އިންޓަނޭޝަނަލް ކޯޗިން ފެޑެރޭޝަން (އައިސީއެފް) އާއި ވޯލްޑް އޮފް ޓުމޯރޯ (ޑަބްލިއުއޯޓީ) ގުޅިގެން ޕަބްލިކް އަދި ޕްރައިވެޓް ސެކްޓަރުގެ އެކި ފަންތީގެ މާހިރުންނަށް އަމާޒުކޮށްގެން ރާއްޖޭގައި މާސްޓާ ކްލާސްތަކެއް ބާއްވަން ތައްޔާރު ވާން ފަށައިފި އެވެ.
މި މާސްޓާ ކްލާސްތައް ހިންގުމުގައި އެންމެ އިސްކޮށް ހަރަކާތްތެރި ވާނީ އައިސީއެފްގެ ނައިބު ރައީސް ރޮބަޓް ގާސިއާ އެވެ. އޭނާ އަކީ ދުނިޔޭގެ އެކި ޖަމިއްޔާތަކަށް ކޯޗް ކަން ކޮށްދެެއްވާފައިވާ މީހެކެވެ. އަދި ކުންފުނިތަކުގެ ތެރޭގައި ކޯޗިންގެ ސަގާފަތް އާލާކުރުމަށް އެކުލަވާލައިފައިވާ އައިސީއެފްގެ ބިޒްނަސް ޔުނިޓް ހިންގުމުގައި އެންމެ އިސަ ސަފުގައިވެސް ރޮބަޓް ވަނީ މަސައްކަތް ކުރައްވާފަ އެވެ.
އޭގެ އިތުރުން ވިޔަފާރި، ހިއުމަން ރިސޯސް މެނޭޖްމަންޓް، ސޭލްސް، އޮޕަރޭޝަންސް، ލީޑަޝިޕް ކޮންސަލްޓިން، އަދި ޑައިވަސިޓީގެ ރޮނގުން އެތަކެއް އަހަރެއްގެ ތަޖުރިބާ ހާސިލު ކުރައްވާފައިވާ ރޮބާޓް އަކީ ކަސްޓަމަރުންގެ ލޯޔަލިޓީ ކަށަވަރުކޮށް އުފެއްދުންތެރިކަން އިތުރުކުރުމަށް އާ ސްޓްރެޓެޖީތައް ތަންފީޒުކުރުމުގައި ދެމިހުންނެވި ތަޖުރިބާކާރު ބޭފުޅެއް ވެސް މެ އެވެ.
އޭނާ އަކީ 50 އަށް ވުރެ ގައުމުގައި ވިޔަފާރީގެ ގުޅުން ގެންގުޅުއްވާ ދުނިޔޭގެ އެކި ކަންކޮޅުތަކުން ތަޖުރިބާ ލިބިވަޑައިގެންފައިވާ ބޭފުޅެކެވެ.
ރާއްޖޭގައި ކުރިއަށްގެންދާ މި މި މާސްޓާ ކްލާސްތަކުގެ ފުރަތަމަ އިންސްޓޯލްމަންޓް އޮންނާނީ އޮކްޓޯބަރު 23 އިން 25 އަށް ވިލާ ނޯޓިކާ ރިސޯޓުގަ އެވެ.
"ވޯލްޑް އޮފް ޓުމޯރޯ" އިން ބުނީ މި މާސްޓަކްލާސްތަކުގައި ރޮބަޓް ގާސިއާ "ދަ ފިއުޗާ ލޭންޑްސްކޭޕް އޮފް ކޯޗިން އިން އޮގަނައިޒޭޝަންސް" އަށް ފުންކޮށް އަލި އަޅުވާލާނެ ކަމަށެވެ. އަދި ޖަމިއްޔާތަކުގައި ކޯޗިން ތަރައްގީވަމުން އަންނަ ގޮތްތައް ފާހަގަކޮށް، ކުންފުނިތަކުގެ ލަނޑުދަނޑިތައް އެ ކުންފުންޏެއްގެ ސަގާފަތްތަކާ އެއްގޮތްކުރުމުގެ މުހިންމުކަމަށް ވެސް އަލިއަޅުވާލާނެއެވެ.
އޭގެ އިތުރުން، ވިޔަފާރިއާއި ހުނަރު ބެލެހެއްޓުމުގައި ކޯޗިންގެ މުހިންމު ދައުރު ދެނެގަތުމާއި، މިފަދަ ކަންކަމުން ނަތީޖާތަކަށް ކުރާ އަސަރު މިންކުރާނެ ގޮތްތަކަށްވެސް ވާހަކަ ދައްކަވާނެ ކަމަށާއި ކޯޗިން ބޭނުންކޮށްގެން އުފެއްދުންތެރިކަން ކުރިއެރުވުމާއި، އުފެއްދުންތެރިކަން އިތުރުކޮށް، ކުންފުނިތަކުގެ ތެރޭގައި އެންގޭޖްމަންޓް އިތުރުކުރެވޭނެ ގޮތްތައް ވެސް މި މާސްޓަކްލާސްތަކުގައި ދިރާސާ ކުރާނެ އެވެ.
ވޯލްޑް އޮފް ޓުމޯރޯ އިން ބުނި ގޮތުގައި މިއީ އެކި ދާއިރާތަކުން ކުރިއަށްދާން ބޭނުންވާ ފަރާތްތަކަށް ވަރަށް އަގުހުރި ފުރުސަތަކަށް ވާނެއެވެ. އަދި ޕަބްލިކް، ޕްރައިވެޓް ސެކްޓަރުގެ ތަފާތު ފަންތީގެ ބޭފުޅުން މި މާސްޓަކްލާސްތަކުގައި ބަރިވެރިވުމަށް "ވޯލްޑް އޮފް ޓޫމޯރޯ" އިން ބާރުއަޅައެވެ.
