މީޑިއާތަކަށް އާންމުން ކުރާ އިތުބާރު ދެނެގަތުމަށް ގައުމީ ފެންވަރުގައި ދިރާސާއެއް ކުރަން ވިލާ ކޮލެޖުގެ އިންސްޓިޓިއުޓް ފޯ ރިސާޗް އެންޑް އިނޮވޭޝަނުން ނިންމައިފި އެވެ.
އެ ކޮލެޖުން މިއަދު ކޮށްފައިވާ އިއުލާނެއްގައި ބުނެފައިވަނީ، މީޑިއާތަކަށް އާންމުން ކުރާ އިތުބާރު ދެނެގަތުމަށް ގައުމީ ފެންވަރުގައި ކުރާ ދިރާސާއެއް ކުރުމުގައި އަމަލީ ގޮތުން ހަރަކާތްތެރިވާނެ މީހުން ބޭނުންވާކަމަށެވެ. އެގޮތުން މާލޭގެ އިތުރުން ރާއްޖެ ތެރޭގެ 43 ރަށަކުން އެނިއުމަރޭޓަރުން ބޭނުންވާކަމަށް ބުނެފައިވެ އެވެ.
މި ދިރާސާއަށް މައުލޫމާތު އެއްކުރުމުގެ މަސައްކަތް ކުރިއަށްދާނީ މި މަހުގެ 20 ވަނަ ދުވަހުން ފެށިގެން އަންނަ ޑިސެމްބަރު 23 ގެ ނިޔަލަށެވެ. އަދި މި މަސައްކަތް ފެށުމުގެ ކުރިން ހުރިހާ އެނިއުމަރޭޓަރުންނަށް ހާއްސަ ތަމްރީނު ޕްރޮގްރާމެއް ކުރިއަށް ގެންދާނެކަމަށް ވިލާ ކޮލެޖުން މައުލޫމާތުދެ އެވެ.
މި ތަމްރީނު ޕްރޮގްރާމު ކުރިއަށް ދާނީ ނޮވެމްބަރު 13، އިން 19 ވަނަ ދުވަހުގެ ނިޔަލަށެވެ.
ވިލާ ކޮލެޖުން ބުނީ ދިރާސާއަށް ބޭނުންވާ މައުލޫމާތު ހޯދުމަށް ގޭގެއަށް ގޮސް ސާވޭކުރަންޖެހޭނެ ކަމަށެވެ. އަދި ފުރިހަމަ ކުރާ ކޮންމެ ސާވޭއަކަށް 100ރ. ލިބޭނެ ކަމަށާއި، އެނިއުމަރޭޓަރުންނަށް ޑާޓާ އެލަވަންސް ވެސް ލިބޭނެކަމަށް އިއުލާނުގައި ބުނެފައިވެ އެވެ.
މި ދިރާސާގެ އެނިއުމަރޭޓަރަކަށް ވާން ބޭނުންވާ ފަރާތްތަކަށް މި ލިންކު މެދުވެރިކޮށް ރަޖިސްޓްރީ ކުރެވޭނެ އެވެ.
