ސަރުކާރުން އަތޮޅުތަކުގެ ތަރައްގީއަށް ހިންގާ މަޝްރޫއުތަކުގެ މަސައްކަތް ކުރާ ކުންފުނިތަކަށް ދޭންޖެހޭ ފައިސާ ދިނުން އަވަސްކުރުމަށް މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީއައި) އިން ގޮވާލައިފި އެވެ.
އެ ޖަމިއްޔާއިން އިއްޔެ ނެރެފައިވާ ބަޔާނެއްގައި ބުނީ މަޝްރޫއުތައް ހިންގަން ކޮންޓްރެކްޓަރުން އަމިއްލަ ތަކެތީގައި މަސައްކަތް ކުރުމަށްފަހު، ކޮންޓްރެކްޓުގައި ވާގޮތުގެ މަތިން އިންވޮއިސް ހުށަހެޅުމުން އެ ފަރާތްތަކަށް ފައިސާ ލިބުން ލަސްވާކަމަށެވެ. އޭގެ ސަބަބުން މުއައްޒަފުންނަށް މުސާރަ ނުދެވި، މުއައްޒަފުންގެ ކެއުން ފަދަ ހަރަދުތައް ހަމަނުޖެއްސޭކަން ކޮންޓްރެކްޓަރުން ފާހަގަކުރާ ކަމަށެވެ.
ސަރުކާރުން ކުންފުނިތަކަށް ފައިސާދިނުން ލަސްވެ، މަސައްކަތައް ބޭނުންވި ތަކެތި ފޯރުކޮށްދިން ފަރާތްތަކަށް ވެސް އަގު ނުދެވުން ފަދަ މައްސަލަތައް ކުރިމަތިވާކަމަށް ބަޔާނުގައި ބުނެފައިވެ އެވެ. އަދި މި ޝަކުވާތައް ސަރުކާރުގެ ކަމާބެހޭ ފަރާތްތަކަށް ހުށަހެޅުމުން ވެސް ހައްލެއް ލިބިފައިނުވާކަން އެމްއެންއޭސީއައިގެ ބަޔާނުގައި ވަނީ ފާހަގަކޮށްފަ އެވެ.
އެގޮތުން އެމްއެންއޭސީއައި އިން ކަމާބެހޭ މިނިސްޓްރީތައް އަދި ސިވިލް ސާވިސް ކޮމިޝަނާއިއެކު ކުރި މަޝްވަރާތަކުގެ ތެރޭގައި ކޮންޓްރެކްޓްގެ މުއްދަތު ހަމަވެގެން ސަރުކާރުން އެ ކުންފުނި ޖޫރިމަނާ ކުރާ ފަދައިން، ކަނޑައެޅިފައިވާ މުއްދަތުގައި ކޮންޓްރެކްޓަރުންގެ އިންވޮއިސްތަކަށް ފައިސާ ނުދެއްކޭ ނަމަ، އޭގެ ޖޫރިމަނާ އަދާކުރަން ސަރުކާރުގެ އިދާރާތަކަށް އިލްތިމާސްކޮށްފައިވާނެ ކަމަށެވެ.
މީގެ އިތުރުން، ކޮންޓްރެކްޓަރުންނަށް ދިމާވެފައިވާ މައްސަލަތައް ހައްލުކުރުމުގެ ގޮތުން އެ ޖަމިއްޔާއިން ރައީސް އިބްރާހީމް މުހައްމަދު ސޯލިހާއި ބައްދަލުކޮށް، ޕްރެސެންޓޭޝަނެއްގެ ޒަރިއްޔާއިން މައްސަލަތައް ހުށަހެޅި ނަމަވެސް، ވޭތުވެދިޔަ މުއްދަތުގައި މި މައްސަލައަށް އެއްވެސް ހައްލެއް ލިބިފައި ނުވާކަން އެމްއެންއޭސީއައިގެ ބަޔާނުގައި ވަނީ ބުނެފަ އެވެ.
އެމްއެންއޭސީއައި އިން ވަނީ ކޮންޓްރެކްޓުތަކުގައޮ ބަޔާންކޮށްފައިވާ ގޮތުގެ މަތިން އަމަލުކޮށް، އިންވޮއިސްތަކަށް ފައިސާ ދޫކުރުމަށް ސަރުކާރުގެ ކަމާބެހޭ ފަރާތްތަކަށް އިލްތިމާސްކޮށްފަ އެވެ. އަދި މަސައްކަތް ކުރާ ފަރާތްތަކަށް ހަމަހަމަ ކޮންޓްރެކްޓް ތައާރަފުކޮށް، ކޮންޓްރެކްޓަރުންގެ ހައްގުތައް ހިމާޔަތްކުރުމަށް އެމްއެންސީއޭއައި އިން ވަނީ ގޮވާލާފަ އެވެ.
