ސަރުކާރު ބަދަލުވުމުގެ ކަންކަން ހިނގާ އިންތިގާލީ މަރުހަލާގައި ދައުލަތުގެ މިނިސްޓްރީތަކާއި އިދާރާތަކާއި ކުންފުނިތަކުގެ މައުލޫމާތު އެއްކުރަން 15 ޓްރާންސިޝަނަލް ކޮމިޓީ އެކުލަވާލާފައިވާ ކަމަށް އިންތިހާބީ ރައީސްގެ އޮފީހުން މިއަދު ހާމަކޮށްފި އެވެ.
ޓްރާންސިޝަނަލް ކޮމިޓީތަކަކީ ވެރިކަން ބަދަލުވުމުގެ މަރުހަލާގައި ކަންކަން ވިލަރެސްކުރައްވާ ޑިރެކްޓާ ޖެނެރަލް އޮފް ޓްރާންސިޝަންގެ ދަށުން މަސައްކަތް ކުރާ ކޮމިޓީތަކެކެވެ. މި ކޮމިޓީތަކުގެ މައިގަނޑު ޒިންމާއަކީ ވެރިކަން ނަގުލުކުރުމަށް ބޭނުންވާ މައުލޫމާތު އެއްކޮށް، ސަރުކާރުގެ މަސައްކަތަށް ބުރޫނާރޭނެ ގޮތަކަށް ކަންކަން ކުރިއަށް ގެންދިއުމެވެ.
މި ކޮމިޓީތައް އެކުލަވާލިކަން ހާމަކޮށް އިންތިހާބީ ރައީސްގެ އޮފީހުގެ ފަރާތުން އިންތިގާލީ މަރުހަލާގެ ސްޕޯކްސްޕާސަން މުހައްމަދު ފިރުޒުލް ވިދާޅުވި ގޮތުގައި، މީގެ ތެރެއިން ހަތް ކޮމިޓީ ހާއްސަ ވަނީ ސަރުކާރު ކުންފުނިތަކަށެވެ. ބާކީ އަށް ކޮމިޓީ ހާއްސަ ވަނީ ދައުލަތުގެ އިދާރާތަކާއި ސަރުކާރުގެ ވުޒާރާތަކަށެވެ.
މިއިން ކޮންމެ ކޮމިޓީއެއްގައި އިދާރީ މަސައްކަތް ކުރައްވާ ފަރާތްތަކާއި މާލީ ކަންކަމަށް ހާއްސަ ބޭފުޅުންނާއި ތަންތަނަށް ޒިޔާރަތްކޮށް މައުލޫމާތު އެއްކުރުމުގައި މަސައްކަތް ކުރައްވާ އެންމެން ހިމެނޭހެން 25 އާއި 30 އާ ދެމެދުގެ އަދަދަކަށް މެމްބަރުން ތިބޭނެ އެވެ.
ފިރުޒުލް ވިދާޅުވީ ކޮމިޓީތަކުގައި ތިއްބަވާ މެމްބަރުން ތަމްރީނު ކުރުމުގެ މަސައްކަތް މިއަދު ފަށާފައިވާ ކަމަށެވެ. އެހެންނަމަވެސް އިންތިހާބު ކާމިޔާބު ކުރެވުނު ހިސާބުން ފެށިގެން ވެރިކަމާ ހަވާލުވުމުގެ ކަންކަން ކުރިއަށް ގެންދާނެ ގޮތުގެ ތައްޔާރީތައް ވަމުން އަންނަ ކަމަށް އޭނާ ވިދާޅުވި އެވެ.
އެގޮތުން އެއްކުރާނީ ކޮން މައުލޫމާތުތަކެއް ކަމާއި އެ މައުލޫމާތު ހުންނާނެ ފޯމެޓާއި މައުލޫމާތު ވިލަރެސްކޮށް އެކުލަވާލާނެ ގޮތް އެ ދާއިރާގެ ފަންނީ ބޭފުޅުންނާ ގުޅިގެން ކޮށްފައިވާ ކަމަށް ފިރުޒުލް ވިދާޅުވި އެވެ. އަދި އަންނަ ސަރުކާރުގެ ސިޔާސަތުތަކާއި ފުރަތަމަ 100 ދުވަހުގެ ތެރޭގައި ކުރާނެ މަސައްކަތްތައް ނިންމާނީ މި މަސައްކަތް ނިމުމުން ކަމަށް އޭނާ ހާމަކުރެއްވި އެވެ.
