ސަރުކާރު ބަދަލުވުމުގެ އިންތިގާލީ މަރުހަލާގައި ހުޅުމާލޭގެ ބިންތަކާ ގުޅޭ ވިޔަފާރީގެ މުއާމަލާތްތަކެއް ނިންމުމަށް އާބަންކޯއިން މަސައްކަތް ކުރަމުން ދާކަން ފާހަގަވެފައިވާ ކަމަށާއި އަވަސް އަރުވައިލައިގެން އެފަދަ ނިންމުމެއް ނުނިންމުމަށް އިންތިގާލީ އޮފީހުން އިލްތިމާސް ކޮށްފި އެވެ.
އެ އޮފީހުން މިއަދު ނެރުނު ނޫސް ބަޔާނެއްގައި ބުނެފައި ވަނީ ހުޅުމާލޭގެ ބިންތަކާ ގުޅޭ ވިޔަފާރީގެ އެކި މުއާމަލާތްތަކާ ގުޅޭ ތަފާތު 40 އައިޓަމެއް އާބަންކޯ ބޯޑުގެ ދެން އޮންނަ ބައްދަލުވުމަކަށް އެޖެންޑާކޮށްފައިވާ ކަމުގެ މައުލޫމާތު އިންތިގާލީ އޮފީހަށް ލިބިފައިވާ ކަމަށާއި އެކަމާ މެދު އެ އޮފީހުން ނުހަނު ކަންބޮޑުވާ ކަމަށެވެ.
"ހުޅުމާލޭގެ ބިންތަކަކީ، ދިވެހި ދައުލަތުގެ ރައުސްމާލުގައި ހިމެނޭ އެންމެ އަގު ބޮޑު 'އެސެޓް'ތައްކަމުން، މި މަރުޙަލާގައި އަވަސް އަރުވާލައިގެން، އެ ބިންތަކާ ގުޅޭ ވިޔަފާރީގެ މުޢާމަލާތްތައް ހިންގުމަކީ މި އޮފީހުން ކަންބޮޑުވާ ކަމެކެވެ،" އިންތިގާލީ އޮފީހުގެ ބަޔާނުގައި ބުނެފައިވެ އެވެ.
އާބަންކޯގެ ބޯޑުގެ ދެން އޮންނަ ބައްދަލުވުމަކަށް އެޖެންޑާކޮށްފައިވާ އައިޓަމްތަކުގެ ތެރޭގައި ބޭރުގެ ފަރާތްތަކަށް ބިން ކުއްޔަށް ދޫކުރުމުގެ މުއާމަލާތަކެއް ވެސް ހިމެނޭކަމަށް އެ ބަޔާނުގައި ބުނެފައިވެ އެވެ.
ބަޔާނުގައި އިތުރަށް ބުނެފައި ވަނީ އާބަންކޯގެ އެ ނިންމުމުގެ ސަބަބުން އަލަށް އުފެދޭ ސަރުކާރުގެ ސިޔާސަތުތައް ހިންގުމަށް ހުރަސްއެޅިގެން ދާނެ ކަމަށާއި އެކަމުގެ ސަބަބުން ރާއްޖޭގެ މުޅި ދައުލަތަށް ގެއްލުން ލިބުމުގެ ފުރުސަތު އޮންނާނެ ކަމަށެވެ.
"މި މަރުހަލާގައި މި ފަދަ މުއާމަލާތްތައް މަޑުޖައްސާލައި، ހުރިހާ އިދާރާތަކާއި މުއައްސަސާތަކާއި ކުންފުނިތަކުން، އިންތިގާލީ މަރުހަލާގެ ރޫހާ އެއްގޮތަށް އަމަލުކުރުމަށް އިލްތިމާސް ކުރަމެވެ،" އެ ބަޔާނުގައި ބުނެފައިވެ އެވެ.
އިންތިގާލީ އޮފީހުގެ ބަޔާނުގައި ބުނެފައި ވަނީ އެފަދަ އަމަލުތައް ހުއްޓުވައި ދިވެހި ރައްޔިތުންގެ މަތީ މަސްލަހަތުތައް ހިމާޔަތް ކުރުމަށް ގާނޫނީ ނިޒާމުގެ ތެރެއިން މުއައްސަސާތައް މެދުވެރިކޮށް ކުރަންޖެހޭ މަސައްކަތްތައް އެ އޮފީހުން ކުރަމުން ގެންދާނެ ކަމަށެވެ.
