މި އަހަރުގެ ޖުލައި މަހުން ފެށިގެން މިހާތަނަށް އެންޓި ކޮރަޕްޝަންސް ކޮމިޝަން (އޭސީސީ) އަށް ޖުމްލަ 321 މައްސަލަ ހުށަހަޅާފައިވާ ކަމަށް އެ ކޮމިޝަނުން ބުނެފި އެވެ.
މި ސަރުކާރުގެ މައްޗަށް ތުހުމަތު ކުރެވޭ ވައްކަމާއި ހިޔާނާތުގެ މައްސަލަތައް ބަލަން ދަ ޑިމޮކްރެޓްސްގެ އިސް މެމްބަރުން ގޮވާލަން ފެށުމާ ގުޅިގެން "އަދަދު" އިން ސުވާލުކުރުމުން އޭސީސީގެ މީޑިއާ އޮފިޝަލު ވިދާޅުވީ، ހުށަހެޅި 321 މައްސަލާގެ ތެރެއިން ރަޖިސްޓްރީ ކުރެވި ބަލެމުންދަނީ 190 މައްސަލަ ކަމަށެވެ.
އަންނަ މަހުގެ 17 ގައި އަލަށް އިންތިހާބުވި ރައީސް، ޕީއެންސީގެ ޑރ. މުހައްމަދު މުއިއްޒު ހުވާ ކުރައްވާއިރު، ނިމިގެންދާ ސަރުކާރުގެ މައްސަލަތައް ބެލުމަށް އެދި ޕީއެންސީ ކޯލިޝަނުގެ އިތުރުން އެންމެ އަޑުގަދަކޮށް ގޮވަމުން އަންނަނީ ޑިމޮކްރެޓުންނެވެ.
މިނިސްޓްރީތަކާއި ސަރުކާރު ހިއްސާވާ ކުންފުނިތަކުން ނިމިގެންމިދާ ދައުރުގައި ގިނަ ހިޔާނާތްތަކެއް ހިންގާފައިވާ ކަމަށާއި އެ މައްސަލަތައް އޭސީސީއިން ބަލަން ޖެހޭ ކަމަށް އެޕާޓީން ގެންދަނީ ބުނަމުންނެވެ.
ހާއްސަކޮށް، އެ ޕާޓީ ލީޑުކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެމްޑީޕީއިން ދެވަނަ ފަހަރަށް ހުށަހަޅަން ނިންމުމާއެކު އެ ޕާޓީގެ އިސްވެރިން ދަނީ އެމްޑީޕީ އަދި މި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
ހެންވޭރު ހުޅަނގު ދާއިރާގެ މެމްބަރު އަދި ދަ ޑިމޮކްރެޓްސްގެ ޗެއާޕާސަން ހަސަން ލަތީފު ވިދާޅުވީ އެ ޕާޓީން އަބަދު ވަކާލާތު ކުރަމުން އައި، އެއް ކަމަކީ ވައްކަމާއި ކޮރަޕްޝަންގެ މައްސަލަތައް އިތުބާރު ހިފޭ ގޮތަކަށް ބެލުމެވެ.
"ރައީސް ސޯލިހު އާއި އެމްޑީޕީ ސަރުކާރުގެ ވައްކަމާއި ކޮރަޕްޝަންގެ މައްސަލަތައް ބަލަން ޖެހޭ،" އޭނާގެ ޕޯސްޓުގައިވެ އެވެ.
ރައްޔިތުންގެ މަޖިލީހުގެ ނައިބު ރައީސް، އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވީ ޑިމޮކްރެޓުން އެމްޑީޕީން ވަކިވި މައިގަނޑު ސަބަބަކީ ރައީސް ސޯލިހު ސަރުކާރުގެ ހުއްޓުމެއް ނެތި ހިންގާ ހިޔާނާތާއި، ރިޝްވަތުގެ ނެޓްވޯކް ކަމަށެވެ. އެ ނެޓްވޯކުގައި ރައްޔިތުންގެ މަޖިލީހުގެ މެމްބަރުންނާއި ވަޒީރުންނާއި ކުންފުނިތަކުގެ މެނޭޖިން ޑިރެކްޓަރުން އަދި ރައީސް ސޯލިހާ ގާތް ބޭފުޅުން ހިމެނޭ ކަމަށް ވިދާޅުވެފައިވެ އެވެ.
"ތަހުގީގުކޮށް، ނެޓްވޯކް އިންސާފުގެ ކުރި މައްޗަށް ގެންނަން ޖެހޭ" އީވާ ގޮވާލެއްވި އެވެ.
އޭގެ އިތުރުންވެސް، ގިނަ ޕޯސްޓުތަކެއްގައި އެ ޕާޓީގެ އެކި އެކްޓިވިސްޓުންނާއި އިސްވެރިން އަންނަނީ މި ވެރިކަމުގެ 'ވައްކަންތައް' ބެލުމަށް ގޮވާލަމުންނެވެ.
