ވެރިކަން ބަދަލު ކުރުމުގެ މަރުހަލާ ކުރިއަށް ގެންދިއުމަށްޓަކައި، އިންތިހާބީ ރައީސްގެ ފަރާތުން އެކުލަވާލާ އިންތިގާލީ ކޮމިޓީތަކުގައި ގާބިލް އަންހެނުން ހިމެނޭނެ ކަމުގެ ޔަގީންކަން ޕީޕީއެމް/ޕީއެންސީ ކޯލިޝަނުގެ ތަރުޖަމާނު ހީނާ ވަލީދު ދެއްވައިފި އެވެ.
ޕީއެންސީގެ އިންތިގާލީ ކޮމިޓީގައި އަންހެނުން ނުހިމެނޭ ކަމަށް ބުނެ ސޯޝަލް މީޑިއާގައި ކޮށްފައިވާ ޕޯސްޓަކަށް ރައްދުދެއްވާ ހީނާ ލިޔުއްވާފައިވަނީ އެ ފޮޓޯއަކީ އިންތިގާލީ ކޮމިޓީގެ ޑިރެކްޓާ ޖެނެރަލްގެ މަގާމަށް ޕީއެންސީގެ ރައީސް އަބްދުއްރަހީމް އަބްދުﷲ އައްޔަން ކުރުމަށް ބޭއްވި ރަސްމިއްޔާތުގެ ފޮޓޯއެއް ކަމަށެވެ. އަދި އެ ރަސްމިއްޔާތުގައި ބައިވެރިވީ ދެ ޕާޓީގެ ލީޑަޝިޕުން ކަމަށްވެސް ހީނާ ވިދާޅުވި އެވެ.
"ޓްރާންސިޝަން ކޮމިޓީތައް އެކުލަވާލެވެނީ ތަފާތު ދާއިރާތަކުން ފަންނުވެރި ހުނަރުވެރި ގާބިލް އަންހެނުން ހިމެނޭ ގޮތަށް. އިންތިހާބީ ރައީސް މުއިއްޒުގެ މެނިފެސްޓޯގައި ދެ ވަނަ އަށް އެންމެ އިސްކަން ދެއްވާފައިވަނީ ވެސް އަންހެނުން ބާރުވެރިކުރުވުމަށް،"
މިކަމުގައި ޕީޕީއެމް/ޕީއެންސީ އަށް ފާޑުވިދާޅުވި ބޭފުޅުންގެ ތެރޭގައި މި ސަރުކާރުގެ ހެރިޓޭޖް މިނިސްޓަރު ޔުމްނާ މައުމޫން ހިމެނިވަޑައިގަންނަވަ އެވެ.
ރިޔާސީ އިންތިހާބު އިދިކޮޅު ޕީއެންސީގެ ރިޔާސީ ކެންޑިޑޭޓު، ޑރ. މުހައްމަދު މުއިއްޒު ކާމިޔާބުކުރެއްވީ ވޯޓުލީ މީހުންގެ 54 ޕަސެންޓު ވޯޓުންނެވެ. ވެރިކަންކުރާ އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 46 ޕަސެންޓް ވޯޓެވެ.
ރިޔާސީ އިންތިހާބުގެ ފުރަތަމަ ބުރުގައި ވެސް އެންމެ ގިނަ ވޯޓު ހޯއްދެވީ މުއިއްޒެވެ. ފުރަތަމަ ބުރު މުއިއްޒު ވަނީ 46 ޕަސެންޓް ވޯޓު ހޯއްދަވައިފަ އެވެ. އެ ބުރު ރައީސް ސޯލިހަށް ލިބިވަޑައިގަތީ 39 ޕަސެންޓެވެ.
ރިޔާސީ އިންތިހާބަށް ފަހު އިންތިހާބީ ރައީސް މުއިއްޒާއި، ރައީސް ސޯލިހު މިދިޔަ އާދީއްތަ ދުވަހު ބައްދަލު ކުރެއްވި އެވެ. އެ ބައްދަލުވުމުގައި ވެރިކަން ބަދަލު ކުރުމުގެ މަރުހަލާ ވީހާވެސް އޮމާންކޮށް ގެންދިއުމަށް ޓަކައި މަޝްވަރާ ކުރެއްވި އެވެ.
