ރައްޔިތުންގެ މަޖިލީހުގެ މުވައްޒަފުންނަށް ދޭ ބައެއް އެލަވަންސްތައް އަންނަ އަހަރު ބޮޑުކުރަން މިއަދު ހުށަހަޅައިފި އެވެ.
މަޖިލީހުގެ އިދާރީ މުވައްޒަފުންގެ އަދަދަކީ 164 އެވެ.
ރައްޔިތުންގެ މަޖިލީހުގެ އަންނަ އަހަރުގެ ބަޖެޓުގެ ގޮތުގައި އާއްމު ކޮމިޓީއަށް ހުށަހެޅީ 186 މިލިއަން ރުފިޔާގެ ބަޖެޓެކެވެ. ނަމަވެސް މަޖިލީހުގެ މުވައްޒަފުންގެ މުސާރަ ބޮޑުނުކުރާތާ 11 އަހަރުވެފައިވާތީ މުސާރަ ބޮޑުކުރަން ފެންނަ ކަމަށް ކޮމިޓީން ލަފާ ދިނުމުން އެކަމަށް ހިނގާނެ ހަރަދު ބަލައި މަޖިލީހުގެ އިދާރާއިން ވަނީ އާއްމު ކޮމިޓީއަށް މިއަދު ރިޕޯޓެއް ހުށަހަޅައިފަ އެވެ.
އާންމު ކޮމިޓީގައި އަމީންއާންމު ފާތިމަތު ނިޔުޝާ ވިދާޅުވީ މަޖިލީހުން މިހާރު ނިންމާފައިވަނީ މުވައްޒަފުންގެ އަސާސީ މުސާރަ ބޮޑުކުރުމުގެ ބަދަލުގައި އެލަވަންސްތައް އިތުރު ކުރުމަށެވެ. އެގޮތަށް ނިންމީ އަސާސީ މުސާރައަށް ބަދަލު ގެނެސްފި ނަމަ އިތުރު ގަޑި އާއި ޕެންޝަނަށް ދައްކާ ފައިސާ އިތުރުވެ ބަޖެޓަށް ބާރުބޮޑުވާނެތީ ކަމަށް އޭނާ ވިދާޅުވި އެވެ.
މުސާރަ ބޮޑުކުރުމަށް ހުށަހެޅި ގޮތް
- ޕާލިމަންޓް ސާވިސް ނަމުގައި ހާޒިރުވާ ކޮންމެ ދުވަހަކަށް މިހާރު ދޭ 200ރ ގެ އެލަވަންސް ހާޒިރީ އެލަވަންސް އަށް ބަދަލުކުރުން
- ޕާލިމަންޓްރީ ސާވިސް އެލަވަންސް އަށް ބޭސިކްގެ މުސާރައިގެ 20 ޕަސެންޓް ދިނުން
- މާސްޓާސް ސެޓްފިކެޓް އޮންނަ މުވައްޒަފުންގެ އެލަވަންސް 1،500ރ އިން 2،000ރ އަށް ބޮޑުކުރުން
- ޑިގްރީ ސެޓްފިކެޓް އޮންނަ މުވައްޒަފުންގެ އެލަވަންސް 1،000ރ އިން 1،500ރ އަށް ބޮޑުކުރުން
- ޑިޕްލޮމާ ސެޓްފިކެޓް އޮންނަ މުވައްޒަފުންގެ އެލަވަންސް 7،00ރ އިން 1،000ރ އަށް ބޮޑުކުރުން
- ޓެކްނިކަލް ސެޓްފިކެޓް އޮންނަ މުވައްޒަފުންނަށް ދޭ އެލަވަންސް 500ރ އިން 700ރ އަށް ބޮޑުކުރުން
މަޖިލީހުގެ ޖަލްސާތަކަށާއި ހާއްސަ އިވެންޓުތަކަށް ކޯޓު ލައިގެން ހާޒިރުވާންޖެހޭ މުވައްޒަފުންނަށް އަހަރަކު ދެ ފަހަރު ދޭ 5،100ރ. ގެ އެލަވަންސް ކުޑަކޮށް، އެ އެލަވަންސް ހުރިހާ މުވައްޒަފުންނަށް ދޭން ވެސް ވަނީ ހުށަހަޅައިފަ އެވެ.
ނިއުޝާ ވިދާޅުވީ ހުށަހަޅާފައިވާ ގޮތައް މުވައްޒަފުންގެ އެލަވަންސްތައް ބޮޑުކުރުމުން މަޖިލީހުގެ ޖުމުލަ ބަޖެޓަށް އިތުރުވާނީ އަހަރަކު 4.6 މިލިއަން ރުފިޔާ އެވެެ. އެހެންކަމުން މަޖިލީހުގެ އަންނަ އަހަރުގެ ބަޖެޓު 190 މިލިއަން ރުފިޔާއަށް އަރާނެ އެވެ.
