ސެޕްޓެމްބަރު މަހު ބޭއްވި ރިޔާސީ އިންތިހާބުގެ ދެބުރާ ދިމާކޮށް ކެމްޕޭނަށް މާލޭގެ މަގުތަކުގައި ދަމާފައި ހުރި ދިދަފަތިތައް ނަގަން ފަށައިފި އެވެ.
މާލެ ސިޓީ ކައުންސިލުން ބުނީ މާލޭގެ އެކި މަގުތަކުގައި ދަމާފައިވާ ކެމްޕޭން ދިދަ ފަތިތައް ނެގުމުގެ މަސައްކަތް އެ ކައުންސިލުން މިއަދު ފަށާފައި ވާކަމަށެވެ.
ކެމްޕޭން ކުރުމުގެ ގޮތުން މާލޭގެ ގިނަ މަގުތަކާއި ގޯޅިތަކުގައި، އެކި ޕާޓީތަކުން ދިދަފަތި ޕޯސްޓަރު އަދި ބެނާ ދަމާފައި ވާއިރު، މިމަހުގެ ކުރީކޮޅުން ފެށިގެން މާލެއަށް ކުރާ ވިއްސާރާގައި ބައެއް ސަރަހައްދުތަކުގެ ދިދަފަތިތައް ކަނޑައިގެން ގޮސްފައި ވެއެވެ.
އިންތިހާބުގެ ފުރަތަމަ ބުރުގައި އަށް ކެންޑިޑޭޓުން ވާދަކުރި އިރު ހުރިހާ ކެންޑިޑޭޓުން ވެސް ވަނީ ކެމްޕޭނަށް އެކި ސަަރަހައްދުތަކުގައި ޕޯސްޓަރާއި، ބެނާ އަދި ދިދަފަތި ދަމާފަ އެވެ.
އޭގެ ތެރެއިން އެންމެއިން ގިނައިން ދިދަފަތިތަކާއި ކެމްޕޭން ބެނާތައް ދަމާފައި ވަނީ އެންމެ ބޮޑު ސިޔާސީ ދެޕާޓީ، ޕީޕީއެމް އަދި އެމްޑީޕީއިންނެވެ. ޖުމްހޫރީ ޕާޓީ އަދި އެމްއެންޕީއިން ވެސް ވަނީ ބައެއް މަގުތަކުގައި ދިދަފަތި ދަމާފަ އެވެ.
