ޔަހޫދީން އަޅުވެތިކޮށްފައިވާ ފަލަސްތީނުގެ ގާޒާގައި ދިރިއުޅޭ މުސްލިމުންނާ ދެކޮޅަށް އިޒްރޭލުގެ އަސްކަރިއްޔާއިން ހިންގަމުންދާ ލާއިންސާނީ ޖަރީމާތަކާއި ހަނގުރާމައިގެ ކުށްތަކާ މެދު ކަންބޮޑުވުން ފާޅުކޮށް އެކަން، ވެރިކަންކުރާ އެމްޑީޕީން ކުށްވެރިކޮށްފި އެވެ.
އިޒްރޭލުގެ އަތް ދަށުން އަލް އަގްސާ މިސްކިތް މިނިވަން ކުރުމަށް ފަލަސްތީނުގެ ހަމާސް ޖަމާއަތުން ހޮނިހިރު ދުވަހު ފެށި ކުއްލި އޮޕަރޭޝަނުގެ ރައްދުގައި އިޒްރޭލުގެ ސިފައިން އަންނަނީ ގާޒާ އާއި ފަލަސްތީނުގެ އެކި ހިސާބުތަކަށް ހަމަލާ ދެމުންނެވެ.
އެމްޑީޕީން މިއަދު ނެރުނު ބަޔާނުގައި ބުނީ ފަލަސްތީނުގެ ކުށެއް ނެތް މުސްލިމުން ޝަހީދުކޮށް، އެ މީހުންގެ ލޭއޮހޮރުވައިލުމަށް އިޒްރޭލުން ބަރުހަތިޔާރު ބޭނުންކޮށްގެން ދެމުންދާ ހަމަލަތައް އެންމެ ހަރުކަށި އިބާރާތުން ކުށްވެރި ކުރާ ކަމަށެވެ. އަދި ފަލަސްތީނުގެ މުސްލިމް އަހުންނާއި އުހްތުންނާ ދެކޮޅަށް އިޒްރޭލުން ހިންގަމުންދާ ލާއިންސާނީ އުދުވާންތަކާއި ޖަރީމާތައް ބައިނަލްއަގްވާމީ ހަމަތަކުގެ މަތިން ވަގުތުން ވަގުތަށް ހުއްޓައިލަން ގޮވާލާ ކަމަށް ވެސް ބުނެފައިވެ އެވެ.
"މި ޕާޓީއަކީ ފަލަސްތީނުގެ މުސްލިމް އަހުންނާއި އުހްތުންގެ މިނިވަން ކަމަށް ވަކާލާތުކޮށް، އެ މީހުންގެ ހައްގުތައް ހިމާޔަތްކުރަން ތާއަބަދު ގޮވައިލަމުންދާ ޕާޓީއެކެވެ. އަދި، ފަލަސްތީނުގެ މިނިވަންކަން ކަށަވަރު ކޮށްދިނުމަށް އ.ދ އިން ފާސްކޮށްފައިވާ ގަރާރުތަކަށް އިހުތިރާމުކޮށް، އެ ގަރާރުތައް ތަންފީޒު ކުރުމަށް އިޒްރޭލަށް ގޮވައިލަމުންދާ ޕާޓީއެކެވެ،"
އެމްޑީޕީން ބުނީ އެ ޕާޓީ އަކީ ސުލްހަ އާއި ހަމަޖެހުމަށް ވަކާލާތުކުރާ، މަޝްވަރާގެ އުސޫލުގެ ދަށުން ދެބަސްވުންތައް ހައްލު ކުރަން ބާރުއަޅާ ޕާޓީއެއް ކަމަށެވެ. އަދި، އިންސާނީ ހައްގުތަކަށް އިހުތިރާމުކޮށް، ބައިނަލްއަގްވާމީ ގާނޫނުތަކާއި ހަމަތަކުގެ މަތިން އެ ހައްގުތައް ކަށަވަރު ކޮށްދިނުމަށް ވެސް ވަކާލާތުކުރާ ކަމަށެވެ.
"އަދި މި ޕާޓީ އަކީ ފަލަސްތީނުގެ ބިންތަކަށް ވެރިވެގަނެ، އެ މީހުން އަޅުވެތިކޮށް، ބައިތުލް މަގްދިސްގައިވާ މުސްލިމުންގެ ތިން ވަނަ އަށް އެންމެ މުގައްދަސް މިސްކިތް ކަމުގައިވާ އަލް-އަގްސާ އަތްގަދަކުރުމާ ދެކޮޅަށް އަޑުއުފުލަމުންދާ ޕާޓީއެކެވެ."
