ދަ ޑިމޮކްރެޓްސްގެ އެތެރޭގެ މަގާމުތަކަށް ކުރިމަތިލުމުގެ ފުރުސަތު އިއްޔެ ހުޅުވާލައިފި އެވެ.
ޑިމޮކްރެޓްސް އިން ކުރި އިއުލާނެއްގައި ބުނީ، ހަ ގިންތިއަކުން ގިނަ މަގާމުތަކަކަށް ކުރިމަތިލުމުގެ ފުރުސަތު އިއްޔެއިން ފެށިގެން ހުޅުވާލާ ކަމަށެވެ. ޑިމޮކްރެޓްސް އެތެރޭގެ އިންތިހާބުގައި ވާދަކުރުމަށް ފޯމު ހުށަހެޅުމުގެ ސުންގަނޑިއަކީ ނޮވެމްބަރު 15، ގެ ރޭގަނޑު 10:00 އެވެ.
ޑިމޮކްރެޓްސްގެ އެތެރޭގެ އިންތިހާބު ބާއްވާނީ އަންނަ ޑިސެމްބަރު 2، ގަ އެވެ.
ފޯމު ހުށަހަޅާއިރު އެ ކެންޑިޑޭޓަކަށް ތާއީދުކުރާ އަދި އަތޮޅެއް، ސިޓީއެއް، ރަށެއް ނުވަތަ ދާއިރާއަކަށް ނިސްބަތްވާ، މަދުވެގެން 20 ޑިމޮކްރެޓެއްގެ ނަމާ މައުލޫމާތު ލިންކުގައިވާ ތާއީދުފޯމު މެދުވެރިކޮށް ހުށަހަޅަން ޖެހޭނެ ކަމަށް އެޕާޓީން ބުނެ އެވެ.
ޑިމޮކްރެޓްސްއިން ބުނީ ފޯމު ހުށަހަޅާ ތަރުތީބުން ކެންޑިޑޭޓުން ތަރުތީބުކުރަމުން ކެންޑިޑޭޓް ނަމްބަރު ދެމުން ލިސްޓް އާންމުކުރަމުން ގެންދާނެ ކަމަށާއި ފޯމުގައިވާ މައުލޫމާތު ފުރިހަމަ ނުވެގެން އަލުން ފޯމު ހުށަހަޅާ ނަމަ، އަސްލު ފޯމުކަމަށް ބެލެވޭނީ އެންމެ ފަހުން ހުށަހެޅި ފޯމު ކަމަށެވެ.
މިދިޔަ ޖުލައި މަހު އުފެއްދި ޑިމޮކްރެޓްސް އިން ވަނީ އެންމެ ފަހުން ބޭއްވި ރިޔާސީ އިންތިހާބުގައި ވާދަކޮށްފަ އެވެ. އިންތިހާބުގެ ފުރަތަމަ ބުރުގައި ވާދަކޮށް ތިންވަނައަށް އެންމެ ގިނަ ވޯޓު ލިބުނީ އެ ޕާޓީއަށެވެ. ދެވަނަ ބުރުގައި އެ ޕާޓީން އެއްވެސް ބަޔަކަށް ތާއީދެއް ނުކުރެ އެވެ.
