1990 ގެ އަހަރު ތަކުގައި ހުރި ގޮތާއި ދާދި އެއްގޮތަކަށް، މާފަންނު ގަޑިބުރު ހަދަން ފަށައިފި އެވެ.
މާލޭ ސިޓީ ކައުންސިލުން ބުނީ ގަޑިބުރު އަލުން ހަދަނީ، ކުރިން ވެސް ހުރި ގޮތާއި އެއް ގޮތަށް، ނަމަވެސް ވަށައިގެން ލެޑް ބޯޑު ހަރުކޮށް އިޝްތިހާރު ކުރެވޭ ގޮތަށެވެ. ސިޓީ ކައުންސިލުން ބުނީ އަމިއްލަ ކުންފުންޏެެއްްގެ ހަރަދުގައި އެ މަސައްކަތް ކުރަނީ، އާރުސީސީ އާ ހަވާލުކޮށްގެން ކަމަށެވެ.
ފަނޑިޔާރު މަގާއި، ފަރީދީ މަގާއި އޯކިޑު މަގާއި ފުނަ ގޯޅި ގުޅޭ ހަތަރު އަނގޯޅީގައި ގަޑިބުރު އަލުން ހެދުމަށް، ސިޓީ ކައުންސިލުން 2021 ވަނަ އަހަރުގެ ސެޕްޓެމްބަރު މަހު އިއުލާނެއް ކޮށްފައިވެ އެވެ. އެ އިއުލާނު ކޮށްފައިވަނީ ކައުންސިލުން ދޭ ނަމޫނާ އާ އެއްގޮތަކަށް އަމިއްލަ ހަރަދުގައި ގަޑިބުރު ހަދައިދޭނެ ބަޔަކު ހޯދުމަށެވެ.
"މި ގަޑިބުރު ތަރައްގީ ކުރަން ބޭނުންވަނީ ގަޑިބުރުވަށައި ލެޑްބޯޑް ހަރުކޮށްފައި، އެ ބޯޑުގައި އެފަރާތަކުން ބޭނުންވާގޮށް އިޝްތިހާރު ކުރެވޭގޮތަށެވެ." އެ އިއުލާނުގައި ބުނެފައިވެ އެވެ.
މާފަންނު ގަޑިބުރުގައި 1990 އަހަރު ބެހެއްޓި ގަޑި: އަލުން ހަދަނީ ވެސް ގަޑި ބަހައްޓާ ގޮތަށް -- ފައިލް ފޮޓޯ
ފުރަތަމަ ގަޑިބުރު ބެހެއްޓީ ރާއްޖޭގެ މިނިވަން ކަމަށް 25 އަހަރު ފުރުމުގެ މުނާސަބަތާއި ގުޅިގެން 1990 ވަނަ އަހަރު އެވެ. ލަންކާ ސަރުކާރުން ހަދިކުރި އެ "ގަޑިބުރު" ހުޅުއްވައިދެއްވީ އޭރުގެ ލަންކާގެ ބޯޑުވަޒީރެވެ. ގަޑިބުރު ހުރީ ގާތް ގަނޑަކަށް 30 ފޫޓުގެ އުސްމިނުގައި، ފަސް ތަނބު ޖަހައި ތިން ބަޔަކަށް ހަދައި ކުރިބޯއްޓެއް ހަރުކޮށް، އެންމެ މަތީ ބައިގައި ވަށައިގެން ގަޑި ހަރުކޮށްފަ އެވެ.
މުންނާރެއް ގޮތަށް ހުރި ގަޑިބުރު، ދެ ހާހުގެ އަހަރުތައް ފެށުމުގެ ކުރިން ތަޅާލި އެވެ. އޭރު ގަޑިބުރު ނެގީ، ލަންކާގެ ފައްޅިއެއްގައި ހުރި ތަނަކާއި އެތަން ވައްތަރުވުމުން ކަމަށް ވާހަކަ ދެކެވުނުވެ.
އޭގެ ފަހުން އެކި ފަހަރު މަތިން ތަފާތު ބަދަލުތައް ގަޑިބުރަށް ގެނެސްފައި އެވެ. ރައީސް އަބްދުﷲ ޔާމިންގެ ވެރިކަމުގައި އެކަނި ވެސް ދެ ބުރަށް އެތަނަށް ބަދަލު ގެނަ އެވެ.
