދޭ ގައުމާ ދެމެދު ހަދާފައިވާ އެފަދަ އެއްބަސްވުމެއްގެ މައުލޫމާތެއް ހާމަކުރުމަކީ، އެ ގައުމަކާ މެދު ގުޅުން ގޯސްވެ އޭގެ ނުރައްކާ އަންނާނެ ކަމެއް ކަމަށް ބުނެ އެވެ.
އިންޑިއާ އަސްކަރިއްޔާއިން ރާއްޖެއަށް ހަދިޔާކޮށްފައިވާ ދެ ހެލިކޮޕްޓަރަކާއި ޑޯނިއާ މަތިންދާ ބޯޓެއް އޮޕަރޭޓް ކުރުމުގައި އެ ގައުމުގެ އިންސާނީ ހިދުމަތްތެރީންގެ ގޮތުގައި 75 މީހަކު ތިބި ކަމަށް މީގެ ކުރިން ޑިފެންސް މިނިސްޓްރީން ބުނެފައިވެ އެވެ. އެއީ ކޮންމެ އުޅަނދަކަށް 25 މީހުންގެ މަގުންނެވެ.
މި ސަރުކާރުން ބުނާ ގޮތުގައި އިންޑިއާގެ ހަތިޔާރު އެޅި އަސްކަރީ އެއްވެސް ސިފައިންގެ މީހަކު ރާއްޖޭގައި ނެތެވެ.
އެއިން އެއް ހެލިކޮޕްޓަރު އޮންނަނީ ލ. ކައްދޫގަ އެވެ. އަނެއް ހެލިކޮޕްޓަރަކީ އައްޑު ސިޓީ ގަމުގައި އޮންނަ އުޅަނދެކެވެ. ޑޯނިއާ މަތިންދާ ބޯޓު އޮންނަނީ ހދ. ހަނިމާދޫގަ އެވެ.
އެއިން އެއް ހެލިކޮޕްޓަރު ގެނައީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އަނެއް ހެލިކޮޕްޓަރަކީ، އިންޑިއާ ސިފައިން ތިބުމަށް މިހާރު ދެކޮޅު ހަދާ ކުރީގެ ރައީސް އަބްދުﷲ ޔާމީނުގެ ވެރިކަމުގައި ގެނައި އުޅަނދެކެވެ. ޑޯނިއޯ މަތިންދާބޯޓު ގެނައީ މިހާރު ދައުރު ނިމެން ގާތްވެފައިވާ ރައީސް އިބްރާހިމް މުހައްމަދު ސޯލިހުގެ ވެރިކަމުގަ އެވެ.
