ސަރުކާރުން ނަގާފައިވާ ލޯނުތަކާއި އެ ލޯނުތަކުގެ އިންޓަރެސްޓް ރޭޓް ހިމެނޭ ލިޔުމެއް ކަމަށް ބުނެ ދައުރުކުރަމުންދަނީ ފޭކް ލިޔުމެއް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
އިންތިހާބުގެ ދެވަނަ ބުރުގެ ވޯޓުލުން ފެށިގެން ކުރިއަށްދާއިރު ރޭގެ ވަގުތެއްގައި މީސްމީޑިއާގައި ވަނީ ލޯނުތައް ނަގާފައިވާ އިންޓަރެސްޓް ރޭޓުތަކާއި އަދި އެ ލޯނުތައް ނަގާފައިވާ މާލީ އިދާރާތަކުގެ ނަންތައް ހިމަނައިގެން ލިސްޓެއް ދައުރުކުރަމުންނެވެ.
ރާއްޖޭގެ އޮންލައިން ނޫހަކުން ވެސް ވަނީ އެފަދަ ހަބަރެއް ގެނެސްދީފަ އެވެ. އެކަން އަމީރު ވަނީ ދޮގުކުރައްވައި ފާޑު ވިދާޅުވެފަ އެވެ.
"[އެއީ] ކަނޑައެޅިގެން އުނި އިތުރުކޮށް އޮޅުވާލުމުގެ މަގްސަދުގައި ހަދާފައި އޮތް ފޭކް ޑޮކިއުމެންޓެއް," އެކަމާ ގުޅިގެން ކުރެއްވި ޓްވީޓެއްގައި އަމީރު ވިދާޅުވި އެވެ.
މިއަހަރުގެ މިހާތަނަށް ސަރުކާރުން ތިން ލޯނެއް ނަގާފައިވެ އެވެ. ވާލްޑް ބޭންކުގެ އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑީއޭ) އިން ދެ ލޯނެއް ނަގާފައިވާއިރު ނަން ހާމަނުކުރާ 'ޕްރައިވެޓް ކްރެޑިޓާ' އެއްގެ އަތުން ވެސް ލޯނެއް ނަގާފައިވެ އެވެ.
ދައުލަތުގެ ދަރަނީގެ ތަފާސްހިސާބުތައް ފިނޭންސް މިނިސްޓްރީން ހާމަކުރެ އެވެ. އެންމެ ފަހުގެ ތަފާސްހިސާބުތަކުން ދައްކާ ގޮތުގައި މި ވަގުތު ދައުލަތުން އަނބުރާ ދައްކަން ޖެގޭ "އެކްޓިވް" 134 ލޯނެއް އެބައޮތެވެ. މި ދަރަނީގެ ޖުމްލަ އަގަކީ 65.2 ބިލިއަން ރުފިޔާ އެވެ.
