ކުރީގެ ރައީސް އަބްދުﷲ ޔާމީންގެ ވެރިކަމަކީ "އަނިޔާވެރި، ހުތުރު ޓޭޕެއް" ކަމަށާއި އަނިޔާވެރިކަން އިޔާދަވިޔަ ނުދިނުމަށްޓަކައި ރައީސް އިބްރާހިމް މުހައްމަދު ސޯލިހަށް ވޯޓު ދެއްވުމަށް، މިރޭ އެމްޑީޕީ އަށް ބަދަލުވެވަޑައިގެންނެވި، ޖުމްހޫރީ ޕާޓީގެ ލީޑަރު ގާއިމް އިބްރާހިމްގެ ސްޕެޝަލް އެންވޯއީ، އަދި ރައްޔިތުންގެ މަޖިލީހުގެ ކުރީގެ މެމްބަރު އިލްހާމު އަހްމަދު ހާއްސަ އިލްތިމާސްއެއް ކުރައްވައިފި އެވެ.
ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ރައީސް ސޯލިހަށް ތާއިދު ކުރައްވިކަން އިއުލާނު ކުރެއްވުމަށް ފަހު، މިރޭ އެމްޑީޕީ އަށް ސޮއިކުރެއްވި އިލްހާމް ފުރަތަމަ ފަހަރަށް އެ ޕާޓީގެ ޕޯޑިއަމްގައި ވިދާޅުވީ "2018ގެ ޓޭޕް ރިވައިންޑްކޮށްލީމަ މާ ރީއްޗެއް ނޫން" ކަމަށެވެ.
"ވަރަށް ހަޑި މާޒީއެއް އޮތީ ޕީޕީއެމާ ގުޅިފައި،" ޕީޕީއެމްގެ ކުރީގެ ވެރިކަމުގައި ސިޔާސީ ވެރިން ޖަލަށްލާ, އަނިޔާވެރިވީކަން ހަނދާން ކުރައްވަމުން އިލްހާމް ވިދާޅުވި އެވެ.
އިލްހާމް ވިދާޅުވީ ރައީސް ޔާމީނުގެ ވެރިކަމުގައި އަނިޔާ ތަހަންމަލު ކުރަން ޖެހުނު އެއްވެސް މީހަކު, އަދި އެއްވެސް އާއިލާއަކުން ޕީޕީއެމަށް ވޯޓު ނުދޭނެ ކަމަށެވެ.
"ޕީޕީއެމަށް ވެރިކަން ލިބިއްޖެއްޔާ ކޯޓުގެ ދައުރަކަށް ވާނީ މީހުން ހިފާ ހައްޔަރުކުރުން, ރޭގަނޑު ދަންވަރު ކޯޓުން އަމުރުނެރުން،" ޕީޕީއެމްގެ ވެރިކަމެއްގައި ޝަރުއީ ދާއިރާއަށް ނުފޫޒު ފޯރުވާނެ ކަމުގެ ތުހުމަތު ކުރައްވާ އިލްހާމް ވިދާޅުވި އެވެ.
އޭނާ ވިދާޅުވީ އެ ހާލަތުގައި ސިފައިންނާއި ފުލުހުންނަށް އޮންނާނެ ދައުރަކީ ފުރާޅުން ޓިނު ނަގައި, މީހުން ހިފައި ހައްޔަރު ކުރުމުގެ އިތުރަށް ޣައިރު ގާނޫނީ އަމުރުތަކަށް ތަބާވުން ކަމަށެވެ. އަދި އެކަންކަމަށް ފަހުން ހުކުމް އަންނާނެކަން ފާހަގަކުރައްވާ އިލްހާމް ވަނީ ޕީޕީއެމްގެ ކުރީގެ ވެރިކަމުގައި ފުލުހުން ކުރަން ޖެހުނު ބައެއް ކަންކަމަށް އަލިއަޅުއްވާލައްވާފަ އެވެ.
މާޒީގެ ހަނދާންތައް އާ ކުރައްވާ އިލްހާމް ވަނީ ޕީޕީއެމަށް ވެރިކަން ލިބިއްޖެނަމަ, ޖަަލަށް ލާނެ މީހުންގެ ލިސްޓު މިހާރު ވެސް ތައްޔާރު ކުރަމުންދާ ކަމުގެ ތުހުމަތު ކުރައްވާފަ އެވެ. ޝަރުއީ ދާއިރާގައި ތިބި މީހުންނާއި ފުލުހުންގެ ތެރޭގައި ތިބި މީހުން ބޭރު ކުރުމަށް މިހާރު ޕީޕީއެމުން ރާވަމުންދާ ކަމަށް ވެސް އޭނާ ވިދާޅުވި އެވެ.
"މީހުން ހިފާ ހައްޔަރު ކުރުމަށްޓަކައި [ޕީޕީއެމުން] ލިސްޓުތަކެއް އެކުލަވާލެވި އެދަނީ އިއުލާނު ކުރަމުން،" އިލްހާމް ވިދާޅުވި ގޮތުގައި މިކަންކަން ވިޔަ ނުދިނުމަށްޓަކައި, ރައީސް ސޯލިހަށް ވޯޓު ދިނުމަކީ ދިވެހި ފުލުހުންނާއި ސިފައިންގެ މައްޗަށް އޮތް ވާޖިބެއް ކަމަށެވެ.
އޭނާ ވިދާޅުވީ މި ރާއްޖެއަށް ނާމާން, ކަޅު, އަނދިރި ދުވަސްތަކެއް ނާންނާނީ ރައީސް ސޯލިހަށް ވޯޓު ދީގެން ކަމަށެވެ. އަދި އެ ބާރު އޮތީ ދިވެހި ފުލުހުންނާއި ސިފައިންގެ އަތްމަތީގައި ކަމަށާއި, މި ފަހަރު 'މިސްޓޭކު' ނުހެދުމަށް އޭނާ އެދިވަޑައިގެންނެވި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ރާއްޖޭން ބޭރަށް އަރުވާލެވިގެން އިލްހާމް ހުއްޓެވެ. މާލެ އައުމުން ހައްޔަރުކޮށް އަށެއްކަ މަސް ދުވަހު ޖަލުގައި ބޭއްވި އެވެ. އޭނާގެ އަންހެނުން ޕޮލިހުގައި ބަންދުކުރި އެވެ. އަދި އެއްބަނޑު އެއްބަފާ ކޮއްކޮ، ގާނޫނީ ވަކީލު އާދަމް ޒާލިފު ހައްޔަރުކޮށް ޖަލަށްލި އެވެ.
