ޕްރޮގްރެސިވް ޕާޓީ އޮފް ދަ މޯލްޑިވްސް (ޕީޕީއެމް)ގެ ނަމުގައި ސްކޭމް މެސެޖުތަކެއް ފޮނުވާތީ, ސަމާލުވާން އެ ޕާޓީން އިލްތިމާސްކޮށްފި އެވެ.
ޕީޕީއެމުން ބުނީ އެ ޕާޓީގެ ނަމުގައި ސްކޭމް މެސެޖުތަކެއް ފޮނުވަމުން ދަނީ ޑީއެޗްއެލްގެ ލިންކާއެކު ކަމަށެވެ. އަދި އެ މެސެޖްގައިވާ ލިންކަށް ނުވަމުނަށް އެ ޕާޓީން ވަނީ އެދިފަ އެވެ.
ސްކޭމް މެސެޖުތަކާއި ކޯލުތަކުގެ މައްސަލަ ދޭތެރެ ދޭތެރެއިން ފެންމަތިވެ އެވެ. މި ފަދަ މެސެޖުތަކާއި ކޯލުތަކަށް ހެއްލި ބައެއް ފަހަރު މީހުންނަށް އެކި ވަރުގެ ފައިސާގެ ގެއްލުން ވަނީ މީގެ ކުރިން ލިބިފަ އެވެ.
މަކަރާއި ހީލަތުން ފައިސާ ހޯދުމަށްޓަކައި, އެކި މުއައްސަސާތަކުގެ ނަމުގައި މިފަދަ ސްކޭމް މެސެޖުތައް ފޮނުވަމުންދެ އެވެ. އެގޮތުން, ޕޯސްޓް އޮފީހާއި ޑީއެޗްއެލްގެ ނަމުގައި ފޮނުވާ ސްކޭމް މެސެޖުތައް މިފަހަކަށް އައިސް ވަނީ އިތުރުވެފަ އެވެ.
އެންމެ ގިނައިން ސްކޭމް މެސެޖުތަކާއި ފޯނު ކޯލުތައް ކުރަމުންދާކަން ފާހަގަކުރެވިފައި ވަނީ ބޭންކް އޮފް މޯލްޑިވްސްގެ ނަމުގަ އެވެ.
މިފަދަ ގޮތްނޭނގޭ މެސެޖުތަކަށް ސަމާލުވެ، މިހާރު ދައުރުވަމުންދާ މެސެޖުތަކަށް ފަރުވާތެރިވާން ފުލުހުން އިލްތިމާސްކުރެ އެވެ.
