ކ. ދޫނިދޫ ކައިރި ކަނޑުން ފެނުނީ ރޭ މާލޭގެ ރަސްފަންނު ކައިރިން މޫދަށް ފުއްމާލި މީހެއްގެ ހަށިގަނޑު ކަމަށް ސިފައިން މިއަދު ބުނެފި އެވެ.
އެމްއެންޑީއެފްއިން މިއަދު ނެރުނު ބަޔާނެއްގައި ބުނީ އޭނާ ރަސްފަންނު ކައިރިން މޫދަށް ފުއްމާލި ކަމަށް ރިޕޯޓުކުރީ ރޭ 7:45 ހާއިރު ކަމަށެވެ. އެވަގުތުން ފެށިގެން އޭނާ ހޯދުމުގެ މަސައްކަތް ފެށި ކަމަށް ވެސް ސިފައިން ބުންޏެވެ.
"މި މީހާގެ ހަށިގަނޑު ފެނިފައިވަނީ، ދޫނިދޫ ކައިރިން ދަތުރުކުރި އެމްޓީސީސީގެ ފެރީގެ ފަޅުވެރިންނަށް،" ސިފައިން ބުނެފައިވެ އެވެ.
ފުލުހުން ބުނީ އެމީހާގެ ހަށިގަނޑު ފެނުނީ ދޫނިދޫ އާއި ފުނައްޑޫއާ ދޭތެރޭ ކަނޑުން ކަމަށެވެ. އޭނާގެ ހަށިގަނޑު ފެނުނީ މިއަދު ހެނދުނު 9:45 ހާއިރެވެ.
އޭނާ ފުއްމާލި ވަގުތު އޭނާގެ ހަށިގަނޑު މޫދު ކައިރިން ފެންނަން އޮތް ކަމަށް ފުލުހުން ބުންޏެވެ. ނަމަވެސް އޭނާ ސަލާމަތް ކުރުމަށް ފުލުހަކު ފަތާފައި އެހިސާބަށް ދިޔުމުގެ ކުރިން ހަށިގަނޑު ގެއްލުނީ ކަމަށް ފުލުހުން ބުންޏެވެ.
"ސީންއަށް އެޓެންޑުވި ފުލުހަކު އޭނާ ސަލާމަތް ކުރުމަށް މޫދަށް ފުއްމާލައިގެން މަސައްކަތްކޮށްފައިވޭ. ނަމަވެސް ފަތާފައި އެމީހާއާ ހަމައަށް ދިޔުމުގެ ކުރިން އެމީހާ ވަނީ ވީނުވީއެއް ނޭނގި ގެއްލިފައި،" ފުލުހުން ބުންޏެވެ.
އޭނާ ހޯދުމަށް ރެއިން ފެށިގެން ރަސްފަންނު ކައިރިން 41590 އަކަ މީޓަރުގެ ސަރަހައްދެއް ސިފައިން ބެލި ކަމަށް އެމްއެންޑީއެފް އިން ބުނެ އެވެ.
ފުލުހުންގެ އެހީތެރިކަމާއެކު އޭނާގެ ހަށިގަނޑު މިހާރު ވަނީ މާލެ ގެނެސްފަ އެވެ. އެ މީހާއާ ބެހޭ އިތުރު ތަފުސީލެއް ފުލުހުން އަދި ސިފައިން ވެސް ނުދެ އެވެ.
