މި ވަގުތަށް މުހިންމު އިންތިހާބުތަކެއް ހުރުމުން, އެމްޑީޕީގެ ރައީސާއި ނައިބު ރައީސް ހޮވުމުގެ އިންތިހާބު ފަސްކޮށްފައިވާ ކަމަށް އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވެއްޖެ އެވެ.
"އަދަދު" އިން ކުރި ސުވާލަކަށް ޖަވާބުދެއްވަމުން އިބުރޭ ވިދާޅުވީ އެމްޑީޕީން މިވަގުތު އިސްކަން ދެނީ, މާލޭ މޭޔަރުގެ އިންތިހާބާއި, މަޖިލިސް އިންތިހާބުގެ ޕްރައިމަރީއަށް ކަމަށެވެ. މަޖިލިސް ޕްރައިމަރީ އެންމެ ލަސްވެގެން ޖެނުއަރީ މަހު ބާއްވަން ޖެހޭކަން ފާހަގަ ކުރައްވާ އިބުރޭ ވިދާޅުވި ގޮތުގައި އިންތިހާބުތަކަށް ޝެޑިއުލްއެއް ހެދުމުގެ މަސައްކަތް މިހާރު ކުރަމުންދާ ކަމަށެވެ.
ޕާޓީގެ ރައީސާއި ނައިބު ރައީސްގެ އިތުރުން ބައެއް ދާއިރާތަކުގައި ވެސް ހުސްވެފައިވާ މަގާމުތަކަށް މީހުން އިންތިހާބު ކުރަން އޮތީ ޖެހިފަ އެވެ. އިބުރޭ ވިދާޅުވީ, ޕާޓީގެ އެތެރޭގެ މަގާމުތަކަށް މީހުން ހޮވުމުގެ އިންތިހާބު ބާއްވާނީ އެކުއެކުގައި ކަމަށެވެ.
އެހެން ނަމަވެސް އެ އިންތިހާބު ބާއްވާނެ ތާރީހެއް ކަނޑަނާޅާ ކަމަށް އިބުރޭ ވިދާޅުވި އެވެ. އޭނާ ވިދާޅުވީ އިންތިހާބުތައް ބާއްވާނެ ތާރީހުތައް ކަނޑައަޅާނީ, ކުރިއަށް އޮތް އިންތިހާބުތަކާއި, ސްކޫލު ޗުއްޓީފަދަ ކަންކަމަށް ބަލާފައި ފުށު ނާރާނެ ގޮތަކަށް ކަމަށެވެ.
އެމްޑީޕީގެ ލީޑާޝިޕްގެ އެންމެ އިސް ދެ މަގާމު ހުސްވީ އެ ޕާޓީގެ ރައީސް ކަމުގައި ހުންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް ކަމުގައި ހުންނެވި މުހައްމަދު ޝިފާޒު (ސިއްޕެ) އެ ޕާޓީން ވަކިވުމުންނެވެ.
އެމްޑީޕީގެ އެއް ބާނީ، އަދި އެ ޕާޓީގެ ފުރަތަމަ ސަރުކާރުގެ ރައީސް ކަން ވެސް ކުރެއްވި ނަޝީދު ސަތާރަ އަހަރަށް ފަހު އެ ޕާޓީ ދޫކޮށްލެއްވީ އެތެރޭގެ ރިޔާސީ ޕްރައިމަރީގައި ރައީސް އިބްރާހިމް މުހައްމަދު ސޯލިހާ ވާދަކުރައްވައި ލިބިވަޑައިގެންނެވި ނާކާމިޔާބީއަށް ފަހުގަ އެވެ.
ނަޝީދާއި އެމަނިކުފާނަށް ތާއީދުކުރާ މީހުން މިހާރު ވަނީ "ދަ ޑިމޮކްރެޓްސް" ނަމުގައި އާ ސިޔާސީ ޕާޓީއެއް އުފައްދައިފަ އެވެ. ނަޝީދު އާ ޕާޓީއަށް ސޮއިކުރެއްވުމަށް ފަހު އެމްޑީޕީ "ރޫޅާލާނެ" ކަމަށް އިންޒާރު ވެސް ދެއްވި އެވެ.
