އެސްއެމްއީ ޑިވެލޮޕްމެންޓު ފައިނޭންސް ކޯޕަރޭޝަން (އެސްޑީއެފްސީ) ން ދޫކުރި "ކޮވިޑު ވިޔަފާރި އެހީ"ގެ ލޯނުތަކުގެ އިންޓަރެސްޓު ކަނޑާލައި، އަނބުރާ ދައްކަންޖެހޭ މުއްދަތު 10 އަހަރަށް ހަދައިފި އެވެ.
ރިޔާސީ އިންތިހާބަށް ކެމްޕެއިންކުރަން އެމްޑީޕީން މާލޭގައި މިރޭ ބޭއްވި ޖަލްސާގައި ރައީސް ވިދާޅުވީ ކޮވިޑް-19 ގެ ބަލިމަޑުކަމުގެ ސަބަބުން އާއްމުންނަށް ވަރަށް ބޮޑެތި ދަތިތަކާ ކުރިމަތިވި ކަމަށެވެ. އޭރު އެސްޑީއެފްސީ މެދުވެރިކޮށް ދިން ލޯނުތަކުގެ އިންޓަރެސްޓް ކަނޑައިލުމާއި މުއްދަތު އިތުރުކޮށްދިނުމަކީ ޑޯޓުޑޯ ހިންގެވި އިރު ބައްދަލުވި (ބައެއް މީހުން) އެދުނު ކަމެއް ކަމަށް ވެސް އެމަނިކުފާނު ވިދާޅުވި އެވެ.
"އެންމެ ކުޑަމިނުން އެވަރުކޮށްދޭން [މީހުން އެދުނު]، އަޅުގަނޑުމެން މިއަދު ވަނީ އެކަމަށް ގޮތެއް ނިންމާފައި. އިރާދަކުރެއްވިއްޔާ އެ ނިންމުމާ އެއްގޮތަށް، އެސްޑީއެފުން ނަގާފައި ހުރި ލޯނުތައް ތިޔަ ބޭފުޅުން ދެން ދައްކަވާކަށް ނުޖެހޭނެ، އަދި މިހައިތަށް އިންޓަރެސްޓް ދައްކާފައި ތިބި މީހުނަށް އެ ފައިސާ އަޅުގަނޑުމެން ދޭނަން،" ރައީސް ވިދާޅުވި އެވެ.
ކޮވިޑުގެ ބަލިމަޑުގައި ރާއްޖޭގެ އިގުތިސޯދު ދަށަށް ދިޔުމާ ގުޅިގެން ވިޔަފާރިތަކާއި އާމްދަނީ ހޯދަން އަމިއްލަ އަށް މަސައްކަތް ކުރަމުން ދިޔަ ފަރާތްތަކަށް މާލީ އެހީތެރިކަން ފޯރުކޮށް ދިނުމުގެ ގޮތުން ސަރުކާރުގެ 100 ޕަސެންޓު ހިއްސާ އޮންނަ އެސްއެމްއީ ބޭންކުން 2020، އަދި 2021 ވަނަ އަހަރު ޖުމުލަ 373 މިލިއަން ރުފިޔާ ލޯނުގެ ގޮތުގައި ދޫކޮށްފައިވެ އެވެ.
އެ ލޯނުތައް ދޫކޮށްފައި ވަނީ ހަ ޕަސެންޓު އިންޓަރެސްޓު ރޭޓުގައި ފަސް އަހަރުން ދައްކާ ގޮތަށެވެ.
